تېرە ئاستى خالتىلىق ئىششىقى بىر خىل كۆپ ئۇچرايدىغان تېرە كېسەللىك ئۆزگىرىشى بولۇپ، تېرىنىڭ ئاستى تەرىپىدە شەكىللەنگەن سۇيۇقلۇق ياكى يېرىم قاتتىق ماددا بىلەن تولغان خالتىسىمان قۇرۇلما بولۇپ ئىپادىلىنىدۇ.
سەۋەبى:
1. تۈك خالتىسى ياللۇغى:تۈك خالتىسى يۇقۇملانغاندا، تېرە ئاستى خالتىلىق ئىششىقىنىڭ شەكىللىنىشىنى كەلتۈرۈپ چىقىرىشى مۇمكىن.
2. تېرە ياغ بېزى توسۇلۇش:تېرە ياغ بېزىنىڭ چىقىش ئېغىزى توسۇلۇپ قالغاندا، تېرە يېغى نورمال چىقىپ كېتەلمەي، تېرە ئاستى خالتىلىق ئىششىقىنى شەكىللەندۈرۈشى مۇمكىن.
3. زەخىملەنگەندىن كېيىنكى قالدۇق:تېرە زەخىملەنگەندىن كېيىن، توقۇلمىلارنى ئەسلىگە كەلتۈرۈش جەريانىدا نورمالسىزلىق كۆرۈلۈپ، تېرە ئاستى خالتىلىق ئىششىقىنىڭ شەكىللىنىشىنى كەلتۈرۈپ چىقىرىشى مۇمكىن.
4. ئىرسىيەت ئامىلى:بەزى كىشىلەردە ئىرسىيەت ئامىلى سەۋەبىدىن تېرە ئاستى خالتىلىق ئىششىقى تېخىمۇ ئاسان يۈز بېرىشى مۇمكىن.
5. باشقا سەۋەبلەر:مەسىلەن، پارازىت قۇرتتىن يۇقۇملىنىش، ياللۇغلىنىش خاراكتېرلىك كېسەللىك قاتارلىقلارمۇ تېرە ئاستى خالتىلىق ئىششىقىنى كەلتۈرۈپ چىقىرىشى مۇمكىن.
تەكشۈرۈش ۋە دىئاگنوز قويۇش ئۇسۇلى:
1. بەدەن تەكشۈرۈش:دوختۇر ئومۇميۈزلۈك بەدەن تەكشۈرۈش ئېلىپ بېرىپ، خالتىلىق ئىششىقنىڭ چوڭ – كىچىكلىكى، شەكلى، رەڭگى قاتارلىق ئالاھىدىلىكلىرىنى كۆزىتىدۇ.
2. تۇتۇپ تەكشۈرۈش:تۇتۇش ئارقىلىق خالتىلىق ئىششىقنىڭ قاتتىقلىقى، ھەرىكەتچانلىقى قاتارلىقلارغا ھۆكۈم قىلغىلى بولىدۇ.
3. ئۇلترا ئاۋاز دولقۇنىدا تەكشۈرۈش:ئۇلترا ئاۋاز دولقۇنى دوختۇرلارنىڭ خالتىلىق ئىششىقنىڭ ئورنى، چوڭ – كىچىكلىكى ۋە ئىچكى قۇرۇلمىسىنى تېخىمۇ ئېنىق چۈشىنىشىگە ياردەم بېرىدۇ.
4. تىرىك توقۇلما ئېلىپ تەكشۈرۈش:بەزى ئەھۋاللاردا، دوختۇر يامان سۈپەتلىك ئۆسمىنىڭ ئېھتىماللىقىنى تۈگىتىش ئۈچۈن تىرىك توقۇلما ئېلىپ تەكشۈرۈش تەكلىپىنى بېرىشى مۇمكىن.
5. تەجرىبىخانىدا تەكشۈرۈش:كېسەللىك تارىخى ۋە كېسەللىك ئالامەتلىرىگە ئاساسەن، دوختۇر قان تەكشۈرۈش، سۈيدۈك تەكشۈرۈش قاتارلىقلارنى تەۋسىيە قىلىپ، باشقا مۇمكىن بولغان كېسەللىكلەرنى چىقىرىپ تاشلىشى مۇمكىن.
داۋالاش ئۇسۇلى:
1. كۆزىتىپ كۈتۈش:ئەگەر خالتىلىق ئىششىق بىر قەدەر كىچىك ھەم كېسەللىك ئالامىتى بولمىسا، دوختۇر كۆزىتىپ ساقلاپ، ئۆزلۈكىدىن يوقاپ كەتكەن – كەتمىگەنلىكىگە قاراش تەكلىپىنى بېرىشى مۇمكىن.
2. پۇنكىسىيە قىلىپ سۈمۈرۈش:دوختۇر چوڭراق خالتىلىق ئىششىققا قارىتا ئىنچىكە يىڭنە بىلەن پۇنكىسىيە قىلىپ خالتىلىق ئىششىق ئىچىدىكى سۇيۇقلۇقنى سۈمۈرۈشى مۇمكىن. لېكىن بۇ ئۇسۇلنىڭ قايتا قوزغىلىش خەۋپى بار.
3. ئوپېراتسىيە قىلىپ ئېلىۋېتىش:قايتا – قايتا قوزغالغان ياكى تۇرمۇش سۈپىتىگە تەسىر يەتكۈزىدىغان خالتىلىق ئىششىقنى دوختۇر ئوپېراتسىيە قىلىپ ئېلىۋېتىش تەكلىپىنى بېرىشى مۇمكىن. ئوپېراتسىيە ئادەتتە قىسمەن ناركوز ئاستىدا ئېلىپ بېرىلىدۇ، ئوپېراتسىيىدىن كېيىن ئەسلىگە كېلىشى بىر قەدەر تېز بولىدۇ.
