پۇت پېيى تارتىشىپ قېلىش كۈندىلىك تۇرمۇشتا كۆپ ئۇچرايدىغان، كىشىگە تۇيۇقسىز ۋە ئۆتكۈر ئاغرىق ئېلىپ كېلىدىغان بىر خىل فىزىئولوگىيەلىك ھادىسىدۇر. نۇرغۇن كىشىلەر كېچىسى تاتلىق ئۇيقۇدا ياتقاندا ياكى سىرتتا شىددەتلىك تەنھەرىكەت بىلەن شۇغۇللىنىۋاتقاندا، پۇت مۇسكۇللىرىنىڭ تۇيۇقسىز قاتتىق قىسقىراپ، كىشىنى قاتتىق ئاغرىقتىن ھەرىكەت قىلالمايدىغان ھالغا دۇچار قىلىپ قويىدۇ. بۇ ئەھۋال گەرچە كۆپىنچە قىسقا مۇددەتلىك بولسىمۇ، ئەمما ئۇنىڭ ئارقىسىدا بەدەننىڭ بىر يۈرۈش ئوزۇقلۇق يېتىشمەسلىك ياكى ساغلاملىق مەسىلىلىرى ھەققىدىكى سىگناللىرى يوشۇرۇنغان بولىدۇ.
پۇت پېيى تارتىشىپ قېلىشنىڭ ئاساسلىق سەۋەبلىرى
پۇت پېيى تارتىشىپ قېلىشنىڭ ئەڭ كۆپ كۆرۈلىدىغان سەۋەبلىرىنىڭ بىرى سوغۇقنىڭ غىدىقلىشىدۇر. بەدەن سوغۇق مۇھىتقا دۇچ كەلگەندە، مۇسكۇللار ئىسسىقلىقنى ساقلاش ئۈچۈن تەبىئىي ھالدا قىسقىرايدۇ. ئەگەر بۇ قىسقىرىش زىيادە كۈچلۈك بولسا، پۇت پېيى تارتىشىپ قېلىشنى كەلتۈرۈپ چىقىرىدۇ. بولۇپمۇ قىشلىق ئۇيقۇدا پۇتىنى ئوچۇق قويۇش ياكى سوغۇق سۇدا سۈزۈش بۇنىڭ تىپىك مىسالىدۇر.
يەنە بىر تەرەپتىن، زىيادە چارچاش ۋە تەنھەرىكەت مىقدارىنىڭ ئېشىپ كېتىشىمۇ مۇھىم ئامىلدۇر. ئۇزۇن ۋاقىت يۈگۈرۈش ياكى ئېغىر جىسمانىي ئەمگەكتىن كېيىن، مۇسكۇللاردا سۈت كىسلاتاسى يىغىلىپ قالىدۇ. بۇ كىسلاتا نېرۋا ئۇچلىرىنى غىدىقلاپ، مۇسكۇللارنىڭ ئۆزلۈكىدىن قىسقىرىشىنى كەلتۈرۈپ چىقىرىدۇ. بۇنىڭدىن باشقا، بەدەندە سۇ ۋە ئېلېكترولىت (مەسىلەن، ناترىي، كالىي ۋەيا ماگنىي) نىڭ يېتىشمەسلىكىمۇ مۇسكۇللارنىڭ نورمال خىزمەت قىلىشىغا توسالغۇ بولىدۇ.
تاماقتىكى ئوزۇقلۇق يېتىشمەسلىك، بولۇپمۇ كالتسىي كەملىكمۇ پۇت پېيى تارتىشىشنىڭ باش جىنايەتچىسىدۇر. كالتسىي ئىئونى مۇسكۇللارنىڭ قىسقىرىشى ۋە بوشىشىشىنى تەڭشەشتە ھالقىلىق رول ئوينايدۇ. قاندىكى كالتسىي مىقدارى تۆۋەنلەپ كەتكەندە، نېرۋا ۋە مۇسكۇللارنىڭ قوزغىلىشچانلىقى ئېشىپ، ئاسانلا تارتىشىپ قېلىش يۈز بېرىدۇ. بۇ ئەھۋال ئۆسۈپ يېتىلىۋاتقان ئۆسمۈرلەر، ھامىلىدار ئاياللار ۋە ياشانغانلاردا تېخىمۇ كۆپ كۆرۈلىدۇ.
يوشۇرۇن كېسەللىك ئامىللىرىغا سەل قارىماڭ
ئەگەر پۇت پېيى تارتىشىش دائىم ۋە سەۋەبسىز تەكرارلانسا، بۇ بەزى سوزۇلما خاراكتېرلىك كېسەللىكلەرنىڭ ئالامىتى بولۇشى مۇمكىن. مەسىلەن، بەل ئومۇرتقا ئارىلىق تەخسىسى پۇلتىيىپ چىققان بىمارلاردا، نېرۋا يىلتىزى بېسىلىپ قالغاچقا پۇت مۇسكۇللىرىنىڭ نېرۋا سىگنالى قالايمىقانلىشىپ، پېيى تارتىشىپ قالىدۇ. شۇنداقلا، تۆۋەنكى مۈچە ئارتېرىيە قېتىشىش كېسىلى بارلاردا قان ئايلىنىش ياخشى بولمىغاچقا، مۇسكۇللار يېتەرلىك ئوكسىگېن ۋە ئوزۇقلۇققا ئېرىشەلمەي، تۇيۇقسىز تارتىشىپ قالىدۇ. دىيابېت ۋە پاركىنسون كېسىلىمۇ نېرۋا سىستېمىسىغا تەسىر كۆرسىتىش ئارقىلىق مۇشۇنداق ئالامەتلەرنى پەيدا قىلالايدۇ.
پۇت پېيى تارتىشىپ قالغاندا جىددىي بىر تەرەپ قىلىش ئۇسۇللىرى
ئاغرىق تۇيۇقسىز قوزغالغاندا، ئالدىراپ ۋەھىمىگە چۈشمەي، تۆۋەندىكى ئۇسۇللارنى قوللىنىش ئارقىلىق ئاغرىقنى تېز سۈرئەتتە پەسەيتىش مۇمكىن:
- ھەرىكەتنى دەرھال توختىتىپ، پېيى تارتىشىپ قالغان پۇتنى تۈز سۇنۇش، ئاندىن قول بىلەن پۇت بارماقلىرىنى ئۆزى تەرەپكە (تىز تەرەپكە) ئىگىپ بىر مەزگىل تۇتۇپ تۇرۇش، بۇ مۇسكۇلنى سىلكىپ سوزۇپ بوشاشتۇرۇشقا ياردەم بېرىدۇ.
- شۇنىڭ بىلەن بىر ۋاقىتتا، تارتىشىپ قالغان ئورۇننى ئاستا ۋە رېتىملىق ئۇۋۇلاپ بېرىش قان ئايلىنىشنى ياخشىلايدۇ. چىڭ ئۇۋىلىغاندا مۇسكۇل ۋە نېرۋىغا تېخىمۇ بېسىم بېرىپ ئاغرىقنى كۈچەيتىۋېتىدۇ.
- ئەگەر ئەھۋال يول قويدىغان بولسا، ئىسسىق لۆڭگە بىلەن ئىسسىق ئۆتكۈزۈش ياكى پۇتنى ئىسسىق ساقلاشمۇ مۇسكۇللارنىڭ تېز ئەسلىگە كېلىشىگە ياردەم بېرىدۇ.
ئالدىنى ئېلىش ۋە كۈندىلىك پەرۋىش تەۋسىيەلىرى
پۇت پېيى تارتىشىشنىڭ ئالدىنى ئېلىش ئۈچۈن، كۈندىلىك تۇرمۇشتا ئوزۇقلۇق ۋە تۇرمۇش ئادىتىنى تەڭشەش كېرەك. تاماقتىكى كالتسىي مىقدارىنى ئاشۇرۇش ئۈچۈن سۈت، پۇرچاق مەھسۇلاتلىرى، بېلىق، تۇخۇم ۋە كۆكتاتلارنى كۆپ يەپ بېرىش تەۋسىيە قىلىنىدۇ. ئەگەر كالتسىي كەملىك ئېغىر بولسا، دوختۇرنىڭ كۆرسەتمىسى بىلەن كالتسىي تابلىتى، ۋىتامىن D ۋەيا قوشۇمچە ماگنى Mg تولۇقلاش كېرەك. كېچىدە پەي تارتىشىش ئەھۋاللىرى بەك كۆپ كۆرۈلسە قان تەكشۈرتۈپ بېقىش تەۋسىيە قىلىنىدۇ.
تەنھەرىكەت بىلەن شۇغۇللىنىشتىن بۇرۇن چوقۇم بەدەننى قىزىتىش ۋە سوزۇش ھەرىكەتلىرىنى تولۇق ئىشلەش، تەنھەرىكەت جەريانىدا ۋە ئۇنىڭدىن كېيىن يېتەرلىك سۇ تولۇقلاشقا دىققەت قىلىش لازىم. كېچىسى ئۇخلىغاندا پۇتنى ئىسسىق تۇتۇش، سوغۇق ئۆتۈپ كېتىشتىن ساقلىنىش سوزۇلما تارتىشىشلارنى ئازايتىدۇ. ئەگەر يۇقىرىقى تەدبىرلەرنى قوللانسىمۇ پۇت پېيى تارتىشىش يەنىلا قايتا-قايتا قوزغىلىپ، كىشىنىڭ نورمال تۇرمۇشىغا تەسىر كۆرسەتسە، چوقۇم دوختۇرخانىغا بېرىپ، يوشۇرۇن كېسەللىك ئامىللىرىنى تەكشۈرتۈش زۆرۈردۇر.
