بۆرەك مەنبەلىك سۇلۇق ئىششىق بۆرەك ئىقتىدارىنىڭ زىيانغا ئۇچرىشى كەلتۈرۈپ چىقارغان بەدەن سۇيۇقلۇقىنىڭ تۇرۇپ قېلىشى ۋە توقۇلمىلارنىڭ سۇلۇق ئىششىقىنى كۆرسىتىدۇ. ئۇنىڭ سەۋەبىنى چۈشىنىش، تەكشۈرۈش ۋە دىئاگنوز قويۇش ئۇسۇلى ھەمدە داۋالاش ئۇسۇلى بۇ خىل ئەھۋالنى ۋاقتىدا پەرقلەندۈرۈش ۋە بىر تەرەپ قىلىشتا ئىنتايىن مۇھىم.
سەۋەبى:
1. بۆرەك شارچىلىرىنىڭ سۈزۈش نىسبىتى تۆۋەنلەيدۇ:بۆرەكنىڭ ئاساسلىق فۇنكسىيەلىرىنىڭ بىرى قاندىكى كېرەكسىز ماددىلار ۋە ئارتۇق سۇنى سۈزۈشتىن ئىبارەت. بۆرەك شارچىلىرىنىڭ سۈزۈش نىسبىتى تۆۋەنلىگەندە، سۇ ۋە تۇز تەركىبى بەدەندە تۇرۇپ قېلىپ، سۇلۇق ئىششىق پەيدا بولىدۇ.
2. ناترىي بىلەن سۇ يىغىلىپ قېلىش:بۆرەك نورمال ئەھۋالدا بەدەندىكى ناترىينىڭ سەۋىيىسىنى تەڭشەيدۇ. بۆرەك ئىقتىدارى زىيانغا ئۇچرىغاندا، ناترىي يىغىلىپ قېلىپ، سۇلۇق ئىششىقنى كەلتۈرۈپ چىقىرىشى مۇمكىن.
3. ئاقسىلنىڭ يوقىلىشى:بۆرەك كېسەللىكى كۆپ مىقداردىكى ئاقسىلنىڭ سۈيدۈكتىن يوقىلىشىنى كەلتۈرۈپ چىقىرىشى مۇمكىن، بۇ قان پلازمىسىنىڭ كوللوئىد ئوسموس بېسىمىنى تۆۋەنلىتىپ، سۇلۇق ئىششىقنى كەلتۈرۈپ چىقىرىدۇ.
4. ھورمۇننىڭ تەڭپۇڭسىزلىقى:بەزى بۆرەك كېسەللىكلىرى ھورمۇننىڭ تەڭپۇڭسىزلىقىنى كەلتۈرۈپ چىقىرىشى مۇمكىن، مەسىلەن، سۈيدۈك ھەيدەشكە قارشى ھورمۇننىڭ ئاجرىلىپ چىقىشى بىنورمال بولۇپ، سۇلۇق ئىششىقنى كەلتۈرۈپ چىقىرىدۇ.
5. دورىنىڭ ئەكس تەسىرى:بەزى دورىلار بۆرەكنىڭ ئىقتىدارىغا تەسىر يەتكۈزۈشى ياكى ناترىي، سۇ يىغىلىپ قېلىشنى كەلتۈرۈپ چىقىرىپ، سۇلۇق ئىششىقنى كەلتۈرۈپ چىقىرىشى مۇمكىن.
تەكشۈرۈش ۋە دىئاگنوز قويۇش ئۇسۇلى:
1. كېسەللىك تارىخىنى سوراش:دوختۇر بىمارنىڭ كېسەللىك تارىخىنى سورايدۇ، بۇ يۇقىرى قان بېسىم، دىئابېت قاتارلىق ئاستا خاراكتېرلىك كېسەللىكلەرنىڭ بار – يوقلۇقى، شۇنداقلا دورىغا زىيادە سەزگۈرلۈك تارىخىنىڭ بار – يوقلۇقىنى ئۆز ئىچىگە ئالىدۇ.
2. بەدەن تەكشۈرۈش:دوختۇر بىمارنىڭ بەدەن ئېغىرلىقى، قان بېسىمى، يۈرەك، ئۆپكە ئىقتىدارى قاتارلىقلارنى تەكشۈرىدۇ.
3. لابوراتورىيىلىك تەكشۈرۈش:قان، سۈيدۈك ۋە چوڭ تەرەتنى دائىملىق تەكشۈرۈش، شۇنداقلا بۆرەك ئىقتىدارى، ئېلېكترولىت، ئاقسىل قاتارلىق ئالاقىدار كۆرسەتكۈچلەرنى تەكشۈرۈشنى ئۆز ئىچىگە ئالىدۇ.
4. تەسۋىر ئىلمى بويىچە تەكشۈرۈش:مەسىلەن:ئۇلترا ئاۋاز دولقۇنى، CT ،MRI قاتارلىقلار بۆرەكنىڭ قۇرۇلمىسى ۋە ئىقتىدارىنى باھالاشقا ياردەم بېرىدۇ.
5. بۆرەكتىن تىرىك توقۇلما ئېلىپ تەكشۈرۈش:زۆرۈر تېپىلغاندا، دوختۇر بۆرەكتىن تىرىك توقۇلما ئېلىپ تەكشۈرۈش ئارقىلىق بۆرەك كېسەللىكلىرىنىڭ تۈرى ۋە دەرىجىسىنى بېكىتىش تەكلىپىنى بېرىشى مۇمكىن.
داۋالاش ئۇسۇلى:
1. بىرلەمچى كېسەللىكنى كونترول قىلىش:مەسىلەن، يۇقىرى قان بېسىم، دىئابېت كېسىلى قاتارلىق ئاساسىي كېسەللىكلەرنى كونترول قىلىش.
2. ناترىي تۇزىنىڭ قوبۇل قىلىنىشىنى چەكلەش:تۇز تەركىبىنىڭ قوبۇل قىلىنىشىنى ئازايتىش سۇلۇق ئىششىقنى يېنىكلىتىشكە پايدىلىق.
3. سۈيدۈك ھەيدىگۈچى دورىلار بىلەن داۋالاش:سۈيدۈك ھەيدىگۈچى دورىلار بەدەندىكى ئارتۇق سۇ ۋە تۇز تەركىبىنى چىقىرىپ تاشلاشقا ياردەم بېرىدۇ.
4. ئاقسىل تولۇقلاش:بەزى ئەھۋاللاردا، ئاقسىل تولۇقلاش ئارقىلىق قان پلازمىسىنىڭ كوللوئىد ئوسموس بېسىمىنى ساقلاشقا توغرا كېلىدۇ.
5. دىئالىز قىلىپ داۋالاش:بۆرەك ئىقتىدارى ئېغىر دەرىجىدە زىيانغا ئۇچرىغان ئەھۋالدا، دىئالىز قىلىپ داۋالاش ئارقىلىق بەدەندىكى كېرەكسىز ماددىلار ۋە ئارتۇق سۇ تەركىبىنى تازىلاشقا توغرا كېلىشى مۇمكىن.
6. دورا بىلەن داۋالاش:كونكرېت كېسەللىك سەۋەبىگە ئاساسەن، ئىممۇنىتېتنى تورمۇزلىغۇچى دورا، ياللۇغقا قارشى دورا قاتارلىق دورىلارنى ئىشلىتىپ داۋالاشقا توغرا كېلىشى مۇمكىن.
ئومۇمەن، بۆرەك مەنبەلىك سۇلۇق ئىششىق بىر خىل ئېغىر كېسەللىك بولۇپ، ۋاقتىدا دوختۇرغا كۆرۈنۈش ھەمدە ئۇنىۋېرسال داۋالاش كېرەك. ئەگەر سىز ياكى ئۇرۇق – تۇغقان، دوست – بۇرادەرلىرىڭىزدە بۇ خىل كېسەللىك ئالامەتلىرى كۆرۈلسە، ۋاقتىدا دوختۇرغا كۆرۈنۈڭ.
