تېڭشۈن تورى خەۋىرى، نۇر تورى تەرجىمىسى:
ئوتتۇرا ياش ھاياتتىكى مۇھىم ئۆتكەل. بالىلارنىڭ تۇرمۇش غېمىنى يېيىش ۋە تۈرلۈك ھايات غەۋغالىرى بىلەن ئوتتۇرا ياشلىقلار ئۆزىنى ئاسانلا چارچىتىۋالىدۇ. ئەمما روھىي ۋە جىسمانىي جەھەتتىكى ساغلاملىق ئوتتۇرا ياشلىقلار تېخىمۇ كۆپ ئەھمىيەت بېرىشكە تېگىشلىك مەسىلە بولۇپ، بۇنى ئىشقا ئاشۇرۇش ئۈچۈن ئوتتۇرا ياشلىقلار تۆۋەندىكى بەش ئىشنى ئازايتىشى كېرەك:
1. تاماكا چېكىشنى ئازايتىش ياكى تاماكا تاشلاش
تاماكا چېكىش ئۆپكە راكىنى كەلتۈرۈپ چىقىرىدىغان ئاساسلىق ئامىل بولۇپ، نۆۋەتتە ئۆپكە راكى ئەرلەر ۋە ئاياللارنىڭ راك كېسىلى بىلەن ئۆلۈپ كېتىشىدىكى ئەڭ ئاساسلىق سەۋەب بولۇپ كەلمەكتە. تاماكا چېكىشنىڭ ئەكسىچە، تاماكا چېكىش مىقدارىنى كونترول قىلىش ياكى تاماكا تاشلاش تەبئىيلا ساغلاملىققا ئاكتىپ ئۆزگىرىش ئېلىپ كېلىدۇ.
2. ھاراقنى ئىچىشنى ئازايتىش ياكى تۈگىتىش
ياشلىقتا كۆپ قىسىم كىشىلەر ئاسانلا مۇھىتنىڭ تەسىرىدە خىزمەتداشلار ياكى دوست-بۇرادەرلەر بىلەن ھاراق ئىچىشكە ئادەتلىنىپ قالىدۇ. ئەمما بۇ خىل ناچار ئادەت جىگەر ئىقتىدارىنى زىيانغا ئۇچرىتىش بىلەن بىرگە ئادەمنىڭ نېرۋا سىستېمىسىنى زىيانغا ئۇچرىتىدىغان بولۇپ، ھاراق تەركىبىدىكى ئىسپىرت مىقدارى يەنە بىرقىسىم ئەگەشمە كېسەللىكلەرنى پەيدا قىلىدۇ. شۇڭا ئوتتۇرا ياشتىن كېيىن ھاراقنى رەت قىلىشنى ئۆگىنىۋېلىشى كېرەك.
3. تۈنەشنى ئازايتىش
ياش مەزگىلدە تىرىشىپ خىزمەت قىلىشقا ۋە شۇ ئارقىلىق ئىقتىساد توپلاشقا دۇچ كېلىدىغان بولغاچقا، بەزىدە ئىسمېنا قوشۇش ۋە تۈنەشكە توغرا كېلىدۇ. ياشلىق مەزگىلىدە بەدەن كۈچلۈك بولغاچقا، تۈنىگەندىن كېيىن بەدەنگە بولغان تەسىرى كۆپ بىلىنمەيدۇ. ئەمما ئوتتۇرا ياشتىن بارغاندا ھەر قايسى ئەزا ۋە توقۇلمىلارنىڭ ئىقتىدارى تەدرىجىي تۆۋەنلەپ بارغانلىقى ئۈچۈن، تۈنىگەندىن كېيىن ئاسانلا باش قېيىش، باش ئاغرىش ۋە روھىي جەھەتتىكى تۇراقسىزلىقنى پەيدا قىلىدۇ، ئېغىر بولغاندا ھەتتا تۇيۇقسىز ئۆلۈپ كېتىشنى كەلتۈرۈپ چىقىرىشىمۇ مۇمكىن. شۇڭا ياشنىڭ چوڭىيىپ بېرىشىغا ئەگىشىپ تۈنەشنى ئازايتىش بىلەن بىرگە قانۇنىيەتلىك تۇرمۇش ئادىتى بەرپا قىلىش كېرەك.
4. ئۇزاق ئولتۇرۇشنى ئازايتىش
ئوتتۇرا ياشقا بارغاندا، نۇرغۇن كىشىلەر تۈرلۈك سەۋەبلەر بىلەن ھەرىكەت قىلىشنى رەت قىلىپ، تەبىئىيلا ئۇزاق ۋاقىت ئولتۇرۇشنى تاللايدۇ. ئەمما ئۇزاق ۋاقىت ئولتۇرغاندا مۇسكۇللارنىڭ كۈچى ئاجىزلىشىشنى كەلتۈرۈپ چىقىرىدۇ، شۇنداقلا يۈرەك كېسىلى، قەۋزىيەت، راك قاتارلىق كۆپ خىل كېسەللىكلەرنىڭ پەيدا بولۇش خەۋپىنى ئاشۇرۇۋېتىدۇ.
5. ئاغرىنىشنى ئازايتىش
كونىلاردا «ئادەم چوڭ بولغانچە مىجەزى بالىلارغا ئوخشاپ قالىدۇ» دەيدىغان گەپ بار. شۇڭا ئوتتۇرا ياشقا بارغاندا، روھىي ھالەت ۋە كەيپىياتنى ئازادە تۇتۇشنىڭ مۇھىملىقىنى ئۆزىگە ئەسكەرتىپ تۇرۇش ئارقىلىق تۇرمۇشتىكى ئاغرىنىش ۋە غەزەپلىنىشنى ئازايتىپ، ئىشلارغا سوغۇققان ۋە كەڭ قورساق مۇئامىلىدە بولۇش كېرەك. بۇ ئارقىلىق روھىي ئازادىلىكنى قولغا كەلتۈرگىلى بولىدۇ.
قىسقىسى، ئوتتۇرا ياشتا يەنىلا ھاياتقا تولۇپ تاشقان ئىشەنچ بىلەن مۇئامىلە قىلىش، بىرقىسىم ئىشلارنى دەپ ئۆزىنىڭ ساغلاملىقىنى ئۇتتۇرۇپ قويماسلىق كېرەك.
مەنبە:
https://m.nur.cn/news/2023/12/17924114.shtml
