كۆكرەك – قورساق غەيرىيلىكى دېگىنىمىز، كۆكرەك ۋە قورساق قىسمىنىڭ شەكلى، قۇرۇلمىسى ياكى ئىقتىدارىدا نورمالسىزلىق يۈز بېرىپ، كۆكرەك – قورساق قىسمىدا سىممېترىكسىزلىك، شەكىل ئۆزگىرىش قاتارلىق مەسىلىلەرنى كەلتۈرۈپ چىقىرىشنى كۆرسىتىدۇ.
ئۇيغۇرچە: كۆكرەك قورساق غەيرى بولۇش
ئىنگىلىزچە: Thoracic and abdominal deformities
خەنزۇچە: 胸腹部畸形
تۈركچە: Göğüs ve karın deformiteleri
بۇ خىل ئەھۋال نەپەسلىنىش ئىقتىدارى ۋە يۈرەك ساغلاملىقىغا تەسىر يەتكۈزۈشى مۇمكىن.
غەرب تېبابىتى نۇقتىسىدىن قارىغاندا، كۆكرەك – قورساق غەيرىيلىكىنىڭ سەۋەبى تۆۋەندىكى بىر قانچە تەرەپنى ئۆز ئىچىگە ئېلىشى مۇمكىن:
1. تۇغما غەيرىيلىك تۇغۇلغاندا كۆكرەك – قورساق قىسمىدا نورمالسىزلىق كۆرۈلىدۇ، مەسىلەن، ۋارونكىسىمان كۆكرەك، توخۇ كۆكرەك قاتارلىقلار.
2. تاشقى يارا كۆكرەك قىسمى سىرتقى كۈچنىڭ سوقۇلۇشى ياكى بېسىلىشى قاتارلىق زەخىملىنىشكە ئۇچرىسا، كۆكرەك، قورساق قىسمىنىڭ شەكلى ئۆزگىرىپ كېتىشى مۇمكىن.
3. كېسەل بەزى كېسەللىكلەرمۇ كۆكرەك – قورساق قىسمىنىڭ غەيرىيلىكىنى كەلتۈرۈپ چىقىرىشى مۇمكىن، مەسىلەن، ئۆپكە ھاۋالىق ئىششىقى، تۈۋرۈك يانغا ئېگىلىش قاتارلىقلار.
تەكشۈرۈش ۋە دىئاگنوز قويۇش ئۇسۇلى ئادەتتە تۆۋەندىكى بىر قانچە تەرەپنى ئۆز ئىچىگە ئالىدۇ:
1.X رېنتگېندە تەكشۈرۈش:كۆكرەك – قورساق قىسمىنىڭ شەكلى ۋە چوڭ – كىچىكلىكى ھەمدە غەيرىيلىك بار – يوقلۇقى قاتارلىق مەسىلىلەرنى كۆرسىتىپ بېرەلەيدۇ.
2.CT تەسۋىر كۆچۈرۈش:كۆكرەك – قورساق قىسمىنىڭ ئىچكى قۇرۇلمىسى ۋە توقۇلما ئەھۋالىنى تېخىمۇ ئېنىق كۆزەتكىلى بولىدۇ.
3.MRI تەكشۈرۈش:تېخىمۇ تەپسىلىي سۈرەت ئۇچۇرى بىلەن تەمىنلەپ ،يۇمشاق توقۇلمىلارنىڭ زەخىملىنىشىگە تېخىمۇ ياخشى دىئاگنوز قويۇش ئۈنۈمىگە ئىگە.
داۋالاش ئۇسۇلى كونكرېت كېسەللىك سەۋەبى ۋە كېسەللىك ئەھۋالىنىڭ ئېغىرلىق دەرىجىسىگە باغلىق. بەزى يېنىك دەرىجىدىكى كۆكرەك – قورساق غەيرىيلىكى بەدەن چېنىقتۇرۇش ۋە فىزىكىلىق داۋالاش ئارقىلىق كېسەللىك ئالامىتىنى ياخشىلايدۇ؛ ئېغىر دەرىجىدىكى غەيرىيلىكنى ئوپېراتسىيە قىلىپ تۈزەشكە توغرا كېلىدۇ. بۇنىڭدىن باشقا، بەزى كېسەللىكلەر كەلتۈرۈپ چىقارغان كۆكرەك – قورساق غەيرىيلىكىنىمۇ قاراتمىلىقى بولغان ھالدا داۋالاشقا توغرا كېلىدۇ.
