پۇت – قول ئۇيۇشۇش قول ۋە پۇتنىڭ سېزىمىنى يوقىتىش ياكى ئاجىزلاشنى كۆرسىتىدۇ، بۇنى كۆپ خىل سەۋەبلەر كەلتۈرۈپ چىقارغان بولۇشى مۇمكىن. غەرب تېبابىتىدە بۇ خىل كېسەللىك ئالامىتىنىڭ سەۋەبىگە چوڭقۇر دىئاگنوز قويۇش ۋە داۋالاش ئىنتايىن مۇھىم.
سەۋەبى:
1. نېرۋا بېسىمغا ئۇچراش:مەسىلەن:بويۇن ئومۇرتقا كېسىلى، بەل ئومۇرتقا ئارىلىق تەخسىسى پولتىيىپ چىقىش قاتارلىقلار نېرۋىنىڭ بېسىمغا ئۇچرىشىنى كەلتۈرۈپ چىقىرىپ، پۇت قول ئۇيۇشۇشنى كەلتۈرۈپ چىقىرىشى مۇمكىن.
2. تاشقى زەخىم:مەسىلەن، يىقىلىپ زەخىملىنىش، سوقۇلۇپ زەخىملىنىش قاتارلىقلار پۇت – قول نېرۋىلىرىنىڭ زەخىملىنىشىنى كەلتۈرۈپ چىقىرىشى مۇمكىن.
3. دىيابېت كېسىلى:ئۇزاق مۇددەت يۇقىرى قان شېكىرى نېرۋىنى زەخىملەندۈرۈشى مۇمكىن، بۇ دىيابېت كېسىلى مەنبەلىك نېرۋا كېسەللىك ئۆزگىرىشى دەپ ئاتىلىدۇ، بۇنىڭ ئىچىدە ئەڭ كۆپ ئۇچرايدىغان كېسەللىك ئالامىتى پۇت – قول ئۇيۇشۇش.
4. ۋىتامىن كەمچىل بولۇش:مەسىلەن، ۋىتامىن B12 كەمچىل بولسا نېرۋا ئىقتىدارى توسالغۇغا ئۇچراپ، ئۇيۇشۇشنى كەلتۈرۈپ چىقىرىشى مۇمكىن.
5. باشقا كېسەللىكلەر:مەسىلەن، كۆپ ئورۇندا پەيدا بولىدىغان قېتىشىش، رېينولد كېسىلى، ئىسپىرتتىن زەھەرلىنىش قاتارلىقلارمۇ پۇت – قول ئۇيۇشۇشنى كەلتۈرۈپ چىقىرىشى مۇمكىن.
تەكشۈرۈش ۋە دىئاگنوز قويۇش ئۇسۇلى:
1. كىلىنىكىلىق تەكشۈرۈش:دوختۇر كېسەللىك تارىخىنى سورايدۇ، بەدەن تەكشۈرىدۇ ھەمدە پۇت – قولنىڭ ھەرىكەت دائىرىسى ۋە سېزىمىنى كۆزىتىدۇ.
2. نېرۋىنى ئېلېكتروفىزىيولوگىيەلىك تەكشۈرۈش:مەسىلەن، نېرۋىنىڭ يەتكۈزۈش سۈرئىتىنى ئۆلچەش ئارقىلىق نېرۋىنىڭ ئىقتىدارىنى باھالىغىلى بولىدۇ.
3. قان تەكشۈرۈش:دىيابېت كېسىلى، ۋىتامىن كەملىك ياكى باشقا مۇناسىۋەتلىك كېسەللىكلەرنىڭ بار – يوقلۇقىنى ئېنىقلاشقا ياردەم بېرىدۇ.
4. سۆرەتلەش ئىلمى بويىچە تەكشۈرۈش:مەسىلەن:X نۇرى ،MRI نۇرى ياكى CT نۇرى قاتارلىقلار سۆڭەك ۋە يۇمشاق توقۇلمىلارنىڭ تۈزۈلۈشىنى باھالاشقا ئىشلىتىلىدۇ.
5. مېڭىنى تەكشۈرۈش:مەركىزىي نېرۋا سىستېمىسى بىلەن مۇناسىۋەتلىك دەپ گۇمان قىلىنغان مەسىلىلەرگە قارىتا، مېڭىنى تەكشۈرۈشكە توغرا كېلىشى مۇمكىن.
داۋالاش ئۇسۇلى:
1. دورا بىلەن داۋالاش:سېتروئىدسىز ياللۇغقا قارشى دورىلار، ئاغرىق پەسەيتكۈچى دورىلار، خىسلەتلىك دورا قاتارلىقلار.
2. فىزىكىلىق داۋالاش:نېرۋا ئىقتىدارىنى ئەسلىگە كەلتۈرۈش ۋە قان ئايلىنىشنى ياخشىلاشقا ياردەم بېرىدۇ.
3. ئوپېراتسىيە قىلىپ داۋالاش:بەزى ئەھۋاللارغا، مەسىلەن، نېرۋىنىڭ بېسىلىشى ئېغىر ياكى ئېنىق قۇرۇلما خاراكتېرلىك مەسىلە بولسا، ئوپېراتسىيە قىلىپ داۋالاشقا توغرا كېلىشى مۇمكىن.
4. تۇرمۇش ئۇسۇلىنى تەڭشەش:مەسىلەن، ئۇزۇن ۋاقىت ئوخشاش قىياپەتنى ساقلاشتىن ساقلىنىش، قەرەللىك چېنىقىش قاتارلىقلار.
ئەگەر سىز ياكى سىز تونۇيدىغان كىشىلەردە پۇت – قول ئۇيۇشۇشقا مۇناسىۋەتلىك مەسىلە بولسا، ۋاقتىدا دوختۇردىن ياكى كەسپىي داۋالاش ئاپپاراتلىرىدىن مەسلىھەت سوراپ باھالاش ۋە داۋالاش ئېلىپ بېرىشنى تەۋسىيە قىلىمىز.
