دوختۇرلار تورى

تەن ساقلىق زور بايلىق

بەختنىڭ چېكى بولامدۇ؟

بەخت توغرىسىدا گەپ بولۇنسا، بەزىلىرىمىز ئۆزىمىزدىن، ئائىلىمىزدىن، تۇرمۇشىمىزدىن زارلىنىمىز، ئۆزىمىزنى باشقىلارغا سېلىشتۇرۇپ ۋايسايمىز، ئۆكۈنىمىز

خىزمەتنىڭ ئالدىراشلىقى، ئائىلىنىڭ بېسىمى، تۇرمۇشنىڭ قاتتىقلىقى، قىسقىسى بارچە كەلگۈلۈكنىڭ ھەممىسى ئۆزىمىزگىلا كەلگەندەك ئاھ ئۇرىمىز. بەھرىمەن بولۇۋاتقانلىرىمىزدىن، ئېرىشكەنلىرىمىزدىن خۇشاللىق تېپىپ شۈكرى قانائەت قىلمايمىزكى، ھەتتاكى ئەمەلىيىتىمىزگە، تۇرمۇشىمىزغا ئەسلا ماس كەلمەيدىغان، ئەمەلگە ئاشمايدىغان تەلەپ – ئېھتىياجلار ئۈستىدە ئارتۇقچە غەم يەپ، ئاغرىنىش، ھەسرەتلىنىش، نادامەت ئىچىدە ياشايمىز.

بەختنىڭ چېكى بولامدۇ؟

بىر بوۋاي تۇرمۇشتا ئۆزىنىڭ ھۆددىسىدىن چىقالمايدىغان بولۇپ قاپتۇ، ئوغۇللىرىمۇ ئۇنىڭ بىلەن كارى بولمىغاننى ئاز دەپ، بىكارچىلىقتا لاغايلاپ يۈرۈپتۇ ھەم دائىم تۇرمۇشىدىن زارلىنىپ كەپتۇ. بۇنى ھېس قىلغان بوۋاي بىر كۈنى ئوغۇللىرىنى چاقىرتىپ، ئۇلارغا ھويلىنىڭ يېنىدىكى دۆڭلۈكنىڭ ئاستىغا لىققىدە ئالتۇن قاچىلانغان بىر كوزىنىڭ كۆمۈلگەنلىكىنى، ئوغۇللىرىنىڭ قايسىسى مۇشۇ نەچچە مو كېلىدىغان دۆڭنىڭ توپىسىنى يۆتكەپ، ئالتۇن قاچىلانغان كوزىنى تاپالىسا بارلىق ئالتۇنلارنى شۇنىڭغا مىراس قالدۇرىدىغانلىقىنى ئېيتىپتۇ.

ئوغۇللار بايلىق تاماسىدا بىر – بىرىدىن قىزغىنىپ دادىسىغا باشقىچە كۆيۈنىدىغان بولۇپ كېتىپتۇ. بىرى دۆڭنىڭ ئۇ تەرىپىدىن، بىرى بۇ تەرىپىدىن كولاپ، توپىسىنى يۆتكەشنى بىر نەچچە ئاي داۋاملاشتۇرۇپ، يەرنى تۈپتۈز قىلىۋېتىپتۇ، بۇ جەرياندا ئۇلارنىڭ قوللىرى قاپىرىپ، جاپانىڭ تەمىنى يەتكىچە تارتىپتۇ. ئەمما ئۇلار ئالتۇن قاچىلانغان كوزىنى تاپالماپتۇ. دادام بىزنى ئالدىغان ئوخشايدۇ، دەپ ئويلىغان ئاكا – ئۇكىلار دادىسىدىن سورىغان ئىكەن، دادا كۈلۈمسىرىگەن ھالدا مۇشۇ بىر نەچچە مو بىنەم يەرنىڭ بىر كوزا ئالتۇندىنمۇ قىممەتلىك ئىكەنلىكىنى، مۇشۇ يەرنى ياخشى سۇغىرىپ، پەرۋىشلەپ، مېۋىلىك باغ بىنا قىلغاندىلا، ئالتۇندىنمۇ قىممەتلىك بايلىققا ئېرىشىدىغانلىقىنى ئېيتىپتۇ.

شۇنىڭدىن كېيىن ئۆزلىرىنىڭ خاتا قىلغانلىقىنى ھېس قىلغان ئاكا – ئۇكىلار ياشانغان دادىسىنى كۆيۈنۈپ بېقىش بىلەن بىللە، يەرنى تۈجۈپىلەپ پەرۋىش قىلىپ، بىر نەچچە يىلدىلا نەچچە مىڭ يۈەن كىرىم قىلىدىغان ئالتۇن باغقا ئايلاندۇرۇپ، ھالال ئەمگىكىنىڭ ھالاۋىتىنى كۆرۈپتۇ.

بۇ مىسالدىن شۇنى ھېس قىلىمىزكى، بەخت ھەرگىزمۇ ئېرىشكىلى بولمايدىغان نەرسە ئەمەس، بەلكى تۇرمۇشىمىز ۋە ئەمەلىيىتىمىزدىكى مېھنەتلىك ئەجرىمىزنىڭ بىزگە ئاتا قىلغان ھوسۇلى خالاس.

ھەممە ئادەم مۇئەييەن بەخت ئىستىكىدە ياشايدۇ، ئەمما ھەممە كىشىنىڭ بەخت ھەققىدىكى چۈشەنچىسى ئوخشاش بولمىغانلىقتىن، ئۆزلىرىنىڭ بەختكە ئېرىشىشتىكى تەلەپ – ئېھتىياجىمۇ پەرقلىق بولىدۇ. ئەمما شۇ مۇقەررەركى، يۇقىرى چەكتىكى خىيالى تۇيغۇغا ئىگە ماددىي ۋە مەنىۋى ھاسىلاتلارنىڭ بىرىكىشىدىن مۇجەسسەملىنىدىغان بەخت ئەمەلىيەتتە تامامەن ئىجابىي يوسۇندا ئېرىشىدىغان بەخت بولماستىن، بەلكى بەختسىزلىكنىڭ باشلىنىش نۇقتىسى، شۇنداقلا ھالاكەتنىڭ چاقىرىلىشى، سەمىمىيلىك، ۋاپادارلىق، كۆيۈنۈش، شۈكرى – قانائەت، پەزىلەتلەرنىڭ سۇسلىشىش جەريانى ھېسابلىنىدۇ. شۇڭا ھەممىمىز ئەمەلىيەتكە، تۇرمۇشقا تېخىمۇ يېقىنلىشىپ، ئەمەلىيەتچىل بولۇپ، قول سېلىپ ئىشلەشنى، ئاددىيلىق ئىچىدىن خۇشاللىق تېپىشنى، ئادىمىيلىك پەزىلىتىمىز ۋە سەمىمىيىتىمىز ئارقىلىق باشقىلارغا مېھىر – مۇھەببەت ئاتا قىلىشنى، ئىناقلىق ئىتتىپاقلىق گۈللىرىنى پورەكلىتىپ، جەمئىيەتكە تۆھپە قوشۇشنى ئەڭ ئۇلۇغ بەخت، دەپ بىلىشىمىز لازىم.

مەزكۈر مەزمون قوشۇلغان ۋاقىت: 2021-01-10

مەزكۈر مەزمون ئاخىرقى قېتىم يېڭىلانغان ۋاقىت: 2021-01-01 / 05:44:56

سەمىمىي ئەسكەرتىش
بىكەتتىكى مەزمۇنلار تورداشلارنىڭ پايدىلىنىشى، ساغلاملىققا بولغان تونۇشىنى ئاشۇرۇش ئۈچۈن تەمىنلەنگەن ئۇچۇرلاردۇر. ئەمما دىئاگنوز ئاساسى بولالمايدۇ. ئوخشىمىغان بىماردا ئوخشىمىغان ئالامەتلەر كۆرۈلىدۇ ۋە دىئاگنوزى ئوخشىمايدۇ. شۇڭا بەدەندە كېسەللىك ئالامەتلىرى كۆرۈلگەندە چوقۇم مۇنتىزىم دوختۇر بىلەن يۈز تۇرانە مەسىلىھەت ئېلىشىڭىزنى، دوختۇرخانىدا تەكشۈرتۈشىڭىزنى تەۋسىيە قىلىمىز.

باشقا يەرلەردىن ئېلىنغان بەزى مەزمۇنلار، رەسىملەرنىڭ ئەسلى مەنبەسىنى ئەسكەرتىشكە تىرىشتۇق. باشقا يەردىن ئېلىنغان مەزمۇنلار پەقەت شۇ ئاپتور يازارنىڭ ئۆز كۆز قارىشىنى ئىپادىلەيدۇ، بېكىتىمىزنىڭ مەيدانىغا ۋەكىللىك قىلالمايدۇ. بۇنىڭدىن سىرت، ئەگەر ئەسەرنىڭ ئەسلى ئاپتورى ماقالىنىڭ تور بېكىتىمىزدە ئېلان قىلىنغانلىقى ئۆزىنىڭ شەخسىي مەنپەئىتىگە دەخلى قىلىندى دەپ ئويلىسا، بىز بىلەن ئالاقىلاشسىڭىز، ئەڭ قىسقا ۋاقىت ئىچىدە بىكەتتىن ئۆچۈرۋەتسەك بولىدۇ.

تور بېكىتىمىزدىكى مەزمۇنلارنى شەخسىي بېتىڭىزدە ئىشلەتمەكچى بولسىڭىز، دوختۇرلار تور بېكىتى ياكى dohturlar.com دىن ئېلىنغانلىقىنى ۋەيا بىز ئەسكەرتكەن مەزمۇننىڭ ئەسلى مەنبەسىنى ئەسكەرتىپ قويۇشىڭىزنى چىن دىلىمىزدىن ئۈمىد قىلىمىز. ئەمگەك مېۋىسىگە ھۆرمەت قىلىڭ.

نۇر دوختۇر Doctor Nur
نۇر دوختۇر Doctor Nurhttp://dohturlar.com
تەن ساقلىق، زور بايلىق. دوختۇرلۇق مېنىڭ كەسپىم، تور بەت لايىھەلەش مېنىڭ قىزىقىشىم، بۇ ئىككىسىنى بىرلەشتۈرۈپ خەلقىم ئۈچۈن بىراز ئىش قىلىپ بېرەلىسەملا مېنىڭ ئەڭ چوڭ خوشاللىقىم بولىدۇ!

مۇناسىۋەتلىك تېمىلار

قالدۇرۇلغان باھالار

سۆز قالدۇرۇش

Please enter your comment!
Please enter your name here

سوتسىيال تاراتقۇلىرىمىز

1,663FansLike
697FollowersFollow
1,870SubscribersSubscribe

يېڭى مەزمونلار

مەخسۇس سەھىپىلەر