توۋتياۋ تورى خەۋىرى، نۇر تورى تەرجىمىسى:
گەرچە كەيپىياتى چۈشكۈنلىشىش، كۈنبويى بىئارام بولۇش خامۇشلۇق كېسىلىنىڭ ئەڭ تىپىك ئالامىتى بولسىمۇ، ئەمما بۇلار پەقەت سىرتقى كۆرۈنۈشلا خالاس. خامۇشلۇق كېسىلى ئادەمنىڭ كەيپىياتى بۇزۇپلا قالماي، يەنە ئادەمدە باشقا نورمالسىزلىقنىمۇ پەيدا قىلىدۇ، بۇ كېسەلنىڭ قانداقلىقىنى پەقەت خامۇشلۇق كېسىلىگە گىرىپتار بولغان ئادەملەرلا بىلىدۇ. خامۇشلۇق كېسىلىگە گىرىپتار بولغانلاردا يەنە تۆۋەندىكىدەك ئالامەتلەر كۆرۈلىدۇ.
1. ئۆزىنى كەمسىتىش. ئۆزىنى ھېچقانداق ئىشنى ياخشى قىلالمايدىغاندەك ھېس قىلىدۇ، تۇرمۇش ۋە خىزمەتتە ئازراق خاتالىق ئۆتكۈزسىلا بارلىق مەسئۇلىيەتنى ئۆزىدىن كۆرۈپ، ئۆزىنى ھېچقانداق مەۋجۇتلۇق قىممىتى يوقتەك، ھېچقانداق ئىشنى ياخشى قىلالمايدىغاندەك ھىس قىلىپ، ئۆزىگە بولغان باھاسى بارغانسېرى تۆۋەنلەيدۇ. ئۆزىنى ئۆزى كەمسىتىپ، ئۆزىگە بولغان ئىشەنچىسىنى يوقىتىدۇ.
2. ھەمىشە ئۇخلىيالماسلىق، كۆپ چۈش كۆرۈش. ئاندا-ساندا ئۇخلىيالماسلىق يېقىنقىدىن بۇيان خىزمەت بېسىمى ئېغىر بولۇپ، روھىي جەھەتتىن زىيادە جىددىيلەشكەنلىك ياكى يېمەك-ئىچمەك مۇۋاپىق بولماسلىقتىن كېلىپ چىقىدۇ، ۋاقتىدا تەڭشىسە ئۇخلىيالماسلىق، كۆپ چۈش كۆرۈش ئەھۋالى ياخشىلىنىدۇ. بىراق خامۇشلۇق كېسىلىگە گىرىپتار بولغانلارنىڭ كەيپىياتى ئۇزاق مەزگىل چۈشكۈنلىشىدۇ، يوقىلاڭ خىياللارنى تولا قىلىدۇ، بۇ ئەھۋال ئۇلارنىڭ ئۇيقۇسىغا زور تەسىر كۆرسىتىدۇ، ئۇلارنىڭ نورمال ھالەتكە قايتىشى ئىنتايىن تەس.
3. چوڭ مېڭە ۋە ھەرىكەت ئىقتىدارى ئاستىلاش. باشقىلار بىلەن پىكىر ئالماشتۇرغاندا، تاغدىن سورىسا باغدىن جاۋاب بېرىدۇ، خۇددى خىيال سۈرۈپ بىر ئۈس ئۈستىدە ئويلىنىۋاتقاندەك كىچىكىپ ئىنكاس قايتۇرىدۇ، ئويلىغانلىرىنى تولۇق ئىپادىلىيەلمەيدۇ، ھەتتا باشقىلار بىلەن پىكىر ئالماشتۇرۇشنى خالىمايدىغان بولۇپ قالىدۇ. ئادەتتە ئىش قىلغاندىمۇ ناھايىتى سۆرەلمىلىك قىلىدۇ.
4. ئۆلۈۋېلىش ئىستىكى پەيدا بولىدۇ. تۇرمۇشنىڭ ھېچقانداق ئەھمىيىتى قالمىغاندەك، ئۆزىنىڭ مەۋجۇتلۇق قىممىتى يوقتەك ئويغا كېلىپ قالغاندا ئۆلۈۋېلىش ئىستىكى پەيدا بولىدۇ. بۇنداق چاغدا ئىلگىرى ئىنتايىن قىزىقىدىغان نەرسىلەرمۇ ئۇنىڭ قىزىقىشىنى قوزغىيالمايدۇ، بۇ ھالەت كېسەللىك ئەھۋالىنىڭ ئىنتايىن ئېغىرلىقىنى چۈشەندۈرىدۇ.
مەنبە:
https://m.nur.cn/news/2023/12/17910980.shtml
