روسىيە 2025-يىلى كۈزدە دۇنيادىكى تۇنجى سۈنئىي ئىدراك لايىھەلىگەن شەخسىيلەشتۈرۈلگەن راك ۋاكسىنىسىنى ئىنسانلاردا سىناق قىلىشنى باشلايدۇ
موسكۋا، روسىيە – 2025-يىلى 3-ئاۋغۇست — سپۇتنىك V COVID-19 ۋاكسىنىسىنى ئورتاق تەتقىق قىلىپ ياساپ چىقىپ داڭق قازانغان گامالېيا دۆلەتلىك تەتقىقات مەركىزى 2025-يىلى 9-ئايدىن 10-ئايغىچە سۈنئىي ئىدراك لايىھەلىگەن، يول ئاچقۇچ خاراكتېرلىك شەخسىيلەشتۈرۈلگەن mRNA راك ۋاكسىنىسىنىڭ بىرىنچى باسقۇچلۇق ئىنسانلاردىكى سىنىقىنى باشلاشنى پىلانلاۋاتقانلىقىنى ئېلان قىلدى.
بۇ بۆسۈش خاراكتېرلىك ۋاكسىنا سۈنئىي ئىدراكتىن پايدىلىنىپ، بىمارنىڭ شەخسىي ئۆسمە گېن ئالاھىدىلىكىنى ئانالىز قىلىدۇ. بۇ ئانالىز شەخسىيلەشتۈرۈلگەن mRNA لايىھەسىنى تېزلىكتە ياساپ چىقىشقا شارائىت ھازىرلايدۇ، ئاندىن بۇ لايىھە ئاساسىدا بىمارغا مەخسۇس ياسالغان ۋاكسىنا سىنتېزلىنىدۇ. بۇ ۋاكسىنا بىمارنىڭ ئىممۇنىتېت سىستېمىسىنى راك ھۈجەيرىلىرىنى تونۇشقا ۋە ئۇنىڭغا ھۇجۇم قىلىشقا ئۈگىتىدۇ.
ئىلگىرىكى ھايۋانلار تەتقىقاتىدا، بۇ ئۇسۇل ئۆسمىنى كۆرۈنەرلىك دەرىجىدە بېسىش ۋە راكنىڭ يۆتكىلىپ تارقىلىشىنى ئازايتىشتا روشەن ئۈنۈم كۆرسىتىپ، كەلگۈسىدىكى راك داۋالاش ئۇسۇللىرى ئۈچۈن ئۈمىدۋار ئىستىقباللارنى نامايان قىلغان.
گامالېيا مەركىزىنىڭ مۇدىرى ئالېكساندىر گىنتسبۇرگنىڭ سۆزىگە قارىغاندا، رەسمىي تەستىقتىن بۇ يازدا ئۆتۈش مۆلچەرلەنمەكتە ئىكەن، بۇ 2025-يىلى كۈزنىڭ بېشىدا تۇنجى بىمارلارنى داۋالاشقا يول ئاچىدىكەن.
بۇ پىلاننىڭ يەنە بىر مۇھىم ئالاھىدىلىكى، ئۇنىڭ روسىيە پۇقرالىرىغا ھەقسىز تەمىنلىنىدىغانلىقى، ئىشلەپچىقىرىش خىراجىتىنى ھۆكۈمەت ياردەم قىلىدىغانلىقىدۇر. بۇ دۆلەتنىڭ ھەممە ئادەم ئېرىشەلەيدىغان، ئىلغار داۋالاش-ساقلىقنى ساقلاش مۇلازىمىتىگە بولغان ۋەدىسىنى گەۋدىلەندۈرىدۇ.
ئەگەر مۇۋەپپەقىيەتلىك بولسا، بۇ تىرىشچانلىق پەقەتلا روسىيەدىكى ئونكولوگىيە (راكشۇناسلىق) ساھەسىدە ئىنقىلاب خاراكتېرلىك ئۆزگىرىش ئېلىپ كېلىپلا قالماي، بەلكى راكنى ئىممۇنىتېت ئارقىلىق داۋالاشتىكى دۇنياۋى ئۆلچەمنىمۇ يۇقىرى كۆتۈرۈپ، سۈنئىي ئىدراكقا تايانغان شەخسىيلەشتۈرۈلگەن داۋالاشنىڭ يېڭى دەۋرىنى ئاچىدۇ.
مەنبەلەر
- «ئىقتىساد ۋاقىت گېزىتى»، «راك داۋاسى؟ روسىيە ئىنقىلاب خاراكتېرلىك شەخسىيلەشتۈرۈلگەن راك ۋاكسىنىسىنى ئىنسانلاردا سىناق قىلىشنى باشلىدى»، 2025-يىلى 3-ئاۋغۇست ئېلان قىلىنغان.
The Economic Times, “Cancer cure? Russia commences human trials of revolutionary personalized cancer vaccine,” published August 3, 2025. - «MedPath خەۋەرلىرى»، «روسىيەنىڭ شەخسىيلەشتۈرۈلگەن mRNA راك ۋاكسىنىسى 2025-يىلى ئۆكتەبىردە كىلىنىكىلىق سىناققا كىرىدۇ»، 2025-يىلى 27-ئىيۇن ئېلان قىلىنغان.
MedPath News, “Russia’s Personalized mRNA Cancer Vaccine Set for Clinical Launch by October 2025,” published June 27, 2025.
