توۋتياۋ تورى خەۋىرى، نۇر تورى تەرجىمىسى:
ياز پەسلىدە تومۇز ئىسسىق يۇقىرى تېمپېراتۇرا كەلتۈرۈپ چىقارغان سەكتە «ئىسسىق سەكتە» دەپمۇ ئاتىلىدۇ، كۆپىنچىسى قان يېتىشمەسلىكتىن بولغان مېڭە سەكتىسىگە كىرىدۇ.
«ئىسسىق سەكتە»نىڭ پەيدا بولۇشى ياز كۈنلىرى كۆپ تەرلەش، بەدەندە سۇ كەمچىل بولۇش، قاننىڭ يېپىشقاقلىقى ئېشىپ كېتىش، قاننىڭ ئېقىشى ئاستىلاش، چوڭ مېڭىدىكى قاننىڭ ئېقىشى ئازلاش قاتارلىقلار بىلەن مۇناسىۋەتلىك.
ئىسسىق سەكتىنىڭ دەسلەپكى مەزگىلىدە ئاسانلا باش قېيىش، پۇت-قوللار ماغدۇرسىزلىنىش قاتارلىق ئىسسىق ئۆتۈپ قېلىش بىلەن ئىنتايىن ئوخشىشىپ كېتىدىغان كېسەللىك ئالامەتلىرى كۆرۈلىدۇ، شۇڭا نۇرغۇن كىشىلەر ئىسسىق سەكتىنى ئىسسىق ئۆتۈپ قېلىش دەپ خاتا ھۆكۈم قىلىپ، داۋالاش ۋاقتىغا تەسىر يەتكۈزىدۇ.
ئەمەلىيەتتە، ئىسسىق ئۆتۈپ قېلىش بىلەن سەكتە بولۇپ قېلىشنىڭ ئالامەتلىرىنى پەرقلەندۈرۈش ناھايىتى ئاسان:
ئىسسىق ئۆتۈپ قېلىش كۆپ ھاللاردا يۇقىرى تېمپېراتۇرىلىق مۇھىتتا يۈز بېرىدۇ، دائىم قىزىش، تومۇر سوقۇشى تېزلىشىش، ئەس-ھوشىنى يوقىتىش قاتارلىق ئالامەتلەر كۆرۈلىدۇ، لېكىن پۇت-قوللار يارتا پالەچلىنىش قاتارلىق ئالامەتلەر كۆرۈلمەيدۇ.
سەكتە ئۈچ يۇقىرى كېسەللىك بىمارلىرى ۋە ئۆزىدە ئاستا خاراكتېرلىك كېسەللىك بار ياشانغانلاردا ئاسان يۈز بېرىدۇ، مۇھىتنىڭ تەسىرىگە ئاز ئۇچرايدۇ.
سەكتە قوزغالغاندا باش قېيىپ، كۆز تورلىشىشتىن باشقا يەنە بەدەننىڭ يېرمى تۇيۇقسىز ئۇيۇشىدۇ، مەسىلەن، بىر تەرەپتىكى پۇت-قول تۇيۇقسىز ماغدۇرسىزلىنىش، بىر پۇتنى كۆتۈرەلمەسلىك ياكى چوكىنى تۇتالماسلىق قاتارلىقلار، يەنە تۇيۇقسىز تىل توسالغۇسى پەيدا بولۇشى مۇمكىن.
ئەگەر سەكتىنىڭ ئالاھىدىلىكىگە ماس كېلىدىغان ئالامەتلەر بايقالسا، جىددىي قۇتقۇزۇشقا تېلېفون قىلىپ ۋاقتىدا دوختۇرخانىغا ئاپىرىش، سەكتە يۈز بەرگەندىن كېيىنكى قۇتقۇزۇشنىڭ ئالتۇن ۋاقتىنى چىڭ تۇتۇش كېرەك.
مەنبە:
https://m.nur.cn/news/2023/12/17822046.shtml
