توۋتياۋ تورى خەۋىرى، نۇر تورى تەرجىمىسى:
ئەيدىز كېسىلى تەن ساغلاملىقىغا ئېغىر زىيان يەتكۈزىدىغان بىر خىل يۇقۇملۇق كېسەللىك بولۇپ، بۇ كېسەلگە گىرىپتار بولغاندىن كېيىن، ئۆمۈرۋايەت ۋىرۇسىقا قارشى داۋالاشقا توغرا كېلىدۇ، چۈنكى ھازىر ئۇنى داۋالاپ ساقايتقىلى بولمايدۇ.
ئەيدىز كېسىلىگە گىرىپتار بولغاندىن كېيىن تېرىدە ئۆزگىرىش بولىدۇ. كىلىنىكىلىق ئىستاتىستىكىغا ئاساسلانغاندا، %90تىن ئارتۇق ئەيدىز بىمارلىرىدا ئوخشىمىغان دەرىجىدە تېرە شىللىق پەردىسىدە كېسەللىك ئۆزگىرىشى كۆرۈلىدۇ، بۇلار ئايرىم-ئايرىم ھالدا يۇقۇملىنىش خاراكتېرلىك تېرە زەخمىسى، ياللۇغلىنىش خاراكتېرلىك تېرە زەخمىسى ۋە تېرە ئۆسمىسىدىن ئىبارەت ئۈچ خىل بولىدۇ.
بۇنىڭ ئىچىدە يۇقۇملىنىش خاراكتېرلىك تېرە زەخمىسى يەنە بەلۋاغسىمان قوقاق، ئاددىي قوقاق، سۆگەل، زەمبۇرۇغدىن يۇقۇملىنىش ۋە باكتېرىيەدىن يۇقۇملىنىش دەپ ئايرىلىدۇ.
ياللۇغلىنىش خاراكتېرلىك تېرە زەخمىسى تەڭگە تەمرەتكە كېسىلى، ياغ تەپچىرەيدىغان تېرە ياللۇغى قاتارلىقلارغا ئوخشاپ كېتىدۇ، ھەتتا لىمفا ئۆسمىسى ۋە كاپوسى گۆش ئۆسمىسى قاتارلىق ئىككى خىل ئۆسمە پەيدا بولۇشى مۇمكىن.
ئەيدىز كېسەللىكىگە گىرىپتار بولغاندا، ئېغىز بوشلۇقىدا قانداق ئۆزگىرىش پەيدا بولىدۇ؟
ئەيدىز كېسەللىكىنىڭ يوشۇرۇن مەزگىلى بىر قەدەر ئۇزۇن بولىدۇ، تىلغا ئېلىشقا ئەرزىيدىغىنى شۇكى، ئەيدىز كېسەللىكىگە گىرىپتار بولغاندىن كېيىن تېرىدە ئۆزگىرىش بولغاندىن باشقا، ئېغىز بوشلۇقىمۇ سىگنال بېرىدۇ.
ئالدى بىلەن ئېغىز بوشلۇقىدا ئاق داغ پەيدا بولغاندا، خەتەرلىك قىلمىشى بار كىشىلەر ئەيدىز كېسىلىدىن ئېھتىيات قىلىشى كېرەك.
ئەيدىز كېسىلىنىڭ دەسلەپكى مەزگىلىدە ئېغىز بوشلۇقىدىكى كېسەللىك ئالامەتلىرىنىڭ ئاساسلىق ئىپادىسى ئېغىز بوشلۇقىدىكى تەسۋىسىمان زەمبۇرۇغدىن يۇقۇملىنىشتىن كېلىپ چىقىدۇ، ئېغىز بوشلۇقىدا ئاق داغ پەيدا بولۇپ، ئۈستۈنكى تاڭلاي ۋە تىلدا كۆپ كۆرۈلىدۇ، بۇ ئەيدىز كېسەللىكىگە دىياگنوز قويۇشتىكى مۇھىم كۆرسەتكۈچلەرنىڭ بىرى. %11 ~ %96 ئەيدىز بىمارلىرىدا ئوخشىمىغان باسقۇچتا ئېغىز بوشلۇقىدا ئاق داغ پەيدا بولىدۇ، لېكىن نۇرغۇن كىشىلەر بۇنى ئېغىز بوشلۇقى يارىسى دەپ قارايدۇ.
ئىستاتىستىكىغا ئاساسلانغاندا، تەخمىنەن %25 ئەيدىز بىمارلىرىدا دەسلەپكى مەزگىلدە چىش ياللۇغلىنىش ئەھۋالى كۆرۈلىدۇ، ئاساسلىق ئىپادىسى چىش يىلتىزى ياللۇغلىنىش، شۇنىڭ بىلەن بىر ۋاقىتتا چىش يىلتىزى قاناش، ئاغرىش ۋە سېسىق پۇراش قاتارلىق كېسەللىك ئالامەتلىرى كۆرۈلىدۇ. ئۇنىڭدىن باشقا، ئۈستۈنكى تاڭلىيىدا مونەك پەيدا بولسا ئەيدىز كېسىلىدىن ئېھتىيات قىلىش كېرەك.
ئۈستۈنكى تاڭلىيىدا قىزىل، سۆسۈن ياكى سۇس كۆك رەڭلىك مونەكلەر پەيدا بولغاندا، ئەيدىز كېسەللىكىدىن ئېھتىيات قىلىش كېرەك. بۇ خىل ئۆسمە يەنە كاپوسى گۆش ئۆسمىسى دەپمۇ ئاتىلىدۇ، ئۇ نورمال كىشىلەردە ناھايىتى ئاز كۆرۈلىدۇ، لېكىن ئەيدىز بىمارلىرى ئارىسىدا ناھايىتى كۆپ ئۇچرايدۇ.
ئەيدىز كېسىلىنىڭ يۇقۇملانغاندىن تارتىپ كېسەل بولغۇچە بولغان ۋاقىتنىڭ ئۇزۇن-قىسقىلىقى ئوخشاش بولمايدۇ، قوزغالغاندا كۆرۈلىدىغان كېسەللىك ئالامەتلىرىمۇ ئوخشاش بولمايدۇ، ئەگەر بەدەندە بىئاراملىق كۆرۈلسە، ۋاقتىدا تەكشۈرتۈپ، بالدۇرراق داۋالاش ئەڭ مۇھىم!
مەنبە:
https://m.nur.cn/news/2023/12/18010929.shtml
