قورساق دىۋارى ۋېناسىنىڭ ئەگرى – بۈگرى كېڭىيىشى قورساق قىسمى يۈزىدىكى ۋېنانىڭ قاننىڭ قايتىشى راۋان بولماسلىق سەۋەبىدىن كېڭىيىش، تولغىنىش ۋە پولتىيىپ چىقىش ئەھۋالىنى كۆرسىتىدۇ. بۇ خىل ئەھۋال ئادەتتە جىگەر قېتىش قاتارلىق جىگەر كېسىلى بىمارلىرىدا يۈز بېرىدۇ، چۈنكى بۇ كېسەللىكلەر جىگەر ئىقتىدارىنى زىيانغا ئۇچرىتىدۇ، شۇنىڭ بىلەن قاننىڭ نورمال ئايلىنىشىغا تەسىر يەتكۈزىدۇ.
غەرب تېبابىتى نۇقتىسىدىن قارىغاندا، قورساق دىۋارى ۋېناسىنىڭ ئەگرى – بۈگرى كېڭىيىشىنىڭ سەۋەبى تۆۋەندىكى بىر قانچە تەرەپنى ئۆز ئىچىگە ئېلىشى مۇمكىن:
1. جىگەر قېتىش جىگەر قېتىشىش بىر خىل ئاستا خاراكتېرلىك جىگەر كېسەللىكى بولۇپ، ئۇ جىگەر توقۇلمىلىرىنىڭ تەدرىجىي قاتتىقلىشىشى ۋە ئىقتىدارىنى يوقىتىشنى كەلتۈرۈپ چىقىرىدۇ. جىگەر نورمال خىزمەت قىلالمىغاندا، قان قاپقا ۋېنا سىستېمىسىغا يىغىلىپ قېلىپ، بېسىمنى ئۆرلىتىۋېتىدۇ. بۇ خىل يۇقىرى بېسىم قاننى باشقا يوللار ئارقىلىق يۈرەككە قايتىشقا مەجبۇر قىلىدۇ، بۇنىڭ ئىچىدە قورساق دىۋارى ۋېناسىمۇ بار. ئۇزاق مۇددەتلىك بېسىم تەسىرى قورساق دىۋارى ۋېناسىنىڭ كېڭىيىشى، تولغىنىشى ۋە پولتىيىپ چىقىشىنى كەلتۈرۈپ چىقىرىدۇ.
2. باشقا جىگەر كېسەللىكلىرى جىگەر قېتىشتىن باشقا بەزى جىگەر كېسەللىكلىرى ( مەسىلەن، جىگەر راكى، جىگەر ياللۇغى قاتارلىقلار ) مۇ قورساق دىۋارى ۋېناسىنىڭ ئەگرى – بۈگرى كېڭىيىشىنى كەلتۈرۈپ چىقىرىشى مۇمكىن.
3. باشقا سەۋەب قورساق بوشلۇقىدىكى ئۆسمە، قورساق پەردە ياللۇغى، ھامىلىدارلىق قاتارلىق ئامىللارمۇ قورساق دىۋارى ۋېناسىنىڭ ئەگرى – بۈگرى كېڭىيىشىنى كەلتۈرۈپ چىقىرىشى مۇمكىن.
تەكشۈرۈش ۋە دىئاگنوز قويۇش ئۇسۇلى:
قورساق دىۋارى ۋېناسى ئەگرى – بۈگرى كېڭىيىش كېسىلىگە گىرىپتار بولغان دەپ گۇمان قىلىنغان بىمارلارغا قارىتا، دوختۇر ئادەتتە تۆۋەندىكىدەك تەكشۈرۈش ۋە دىئاگنوز قويىدۇ:
1. بەدەن تەكشۈرۈش دوختۇر بىمارنىڭ قورساق قىسمىدا ۋېنانىڭ ئەگرى – بۈگرى كېڭىيىش ئىپادىسىنىڭ بار – يوقلۇقىنى تەپسىلىي كۆزىتىدۇ. ئەگەر بار بولسا، دوختۇر يەنە بۇ ۋېنالارنى سىلاپ ئۇلارنىڭ چوڭ – كىچىكلىكى، شەكلى ۋە ئورنىنى بېكىتىدۇ.
2. ئۇلترا ئاۋازلىق تەكشۈرۈش ئۇلترا ئاۋاز دولقۇنىدا تەكشۈرۈش دوختۇرنىڭ قورساق دىۋارى ۋېناسىنىڭ ئەگرى – بۈگرى كېڭىيىش دەرىجىسى ۋە ئورنىنى بېكىتىشىگە ھەمدە باشقا كېسەللىك سەۋەبلىرىنى چىقىرىپ تاشلىشىغا ياردەم بېرىدۇ.
3.CT تەسۋىر يېيىش ياكى MRI تەكشۈرۈش:بۇ تەكشۈرۈشلەر تېخىمۇ تەپسىلىي سۈرەتلىك ئۇچۇرلار بىلەن تەمىنلەپ، دوختۇرلارنىڭ كېسەللىك سەۋەبىنى بېكىتىشى ۋە داۋالاش لايىھەسى تۈزۈشىگە ياردەم بېرىدۇ.
داۋالاش ئۇسۇلى:
قورساق دىۋارى ۋېناسىنىڭ ئەگرى – بۈگرى كېڭىيىشىنى داۋالاش ئاساسلىقى تۆۋەندىكى بىر قانچە تەرەپنى ئۆز ئىچىگە ئالىدۇ:
1. دورا بىلەن داۋالاش دورا بىلەن داۋالاش ئاساسلىقى جىگەر قېتىشىش قاتارلىق ئاساسىي كېسەللىكلەرنى داۋالاش بولۇپ، جىگەرنىڭ يۈكىنى يېنىكلىتىش ۋە قان ئايلىنىشنى ياخشىلاشنى كۆرسىتىدۇ. دائىم ئىشلىتىلىدىغان دورىلار سۈيدۈك ھەيدىگۈچى دورىلار، B ئاكسېپتورنى توسقۇچى دورىلار قاتارلىقلارنى ئۆز ئىچىگە ئالىدۇ.
2. تېرە ئارقىلىق پۇنكىسىيە قىلىش رادىئو چاستوتىلىق ئېرىتىش تېخنىكىسى ( PRFA ):بۇ بىر خىل مىكرو زەخىملىك ئوپېراتسىيە ئۇسۇلى بولۇپ، ئۆتكۈزگۈچ نەيچە ئارقىلىق يۇقىرى چاستوتىلىق توكنى قورساق دىۋارى ۋېناسىنىڭ ئىچكى قىسمىغا يەتكۈزۈپ، ئۇنى ئىسسىقتىن تارايتىپ توسۇيدۇ. بۇ خىل ئۇسۇل كېسەللىك ئالامەتلىرىنى ئۈنۈملۈك پەسەيتىدۇ ھەمدە ئەگەشمە كېسەللىكلەرنىڭ يۈز بېرىشىنىڭ ئالدىنى ئالىدۇ.
