يۇقىرى قان بېسىمى «سۈكۈتتىكى قاتىل» دەپمۇ ئاتىلىدۇ، چۈنكى ئۇ دائىم كۆرۈنەرلىك ئالامەتلەرنى كۆرسەتمەي تۇرۇپ، يۈرەك، مېڭە، بۆرەك قاتارلىق مۇھىم ئەزالارغا ئېغىر زىيان سالىدۇ. نۇرغۇن كىشىلەر يۇقىرى قان بېسىمى توغرىسىدا بەزى خاتا چۈشەنچىلەرگە ئىگە بولۇپ, بۇ خاتا چۈشەنچىلەر كېسەللىك ئەھۋالىنى كونترول قىلىشقا ئېغىر تەسىر كۆرسىتىدۇ. تۆۋەندە، بىز يۇقىرى قان بېسىمى بىمارلىرى ئارىسىدا كەڭ تارقالغان 10 خاتا كۆز قاراش ۋە ئۇنىڭ ئىلمىي چۈشەندۈرۈشىنى ئوتتۇرىغا قويىمىز.
1. خاتا چۈشەنچە: مەندە ھېچقانداق بىئاراملىق ھىس يوق، دېمەك قان بېسىمىم نورمال.
توغرىسى: يۇقىرى قان بېسىمى كۆپىنچە ھاللاردا دەسلەپكى مەزگىللەردە ھېچقانداق كۆرۈنەرلىك ئالامەت كۆرسەتمەيدۇ. باش قېيىش، بويۇن قېتىشىش قاتارلىق ئالامەتلەر كۆرۈلگەندە، قان بېسىمى ئاللىقاچان خەتەرلىك سەۋىيىگە يەتكەن بولۇشى مۇمكىن. شۇڭا، ئالامىتى بولسۇن-بولمىسۇن، قان بېسىمىنى قەرەللىك ئۆلچەپ تۇرۇش ئىنتايىن مۇھىم.
2. خاتا چۈشەنچە: مەن تاماققا تۇزنى ئاز سالىمەن، شۇڭا تۇز مىقدارىم ئۆلچەمدىن ئېشىپ كەتمەيدۇ.
توغرىسى: تاماق ئەتكەندە ئىشلىتىدىغان تۇز پەقەت كۈندىلىك تۇز قوبۇل قىلىش مىقدارىنىڭ بىر قىسمىنىلا ئىگىلەيدۇ. نان، پېچىنە-پىرەنىك، ھەرخىل تەملىك يىمەكلىكلەر ۋە تەييار يېمەكلىكلەردە نۇرغۇن «كۆرۈنمەس تۇز» مەۋجۇت. شۇڭا، يېمەكلىك سېتىۋالغاندا ئۇنىڭ تەركىبىگە دىققەت قىلىش ۋە تاللا بازىرىدىكى پىششىقلاپ ئىشلەنگەن يېمەكلىكلەردىن يىراق تۇرۇش كېرەك.
3. خاتا چۈشەنچە: قان بېسىمى دورىسىنى بىر مەزگىل يەپ، قان بېسىمىم نورماللاشقاندا توختاتسام بولىدۇ.
توغرىسى: يۇقىرى قان بېسىمى سوزۇلما خاراكتېرلىك كېسەللىك بولۇپ، كۆپىنچە بىمارلار ئۈچۈن دورا بىلەن ئۇزۇن مۇددەت داۋالاشقا توغرا كېلىدۇ. دورىنى ئۆز ئالدىغا توختىتىش قان بېسىمىنىڭ قايتا ئۆرلىشىنى كەلتۈرۈپ چىقىرىپ، يۈرەك-مېڭە قان تومۇر كېسەللىكلىرىنىڭ خەۋپىنى زور دەرىجىدە ئاشۇرىۋېتىدۇ. دورىنى قانداق ئىشلىتىش ۋە توختىتىش مەسىلىسىدە چوقۇم دوختۇرنىڭ كۆرسەتمىسىگە ئەمەل قىلىش كېرەك.
4. خاتا چۈشەنچە: يۇقىرى قان بېسىمى پەقەت ياشانغانلاردا كۆرۈلىدىغان كېسەللىك.
توغرىسى: گەرچە يۇقىرى قان بېسىمى ياشانغانلاردا كۆپ ئۇچرىسىمۇ، ئەمما ياشلار ۋە ئوتتۇرا ياشلىقلاردىمۇ كۆرۈلۈش نىسبىتى بارغانسېرى ئېشىپ بارماقتا. ناچار تۇرمۇش ئادەتلىرى، يېمەك-ئىچمەك قۇرۇلمىسىنىڭ نورمالسىزلىقى، خىزمەت بېسىمىنىڭ ئېغىر بولۇشى قاتارلىقلار ياشلارنىڭ قان بېسىمىنىڭ ئۆرلىشىگە سەۋەب بولىدىغان مۇھىم ئامىللاردۇر.
5. خاتا چۈشەنچە: ئائىلىمىزدە ئېرسىيەت خاراكتېرلىك يۇقىرى قان بېسىمى بار، شۇڭا مەنمۇ چوقۇم قان بېسىمى بولۇپ قالىمەن..
توغرىسى: ئېرسىيەت يۇقىرى قان بېسىمىنى كەلتۈرۈپ چىقىرىدىغان بىر ئامىل، ئەمما بىردىنبىر ئامىل ئەمەس. ساغلام تۇرمۇش ئادىتىنى يېتىلدۈرۈش، مەسىلەن: تۇزنى ئاز ئىستېمال قىلىش، بەدەن ئېغىرلىقىنى كونترول قىلىش، قەرەللىك چېنىقىش، تاماكا تاشلاش ۋە ھاراقنى چەكلەش ئارقىلىق، ئېرسىيەت خەۋپى يۇقىرى كىشىلەرمۇ قان بېسىمىنىڭ ئۆرلىشىنىڭ ئۈنۈملۈك ئالدىنى ئالالايدۇ.
6. خاتا چۈشەنچە: ھاراق قان تومۇرلارنى كېڭەيتىپ، قان بېسىمىنى چۈشۈرىدۇ.
توغرىسى: ئاز مىقداردىكى ھاراق قىسقا ۋاقىت ئىچىدە قان تومۇرلارنى كېڭەيتىشى مۇمكىن، ئەمما ئۇزۇن مۇددەت ھاراق ئىچىش ياكى كۆپ مىقداردا ھاراق ئىچىش يۈرەكنىڭ سوقۇشىنى تېزلىتىپ، قان بېسىمىنى ئەكسىچە ئۆرلىتىۋېتىدۇ ھەمدە دورىنىڭ ئۈنۈمىگە تەسىر كۆرسىتىدۇ. شۇڭا، يۇقىرى قان بېسىمى بىمارلىرى ھاراق ئىچىشتىن ساقلىنىشى كېرەك.
7. خاتا چۈشەنچە: قان بېسىمىنى پەقەت دوختۇرخانىدا ئۆلچەتسەملا كۇپايە.
توغرىسى: دوختۇرخانىدىكى مۇھىت بەزى كىشىلەرنى جىددىيلەشتۈرۈپ، «ئاق خالاتلىقلار قان بېسىمى» نى كەلتۈرۈپ چىقىرىشى، يەنى ئۆلچەنگەن قىممەتنىڭ ئەمەلىي ئەھۋالدىن يۇقىرى بولۇشى مۇمكىن. ئۆيدە ئۆزلۈكىدىن قەرەللىك ھالدا قان بېسىمىنى ئۆلچەپ خاتىرىلەش، قان بېسىمىنىڭ ھەقىقىي ئەھۋالىنى تېخىمۇ ئوبيېكتىپ ئەكس ئەتتۈرۈپ بېرەلەيدۇ ۋە دوختۇرنىڭ داۋالاش پىلانىنى تەڭشىشىگە ياردەم بېرىدۇ.
8. خاتا چۈشەنچە: ئارام ئالساملا قان بېسىمىم چۈشىدۇ، چېنىقىشنىڭ ھاجىتى يوق.
توغرىسى: يېتەرلىك ئۇيقۇ ۋە ئارام ئېلىش قان بېسىمىنى تۇراقلاشتۇرۇشقا پايدىلىق، ئەمما مۇۋاپىق چېنىقىش تېخىمۇ مۇھىم. قەرەللىك ھالدا مېڭىش، يۈگۈرۈش، سۇ ئۈزۈش قاتارلىق ئايروبىك چېنىقىشلار يۈرەك ئىقتىدارىنى ياخشىلاپ، قان تومۇرلارنىڭ ئېلاستىكىلىقىنى ئاشۇرۇپ، قان بېسىمىنى تۆۋەنلىتىشكە زور ياردەم بېرىدۇ.
9. خاتا چۈشەنچە: مەن ئورۇق، شۇڭا يۇقىرى قان بېسىمىغا گىرىپتار بولمايمەن.
توغرىسى: سېمىزلىك يۇقىرى قان بېسىمىنىڭ مۇھىم خەتەرلىك ئامىلى، ئەمما ئورۇق كىشىلەرمۇ يۇقىرى قان بېسىمىغا گىرىپتار بولۇشى مۇمكىن. يۇقىرى تۇزلۇق، يۇقىرى مايلىق يېمەك-ئىچمەك ئادەتلىرى، ھەرىكەتنىڭ ئاز بولۇشى ۋە روھىي بېسىمنىڭ ئېغىر بولۇشى قاتارلىقلار بەدەن ئېغىرلىقى نورمال كىشىلەردىمۇ قان بېسىمىنىڭ ئۆرلىشىنى كەلتۈرۈپ چىقىرىدۇ.
10. خاتا چۈشەنچە: قوشۇمچە دورىلار ياكى ساغلاملىق مەھسۇلاتلىرى قان بېسىمى دورىسىنىڭ ئورنىنى ئالالايدۇ.
توغرىسى: بەزى قوشۇمچە دورىلار ياكى ساغلاملىق مەھسۇلاتلىرى قان بېسىمىنى تەڭشەشتە مەلۇم دەرىجىدە ياردەمچى رول ئوينىشى مۇمكىن، ئەمما ئۇلار ھەرگىزمۇ دوختۇر تەۋسىيە قىلغان قان بېسىمى دورىسىنىڭ ئورنىنى ئالالمايدۇ. ھەرقانداق قوشۇمچە داۋالاش ئۇسۇلىنى قوللىنىشتىن بۇرۇن، چوقۇم دوختۇر بىلەن مەسلىھەتلىشىش كېرەك.
