ئانا سۈتى بوۋاقلار ئۈچۈن ئەڭ ياخشى ئوزۇقلۇق مەنبەسى بولسىمۇ، بەزىدە ھەر خىل سەۋەبلەر تۈپەيلى (ئانىنىڭ سالامەتلىكى ۋەيا كېسەللىك ، سۈت يېتىشمەسلىك ياكى شەخسىي تاللاش قاتارلىق)، سۈت پاراشوكى (formula) بىلەن بېقىش زۆرۈر ياكى ئەڭ مۇۋاپىق تاللاش بولۇپ قالىدۇ. ئەگەر سىز سۈت پاراشوكى بىلەن بېقىشنى قارار قىلغان بولسىڭىز، ئۆزىڭىزنى ئەيىبلىمەڭ ياكى خاتالىق قىلدىم دەپ ئويلىماڭ. ئەڭ مۇھىمى، بوۋىقىڭىزنىڭ سالامەتلىكى ۋە خۇشاللىقىدۇر.
زامانىۋى سۈت پاراشوكلىرى ئانا سۈتىنىڭ تەركىبىنى تەقلىد قىلىپ ئىشلەنگەن بولۇپ، بوۋاقنىڭ ساغلام ئۆسۈپ-يېتىلىشى ئۈچۈن كېرەكلىك بارلىق ئوزۇقلۇقلارنى تەمىنلەيدۇ. بۇ ماقالە سىزگە توغرا سۈت پاراشوكىنى تاللاش، ئۇنى بىخەتەر ئۇسۇلدا تەييارلاش ۋە بېقىش جەريانىنى مېھىر-مۇھەببەتلىك بىر پائالىيەتكە ئايلاندۇرۇشتا قەدەممۇ-قەدەم ياردەم بېرىدۇ.
1. قەدەم: توغرا سۈت پاراشوكىنى قانداق تاللاش كېرەك؟
بازاردا سۈت پاراشوكىنىڭ تۈرلىرى ناھايىتى كۆپ بولغاچقا، يېڭى ئاتا-انىلار ئۈچۈن تاللاش قىيىنغا توختايدۇ. كۆپىنچە سۈت پاراشوكلىرىنىڭ ئوزۇقلۇق تەركىبى ئوخشىشىپ كېتىدۇ، چۈنكى ئۇلار دۆلەتنىڭ قاتتىق ئۆلچىمىگە ئاساسەن ئىشلەپچىقىرىلىدۇ.
ئاساسلىق تۈرلىرى:
- كالا سۈتى ئاساسىدىكى سۈت پاراشوكى : بۇ ئەڭ كۆپ ئۇچرايدىغان تۈرى بولۇپ، كۆپىنچە بوۋاقلارغا ماس كېلىدۇ. كالا سۈتىدىكى ئاقسىل بوۋاقلارنىڭ ھەزىم قىلىشىغا ئاسان بولسۇن ئۈچۈن ئالاھىدە بىر تەرەپ قىلىنغان بولىدۇ.
- پۇرچاق ئاساسىدىكى سۈت پاراشوكى: ئەگەر بالىڭىزدا كالا سۈتى ئاقسىلىغا قارىتا سەزگۈرلۈك ياكى ئاللېرگىيە بولسا، دوختۇرنىڭ تەۋسىيەسى بىلەن بۇ تۈرنى تاللىسىڭىز بولىدۇ.
- ئاللېرگىيەگە قارشى سۈت پاراشوكى : ئېغىر دەرىجىدىكى ئاللېرگىيەسى ياكى ھەزىم قىلىش مەسىلىسى بار بوۋاقلار ئۈچۈن لايىھەلەنگەن. بۇلارنىڭ باھاسى ئادەتتە قىممەترەك بولىدۇ.
تاللاشتا دىققەت قىلىدىغان نۇقتىلار:
- دوختۇر بىلەن مەسلىھەتلىشىڭ: سۈت پاراشوكى تاللاشتىن بۇرۇن، چوقۇم بالىلار دوختۇرى ياكى ئائىلە دوختۇرىڭىزدىن مەسلىھەتلىشىڭ. ئۇلار بالىڭىزنىڭ ئالاھىدە ئېھتىياجىغا ئاساسەن ئەڭ مۇۋاپىق تۈرنى تەۋسىيە قىلىدۇ.
- تۆمۈر تەركىبىگە دىققەت قىلىڭ: كۆپىنچە دوختۇرلار تۆمۈر بىلەن كۈچەيتىلگەن سۈت پاراشوكىنى تەۋسىيە قىلىدۇ، چۈنكى تۆمۈر مېڭە تەرەققىياتى ئۈچۈن ئىنتايىن مۇھىم.
- ماركىسى مۇھىم ئەمەس: قىممەت ماركىلار بىلەن ئادەتتىكى ماركىلارنىڭ ئوزۇقلۇق قىممىتىدە چوڭ پەرقى بولمايدۇ. ئەڭ مۇھىمى، بالىڭىزغا ياققان ۋە ھەزىم قىلالايدىغان سۈت پاراشوكىنى تاللاش.
2. قەدەم: سۈت پاراشوكىنى بىخەتەر تەييارلاش
بوۋاقنىڭ ئىممۇنىتېت سىستېمىسى تېخى يېتىلمىگەچكە، سۈت پاراشوكىنى تەييارلىغاندا پاكىزلىق ۋە بىخەتەرلىككە ئالاھىدە دىققەت قىلىش كېرەك.
تەييارلاش جەريانى:
- قولىڭىزنى يۇيۇڭ: سۈت تەييارلاشتىن بۇرۇن، قولىڭىزنى سوپۇن بىلەن كەم دېگەندە 20 سېكۇنت يۇيۇڭ.
- بوتۇلكا ۋە ئەسۋابلارنى دېزىنفېكسىيە قىلىڭ: تۇنجى قېتىم ئىشلىتىشتىن بۇرۇن، سۈت بوتۇلكىسى، ئەمزىك قىسمى ۋە باشقا ئەسۋابلارنى قايناق سۇدا 5 مىنۇت قاينىتىپ دېزىنفېكسىيە قىلىڭ. كېيىنچە ھەر قېتىم ئىشلىتىپ بولغاندىن كېيىن ئىسسىق سۇدا مەخسۇس سوپۇنى بىلەن يۇيۇپ، پاكىز سۇدا چايقاپ، ھاۋادا قۇرۇتسىڭىز بولىدۇ.
- سۇنى قاينىتىڭ: سۈت ئارىلاشتۇرىدىغان سۇنى چوقۇم قاينىتىپ، ئاندىن تەخمىنەن 37°C (بېلىكىڭىزگە تامچىلاتقاندا ئىسسىق ھېس قىلىنمايدىغان دەرىجىدە) غىچە سوۋۇتۇڭ. بۇ سۇدىكى ۋە سۈت پاراشوكىدىكى يوشۇرۇن باكتېرىيەلارنى ئۆلتۈرۈشكە ياردەم بېرىدۇ.
- كۆرسەتمە بويىچە ئارىلاشتۇرۇڭ: سۈت پاراشوكى قۇتىسىدىكى كۆرسەتمىنى ئەستايىدىل ئوقۇڭ. ئاۋۋال بوتۇلكىغا كېرەكلىك مىقداردىكى سۇنى قۇيۇڭ، ئاندىن قۇتا بىلەن بىللە كەلگەن ئۆلچەملىك قوشۇق بىلەن سۈت پاراشوكىنى ئېلىپ، ئارتۇقچىسىنى سىپىرىۋېتىپ، سۇغا قوشۇڭ.
- سۇ ۋە پاراشوكنىڭ نىسبىتىنى ئۆز بېشىمچىلىق بىلەن ئۆزگەرتمەڭ! سۈتنى بەك سۇيۇق قىلىۋەتسە، بالىغا ئوزۇقلۇق يەتمەيدۇ؛ بەك قويۇق قىلىۋەتسە، بوۋاقنىڭ بۆرىكىگە يۈك بولىدۇ ۋە قەۋزىيەتكە سەۋەب بولىدۇ.
- ياخشى چايقاڭ: بوتۇلكىنىڭ ئاغزىنى ئېتىپ، پاراشوك تولۇق ئېرىپ كەتكىچە ياخشى چايقاڭ.
3. قەدەم: ئەمدۈرۈش ئۇسۇللىرى
سۈت پاراشوكى بېرىش پەقەت قورساق تويغۇزۇش پائالىيىتى ئەمەس، ئۇ يەنە ئانا (ياكى دادا) ۋە بالا ئوتتۇرىسىدىكى ھېسسىيات باغلىنىشىنى كۈچەيتىدىغان ئالتۇن پۇرسەتتۇر.
- راھەت ئورۇن تېپىڭ: بوۋاقنى قۇچىقىڭىزغا ئېلىپ، بېشىنى بەدىنىدىن سەل ئېگىز تۇتۇڭ. ھەرگىز بوۋاقنى ياتقۇزۇپ قويۇپ، بوتۇلكىنى بىر نەرسىگە يۆلەپ قويۇپ ئېمىتمەڭ. بۇ تۇنجۇقۇش ۋە قۇلاق ياللۇغى خەۋپىنى ئاشۇرىدۇ.
- تېرە-تېرىگە ئۇچرىشىشنى سىناپ بېقىڭ: بالىنى يالىڭاچ ھالەتتە ئۆزىڭىزنىڭ كۆكرىكىگە ياتقۇزۇپ بېقىڭ. بۇ ئۇنىڭغا بىخەتەرلىك ۋە ئىللىقلىق تۇيغۇسى بېرىدۇ.
- كۆز ئالاقىسى قىلىڭ: بېقىش جەريانىدا بالىڭىزنىڭ كۆزىگە مېھىر بىلەن قاراڭ، ئۇنىڭغا يۇمشاقلىق بىلەن سۆزلەڭ.
- بوتۇلكىنى توغرا تۇتۇڭ: بوتۇلكىنى سەل قىيسايتىپ تۇتۇپ، ئەمچۈك قىسمىنىڭ ھەمىشە سۈت بىلەن تولۇپ تۇرۇشىغا كاپالەتلىك قىلىڭ. بۇ بوۋاقنىڭ ھاۋا يۇتۇۋېلىشىنىڭ ئالدىنى ئالىدۇ.
- كېكىردىتىشنى ئۇنۇتماڭ! : بېقىش جەريانىدا ۋە بېقىپ بولغاندىن كېيىن، بوۋاقنى تىك تۇتۇپ، دۈمبىسىگە يېنىك شاپىلاقلاپ كېكىردىتىڭ.
- قالغان سۈتنى تۆكىۋېتىڭ: بوۋاق بىر قېتىمدا ئىچىپ بولالمىغان سۈتنى ساقلاپ قويماي، چوقۇم تۆكىۋېتىڭ. چۈنكى بالىنىڭ شۆلگىيى تەگكەن سۈتتە باكتېرىيە تېز كۆپىيىدۇ.
سۈت پاراشوكى بىلەن بېقىش ئانا سۈتى بېرەلمىگەن ياكى بەرمەسلىكنى تاللىغان ئانىلار ئۈچۈن بىخەتەر ۋە ساغلام بىر تاللاشتۇر. مۇھىمى، سىز بالىڭىزنى سۆيۈپ، ئۇنىڭغا كۆڭۈل بۆلۈپ، ئۇنىڭ ئېھتىياجلىرىغا جاۋاب قايتۇرۇۋاتىسىز. توغرا سۈت پاراشوكىنى تاللاپ، ئۇنى بىخەتەر ئۇسۇلدا تەييارلاپ، ھەر بىر بېقىش پەيتىنى مېھىر-مۇھەببەتكە تولدۇرغاندا، سىز بوۋىقىڭىزنىڭ ساغلام ۋە خۇشال ئۆسۈپ-يېتىلىشى ئۈچۈن ئەڭ ياخشى ئاساسنى يارىتىپ بەرگەن بولىسىز.
، سۈت پاراشوكى (formula) بىلەن بېقىش زۆرۈر ياكى ئەڭ مۇۋاپىق تاللاش بولۇپ قالىدۇ. ئەگەر سىز سۈت پاراشوكى بىلەن بېقىشنى قارار قىلغان بولسىڭىز، ئۆزىڭىزنى ئەيىبلىمەڭ ياكى خاتالىق قىلدىم دەپ ئويلىماڭ. ئەڭ مۇھىمى، بوۋىقىڭىزنىڭ سالامەتلىكى ۋە خۇشاللىقىدۇر.){kind=link}