كىچىك تەرەتنى سۈيدۈك تەكشۈرۈش سۈيدۈكنى ئانالىز قىلىش ياكى سۈيدۈكنى قائىدىلىك تەكشۈرۈش دەپمۇ ئاتىلىدۇ، ئۇ دائىم ئۇچرايدىغان تېببىي تەكشۈرۈش ئۇسۇلىدۇر. ئۇ بىمارنىڭ سۈيدۈك ئەۋرىشكىسىنى يىغىش ھەمدە بىر قاتار خىمىيەلىك ۋە مىكروسكوپتا تەكشۈرۈش ئېلىپ بېرىپ، بىمارنىڭ سالامەتلىك ئەھۋالىنى باھالاشقا چېتىلىدۇ.
ئۇيغۇرچە ئىسمى: كىچىك تەرەت – سۈيدۈك تەكشۈرۈش
ئىنگىلىزچە ئىسمى: urine test, urine analysis, Urinalysis
خەنزۇچە ئىسمى: 尿液分析, 尿检
تۈركچە ئىسمى: idrar testi, idrar analizi
كىچىك تەرەتنى سۈيدۈك تەكشۈرۈش سۈيدۈك ئەۋرىشكىسىنى تەجرىبىخانىدا ئانالىز قىلىش ئارقىلىق ئۇنىڭ فىزىكىلىق، خىمىيەلىك ۋە مىكروسكوپ ئاستىدىكى ئالاھىدىلىكىنى تەكشۈرۈشنى كۆرسىتىدۇ. بۇ سۈيدۈكنىڭ رەڭگى، سۈزۈكلۈك دەرىجىسى، كىسلاتا ئىشقارلىق دەرىجىسى، سېلىشتۇرما ئېغىرلىقى، ئاقسىل، قەنت، قىزىل قان ھۈجەيرىسى، ئاق قان ھۈجەيرىسى، ئېپىتېلىيە ھۈجەيرىسى، باكتېرىيە ۋە كىرىستال قاتارلىق تەركىبلەرنى تەكشۈرۈشنى ئۆز ئىچىگە ئالىدۇ.
كىچىك تەرەت – سۈيدۈك تەكشۈرۈشى ئارقىلىق بىز نېمىنى بىلەلەيمىز؟
كىچىك تەرەتنى سۈيدۈك تەكشۈرۈش كۆپ خىل مۇھىم ئۇچۇرلار بىلەن تەمىنلەيدۇ، ئۇ تۆۋەندىكىلەرنى ئۆز ئىچىگە ئالىدۇ:
1. بۆرەك ساغلاملىقى:مەسىلەن، ئاقسىل سىيىش ( ئاقسىل مىقدارى بىنورمال بولۇش ) بۆرەكتە مەسىلە بارلىقىنى ئەسكەرتىشى مۇمكىن.
2. دىئابېت كېسىلى:سۈيدۈكتىكى قەنت مىقدارى دىئابېت كېسىلىنىڭ ئالامىتى بولۇشى مۇمكىن.
3. يۇقۇملىنىش:ئاق قان ھۈجەيرىلىرى ۋە باكتېرىيەلەرنىڭ مەۋجۇت بولۇشى سۈيدۈك يولى يۇقۇملانغانلىقىنى ئىپادىلىشى مۇمكىن.
4. سۇسىزلىنىش ياكى زىيادە گىدراتلىشىش:سۈيدۈكنىڭ سېلىشتۇرما ئېغىرلىقى بەدەندىكى سۇ تەركىبىنىڭ تەڭپۇڭلۇقىنى ئەكس ئەتتۈرىدۇ.
5. سۈيدۈك ئاجرىتىش سىستېمىسى كېسەللىكلىرى:قىزىل قان ھۈجەيرىلىرىنىڭ مەۋجۇت بولۇشى سۈيدۈك ئاجرىتىش سىستېمىسىدىكى كېسەللىكلەرنى، مەسىلەن، تاش ياكى ئۆسمە قاتارلىقلارنى كۆرسىتىپ بېرىشى مۇمكىن.
6. جىگەر ساغلاملىقى:سۈيدۈكتىكى بىلىرۇبىن ۋە ئۇروبىلىنوگېن جىگەر ئىقتىدارىنى ئەكس ئەتتۈرۈپ بېرىدۇ.
كىچىك تەرەتنى قاچان تەكشۈرىدۇ؟
- كىچىك تەرەتنى سۈيدۈك تەكشۈرۈش ئادەتتە تۆۋەندىكى ئەھۋاللاردا ئېلىپ بېرىلىدۇ:
- ئادەتتىكى سالامەتلىك تەكشۈرۈش:ئادەتتىكى سالامەتلىك تەكشۈرۈشنىڭ بىر قىسمى قىلىنىدۇ.
- دىئاگنوز قويۇش ئالامەتلىرى:دۈمبە ئاغرىش، پات – پات سىيىش، سۈيدۈك قىستاش، قان سىيىش قاتارلىق ئالامەتلەر كۆرۈلگەندە.
- مەلۇم بولغان كېسەللىكلەرنى كۆزىتىش:مەسىلەن، دىيابېت كېسىلى بىمارلىرى قەرەللىك ھالدا سۈيدۈك شېكىرىنى تەكشۈرتۈپ تۇرۇشى كېرەك.
- ھامىلىدار ئاياللار:ھامىلىدارلىق مەزگىلىگە مۇناسىۋەتلىك ئەگەشمە كېسەللىكلەرنى تەكشۈرۈشكە ئىشلىتىلىدۇ، مەسىلەن، ھامىلىدارلىق تۇتقاقلىقىنىڭ بېشارىتى.
- دورىنىڭ ئەكس تەسىرى:بەزى دورىلار بۆرەكنىڭ ئىقتىدارىغا تەسىر يەتكۈزۈشى مۇمكىن، شۇڭا قەرەللىك ئۆلچەپ تۇرۇش كېرەك.
كىچىك تەرەت سۈيدۈك ئارقىلىق يەنە كۆپ خىل ئوخشىمىغان تارماق تەكشۈرۈش تۈرلىرى بولىدۇ. بۇ شۇ ۋاقىتتا بىمارنىڭ كېسىلىگە ئاساسەن قارار بېرىلىدۇ. كېيىنكى ماقالىلىرىمىزدە تەپسىلىي توختىلىپ ئۆتىمىز. كىچىك تەرەتنى سۈيدۈك تەكشۈرۈش بىر خىل ئاددىي ھەم مۇھىم تېببىي تەكشۈرۈش بولۇپ، بۆرەك ۋە سۈيدۈك ئاجرىتىش سىستېمىسىنىڭ ساغلاملىق ئەھۋالى توغرىسىدىكى ئۇچۇرلار بىلەن تەمىنلەيدۇ. ئۇ دوختۇرلارنىڭ كۆپ خىل كېسەللىكلەرگە دىئاگنوز قويۇشىغا ياردەم بېرىدۇ ھەمدە داۋالاش لايىھىسىگە يېتەكچىلىك قىلىدۇ. كونكرېت كېسەللىك ئالامەتلىرى ۋە سالامەتلىك ئەھۋالىغا ئاساسەن، دوختۇر كىچىك تەرەت قىلىپ سۈيدۈك تەكشۈرۈش تەكلىپىنى بېرىپ، بىمارنىڭ سالامەتلىكىنى باشقۇرۇش ۋە قوغداشقا ياردەم بېرىدۇ.
