ھامىلىدارلىق مەزگىلىدە ئاق خۇننىڭ كۆپىيىپ كېتىشى نورمالمۇ؟

سوخۇ تورى خەۋىرى، نۇر تورى تەرجىمىسى:

ئاياللار ھامىلىدار بولغاندىن كېيىن بەدىنىدە ھەر خىل مەسىلىلەر كۆرۈلىدۇ، بۇ ۋاقىتتا ھامىلىدار ئاياللارنىڭ پىسخىكىسىدا ناھايىتى زور بېسىم پەيدا بولىدۇ، بولۇپمۇ تۇنجى قېتىم ھامىلىدار بولغان ئانىلار كۈندىلىك تۇرمۇشتىكى بەزى كىچىك سالامەتلىك ئەھۋاللىرىغا ئانچە كۆڭۈل بۆلمەسلىكى مۇمكىن، ئاق خۇن كۆپ كېلىش گەرچە كۆپ كۆرۈلىدىغان ئاياللار كېسەللىكى بولسىمۇ، ئەمما ھامىلىدارلىق مەزگىلىدە بۇ نورمال ئەھۋالمۇ؟

ئادەتتىكى ئەھۋالدا ھامىلىدارلىق مەزگىلىدە ئاياللاردىكى ئاق خۇن كۆپىيىدۇ، شۇنىڭ بىلەن بىر ۋاقىتتا رەڭگى ئادەتتىكىدىنمۇ قېنىقراق بولۇشى مۇمكىن، بۇ بىر خىل نورمال فىزىيولوگىيەلىك ھادىسە. چۈنكى ئاياللار ھامىلىدار بولغاندىن كېيىن تۇخۇمدان تېخىمۇ كۆپ ئانىلىق ھورمۇن ئاجرىتىپ چىقىرىپ تۆرەلمىنىڭ ئورۇنلىشىش ۋە يېتىلىشىنى ساقلايدۇ، شۇنىڭ بىلەن بىر ۋاقىتتا بالىياتقۇ بوينى ۋە جىنسىي يول شىللىق پەردىسى ھامىلىدارلىق ھورمۇنىنىڭ تەسىرىدە تېخىمۇ كۆپ شىلىمشىق سۇيۇقلۇق ۋە تۆكۈلگەن ھۈجەيرىلەر ئارقا-ئارقىدىن ئېقىپ چىقىدۇ، شۇڭا بۇ خىل ھالەتتىن ئاياللار بەك قورقۇپ كەتمەسلىكى كېرەك.

ئانىلار ئاق خۇننىڭ كۆپىيىپ كېتىشىنى قانداق پەرقلەندۈرۈش كېرەك؟

1. ئاق خۇننىڭ ھالىتى

ئەگەر ھامىلىدار ئانىلار ئاق خۇننىڭ كۆپىيىش بىلەن بىر ۋاقىتتا، ئاق خۇننىڭ سۇلۇق، يېپىشقاق ياكى مەلھەمسىمان ھالەتتە ئىكەنلىكىنى بايقىسا، بۇنىڭغا دىققەت قىلىشى كېرەك، چۈنكى بۇ زەمبۇرۇغلۇق جىنسىي يول ياللۇغى يۇقۇملىنىشتىن كېلىپ چىققان بىنورمال ئەھۋال بولۇشى مۇمكىن.

2. ئاق خۇننىڭ پۇرىقى

نورمال، ساغلام ئاق خۇننىڭ پۇرىقى بولمايدۇ، ئەمما جىنسىي يول ياللۇغىغا گىرىپتار بولغان ئاق خۇندا ھەر خىل غەلىتە پۇراق بولىدۇ، ئەڭ تىپىك بولغىنى سېسىق پۇراقتۇر. بۇنداق ۋاقىتتا ۋاقتىدا دوختۇرخانىغا بېرىپ داۋالىنىش كېرەك، بولۇپمۇ ھامىلىدار ئاياللار بۇنى كەينىگە سۆرەشكە تېخىمۇ بولمايدۇ.

3. ئاق خۇننىڭ رەڭگى

نورمال ئاياللاردىكى ئاق خۇن ئاق رەڭدە بولىدۇ، ئەمما ھامىلىدار بولغاندىن كېيىن سەل سېرىق رەڭدە كۆرۈنىدۇ، بۇلارنىڭ ھەممىسى نورمال ئەھۋال. ئەمما ھامىلىدار ئاياللار ئاق خۇننىڭ سېرىق، يېشىل، كۈل رەڭ، قان ئارىلاش ئىكەنلىكىنى بايقىسا، تامچە قۇرتتىن يۇقۇملىنىشتىن كېلىپ چىققان جىنسىي يول ياللۇغىدىن ھوشيار بولۇشى كېرەك. چۈنكى تامچە قۇرتتىن ئىبارەت بۇ تۈردىكى باكتېرىيەلەر ئوكسىگېن كەمچىل مۇھىتتا ياشاشنى ياخشى كۆرىدۇ، شۇنداقلا يەنە جىنسىي ھەرىكەت ياكى شەخسىي يۇيۇنۇش بۇيۇملىرى ئارقىلىق يۇقۇملىنىدۇ. شۇڭا ھامىلىدار ئاياللار دوختۇرخانىغا بېرىپ داۋالانغاندىن سىرت، كۈندىلىك تۇرمۇشتا ئۆزىگە تەۋە بولغان شەخسىي يۇيۇنۇش بۇيۇملىرىنى ئىشلىتىپ، يۇقۇم مەنبەسىنى توسۇشى كېرەك.

مەنبە:
https://m.nur.cn/news/2023/12/18031013.shtml