ئۇيغۇر ھامىلىدار بەش كېزەك تۇغدى

60 مىليوندا بىر كۆرۈلىدىغان ھاياتلىق مۆجىزىسى: ئۇيغۇر ھامىلىدار ۋۇخەندە بەش كېزەك پەرزەنتلىك بولدى

2026-يىلى 2-ئاينىڭ 26-كۈنى، ھاياتلىق تارىخىدىكى ئىنتايىن ئاز ئۇچرايدىغان بىر تېببىي مۆجىزە ۋۇخەن ئۇنىۋېرسىتېتى جۇڭنەن دوختۇرخانىسىدا يۈز بەردى. 24 ياشلىق ئۇيغۇر ھامىلىدار 20 دىن ئارتۇق تېببىي خادىمنىڭ بىرلىكتە تىرىشىشى نەتىجىسىدە ، بىر ئوغۇل، تۆت قىز بولۇپ جەمئىي بەش بوۋاقنى ساق-سالامەت دۇنياغا كەلتۈردى. بۇ ۋەقە پەقەت بىر ئائىلىنىڭ خۇشاللىقىلا بولۇپ قالماستىن، بەلكى تەبىئىي ھامىلىدار بولۇش نىسبىتى 60 مىليوندا بىرلا قېتىم كۆرۈلىدىغان دۇنياۋى تېببىي مۆجىزە دەپ باھالاندى.

مۆجىزىنىڭ باشلىنىشى: ئۈمىدسىزلىكتىن كەلگەن بەخت

دىل خانىم (ئۆزگەرتىلگەن ئىسىم) ھامىلىدار بولۇش يولى ئوڭۇشلۇق بولمىغان. ئۇ «كۆپ خالتىلىق تۇخۇمدان ياللۇغى» (PCOS) كېسىلىگە گىرىپتار بولغاچقا، ھامىلىدار بولۇش ئېھتىماللىقى ئىنتايىن تۆۋەن، شۇنداقلا بويدىن ئاجراپ كېتىش خەۋپى ئىنتايىن يۇقىرى ئىدى. لېكىن، ئۆتكەن يىلى 8-ئايدا ئۇ تۇيۇقسىزلا تەبىئىي ھامىلىدار بولغانلىقىنى بىلگەن. تەكشۈرۈش نەتىجىسى پۈتۈن ئائىلىنى ھەم ھاياجانغا، ھەم جىددىيچىلىككە سالدى — ئۇنىڭ قورسىقىدىكى بىرلا ئەمەس، بەلكى بەش جان ئىدى!

كۆپ پېزەنتلىك ھامىلىدارلىق داۋالاش ساھەسىدە «يۇقىرى خەۋپلىك ھامىلىدارلىق» دەپ قارىلىدۇ. ئانىدىن كۆپ مىقداردا قان چىقىپ كېتىش، بوۋاقلار بالدۇر تۇغۇلۇپ كېتىش ياكى ھاياتىغا خەۋپ يېتىشتەك ئېغىر خەتەرلىك ئەھۋاللارغا دۇچ كېلىدۇ. دىل خانىم توردا ئىزدىنىش جەريانىدا، ۋۇخەن ئۇنىۋېرسىتېتى جۇڭنەن دوختۇرخانىسىنىڭ كۆپ پېزەنتلىك تۇغۇتلارنى بىر تەرەپ قىلىشتا مول تەجرىبىگە ئىگە ئىكەنلىكىنى بىلىپ، مىڭ چاقىرىم يول يۈرۈپ ئۇيغۇر ئېلىدىن ۋۇخەنگە داۋالىنىشقا كەلگەن.

مىڭ چاقىرىم يول ۋە قارار

دوختۇرخانىنىڭ تۇغۇت بۆلۈمى مەسئۇلى لى جيافۇ (Li Jiafu) دوختۇر 40 يىللىق تېببىي ھاياتىدا تۇنجى قېتىم بەش پېزەنتلىك تۇغۇتقا يېتەكچىلىك قىلىشى ئىدى. دوختۇر باشتا خەۋپنى ئازايتىش ئۈچۈن ھامىلىنى ئازايتىش تەۋسىيە قىلىنغان بولسىمۇ، دىل ۋە ئۇنىڭ يولدىشى ھەر بىر ھاياتلىقنىڭ قىممەتلىك ئىكەنلىكىنى ئويلىشىپ، بەش بوۋاقنى تەڭ ساقلاپ قېلىشنى قارار قىلدى.

دوختۇرخانا دىل ئۈچۈن مەخسۇس تۇغۇت بۆلۈمى، يېڭى تۇغۇلغان بوۋاقلار بۆلۈمى، ناركوز بۆلۈمى ۋە ئۇلترا ئاۋازدولقۇنى تەكشۈرۈش بۆلۈمىدىن تەركىب تاپقان «مۇھاپىزەت گۇرۇپپىسى» قۇردى. دىل يۇرتىغا قايتقان مەزگىلدىمۇ، ۋۇخەندىكى مۇتەخەسسىسلەر تور ئارقىلىق ئۇنىڭ ساغلاملىق ئەھۋالىنى ھەر كۈنى كۆزىتىپ تۇردى. بۇ جەرياندا ھېچقانداق ئەگەشمە كېسەللىكنىڭ كۆرۈلمەسلىكى تېببىي جەھەتتىن بىر ئۇتۇق ھېسابلاندى.

بەش كېزەك بوۋاقلار تۇغۇلدى

2-ئاينىڭ 25-كۈنى كېچىدە، دىل خانىمنىڭ ھامىلە سۈيى تۇيۇقسىز بالدۇر كەلدى. دوختۇرخانا دەرھال جىددىي تۇغۇت پىلانىنى باشلاتتى. 15 مىنۇت ئىچىدە 20 دىن ئارتۇق تىببىي خادىم ئوپېراتسىيەخانىغا يىغىلدى. 26-كۈنى سەھەر سائەت 2 ئەتراپىدا ئوپېراتسىيە باشلاندى. ناركوز دوختۇرلىرى ئانىنىڭ ھاياتىي ئالامەتلىرىنى كۆزىتىپ تۇرسا، لى جيافۇ باشچىلىقىدىكى تۇغۇت گۇرۇپپىسى بەش بوۋاقنى بىر-بىرلەپ دۇنياغا ئېلىپ كەلدى.

• تۇغۇلغان بوۋاقلارنىڭ ئېغىرلىقى:
  • بىرىنچى بوۋاق (ئوغۇل): 990 گرام
  • ئىككىنچى بوۋاق (قىز): 1020 گرام
  • ئۈچىنچى بوۋاق (قىز): 970 گرام
  • تۆتىنچى بوۋاق (قىز): 1030 گرام
  • بەشىنچى بوۋاق (قىز): 870 گرام

بۇ بوۋاقلارنىڭ ھەممىسىنىڭ ساغلاملىق نومۇرى (Apgar score) 6 تىن يۇقىرى بولغان بولۇپ، بۇنداق ئىنتايىن بالدۇر تۇغۇلغان، ئېغىرلىقى ئىنتايىن تۆۋەن بوۋاقلار ئۈچۈن ئېيتقاندا، تېببىي مۆجىزە ھېسابلىنىدۇ. ئانىنىڭ تۇغۇتتىن كېيىن كۆپ قان يوقىتىشىنىڭ ئالدىنى ئېلىش ئۈچۈن، دوختۇرلار «ئۆز قاننى قايتۇرۇپ بېرىش» (Autologous blood transfusion) تېخنىكىسىنى قوللىنىپ، ئوپېراتسىيەنى بىر سائەت ئىچىدە غەلىبىلىك تاماملىدى.

تېببىي تەتقىقات ۋە كۆپ پەرزەنتلىك تۇغۇتنىڭ خىرىسى

تەتقىقاتلاردىن ئايان بولۇشىچە، كۆپ پەرزەنتلىك ھامىلىدارلىقتا ئانا تېنىدىكى قورساقتىكى بېسىم نورمالدىن نەچچە ھەسسە يۇقىرى بولىدۇ، بۇ يۈرەك ۋە ئۆپكە ئىقتىدارىغا زور يۈك ئېلىپ كېلىدۇ. خەلقئارالىق تېببىي ژۇرناللاردا ئېلان قىلىنغان ئەڭ يېڭى سانلىق مەلۇماتلاردا كۆرسىتىلىشىچە، بەش پېزەنتلىك تۇغۇتتا بوۋاقلارنىڭ ھەممىسىنىڭ ياشاپ قېلىش نىسبىتى دوختۇرخانىنىڭ NICU (يېڭى تۇغۇلغان بوۋاقلار جىددىي قۇتقۇزۇش بۆلۈمى) نىڭ سەۋىيەسىگە بىۋاسىتە باغلىق ئىكەن.

ھازىر دىل خانىم بالنىسىتقا يۆتكەلدى، بەش بوۋاق بولسا مەخسۇس كۆزىتىش ئاستىدا تۇرۇۋاتىدۇ.