توۋتياۋ تورى خەۋىرى، نۇر تورى تەرجىمىسى:
ئۇخلىغاندا نەپەس ۋاقىتلىق توختاپ قېلىش يىغىندى كېسەللىك ئالامىتى بۆرەكنىڭ زەخىملىنىشى بىلەن مۇناسىۋەتلىك، خورەك تارتىشتا ئوكسىگېن يېتىشمىسە يۇقىرى قان بېسىمنى كەلتۈرۈپ چىقىرىدۇ، يۇقىرى قان بېسىم يۈرەك، مېڭە قان تومۇرلىرىنىڭ ئارتېرىيە قېتىشىنى كەلتۈرۈپ چىقىرىپلا قالماي، يەنە بۆرەك ئارتېرىيە قېتىشىنى كەلتۈرۈپ چىقىرىدۇ. شۇنىڭ بىلەن بىر ۋاقىتتا، يۇقىرى قان بېسىم كىسلاتالىق ماددا ئالمىشىش ھاسىلاتلىرىنى ئاشۇرۇپ، بۆرەككە تەسىر يەتكۈزىدۇ ياكى بۆرەكنىڭ يۈكىنى ئېغىرلاشتۇرۇۋېتىدۇ، مۇشۇ نۇقتىدىن قارىغاندا بۆرەككە زىيان يەتكۈزىدۇ.
1. ئۇيقۇ يېتەرلىك بولماسلىق، زېھنىي كۈچى ئاجىزلىقنى كەلتۈرۈپ چىقىرىدۇ
خورەك ئادەمنىڭ نورمال ئۇخلاش قۇرۇلمىسىغا دەخلى قىلىپ، ئۇخلاش جەريانىدا تولا ئويغىنىشنى كەلتۈرۈپ چىقىرىپ، كۆپ مىقداردا «ساختا ئۇيقۇ» پەيدا قىلىدۇ. ئۇيقۇ قۇرۇلمىسىنىڭ ئۆزگىرىشى فىزىيولوگىيەلىك جەرياننى قالايمىقانلاشتۇرۇپ، كۈندۈزى مۈگدەش، دىققىتىنى يىغالماسلىق، ئەستە تۇتۇش قابىلىيىتى تۆۋەنلەش، خىزمەت ئۈنۈمى تۆۋەن بولۇش قاتارلىق بىر قاتار مەسىلىلەرنى كەلتۈرۈپ چىقىرىدۇ.
2. يۇقىرى قان بېسىمى، دىئابېت كېسىلىنى پەيدا قىلىدۇ ياكى ئېغىرلاشتۇرىۋېتىدۇ
ئېغىر دەرىجىدە خورەك تارتىش ئۇيقۇ جەريانىدا نەپەس ۋاقىتلىق توختاپ ياكى ھاۋا ئېقىمى ئازلاپ، قان تومۇر دىۋارىنى زەخىملەندۈرۈپ، قان تومۇرنىڭ ئېلاستىكىلىقىنى تۆۋەنلىتىپ، يۇقىرى قان بېسىمنى كەلتۈرۈپ چىقىرىدۇ ياكى ئېغىرلاشتۇرۇۋېتىدۇ.
خورەك يەنە ئىنسۇلىنغا قارشىلىق كۆرسىتىپ، بەدەندىكى قەنت مېتابولىزمى قالايمىقانلىشىپ، دىئابېت كېسەللىكىنى كەلتۈرۈپ چىقىرىدۇ.
3. يۈرەك مۇسكۇل تىقىلمىسى، مېڭە قان تومۇر توسۇلۇش خەۋىپىنى ئاشۇرىۋېتىدۇ
خورەك تارتقاندا نەپەس قايتا-قايتا توختاپ قالسا، بىۋاسىتە ئاقىۋىتى قاندىكى قىزىل قان ھۈجەيرىلىرىنىڭ سانى كۆپىيىپ، قان تومۇرلارنىڭ توسۇلۇش نىسبىتىنى ئاشۇرۇۋېتىدۇ. كۆپ قېتىم ئوكسىگېن يېتىشمىگەندە، قان تومۇردا قان نوكچىسى ھاسىل بولۇش خەۋپى ئېشىپ كېتىدۇ، قان نوكچىسى بولسا، ئاسانلا جانغا زامىن بولىدىغان يۈرەك تىقىلمىسى، مېڭە تىقىلمىسى ۋە ئۆپكە تىقىلمىسى پەيدا بولىدۇ.
4. يامان سۈپەتلىك ئۆسمىدە ئۆلۈش نىسبىتى ئاشىدۇ
خورەك تارتىشتىن كېلىپ چىققان قايتا-قايتا ئوكسىگېن يېتىشمەسلىك گېننىڭ تۇيۇقسىز ئۆزگىرىشى ۋە ھۈجەيرىنىڭ ئۆسۈش ئۇسۇلىدا ئۆزگىرىش پەيدا قىلىپ، يامان سۈپەتلىك ئۆسمىنى پەيدا قىلىدۇ ھەمدە ئۆسمىنىڭ ئۆسۈش سۈرئىتىنى تېزلىتىدۇ.
چەتئەلدىكى بىر تۈرلۈك 22 يىل كۆزىتىلگەن تەتقىقاتتا ئىسپاتلىنىشىچە، ئېغىر دەرىجىدىكى خورەك (ئۇخلىغاندا نەپەس ۋاقىتلىق توختاش يىغىندى كېسەللىك ئالامىتى) بىمارلىرىنىڭ يامان سۈپەتلىك ئۆسمە بىلەن ئۆلۈش نىسبىتى نورمال كىشىلەرنىڭكىدىن 4.8 ھەسسە يۇقىرى بولىدىكەن.
5. ئوكسىگېن يېتىشمەسلىك پۈتۈن بەدەنگە زىيان ئېلىپ كېلىدۇ
خورەك پۈتۈن بەدەندىكى ئەزالارغا ئوكسىگېن يېتىشمەسلىكنى كەلتۈرۈپ چىقىرىدۇ، ھەر قانداق بىر ھۈجەيرىگە ئوكسىگېن يېتىشمىسە زىيان پەيدا قىلىدۇ.
يۇقىرىدا بايان قىلىنغان خەۋپلەردىن باشقا، خورەك تارتىشنىڭ يەنە يۈرەك رىتىمسىزلىقى، زىققا، جىنسىي ئىقتىدار توسالغۇغا ئۇچراش، خامۇشلۇق، كېچىدە كۆپ سىيىش، گلاۋكوما، بالىلارنىڭ يېتىلىشى ئاستا بولۇش قاتارلىق مەسىلىلەرنى كەلتۈرۈپ چىقىرىدىغانلىقى ئىسپاتلاندى.
مەنبە:
https://m.nur.cn/news/2023/12/17931534.shtml
