يۈرەك شاۋقۇنى يۈرەكنىڭ قىسقىرىشى ۋە كېڭىيىش جەريانىدا، قان ئايلىنىشىنىڭ نورمالسىزلىقى ياكى يۈرەك قۇرۇلمىسىنىڭ نورمالسىزلىقى تۈپەيلىدىن پەيدا بولغان نورمالسىز يۈرەك تاۋۇشىنى كۆرسىتىدۇ.
ئۇيغۇرچە: يۈرەك شاۋقۇنى
ئىنگىلىزچە: heart murmur
خەنزۇچە: 心脏杂音
تۈركچە:kalp üfürüm
غەرب تېبابىتى نۇقتىسىدىن قارىغاندا، يۈرەك شاۋقۇنىنى تۆۋەندىكى بىر قانچە خىل سەۋەب كەلتۈرۈپ چىقىرىشى مۇمكىن:
1. تۇغما يۈرەك كېسىلى:بۇ ئەڭ كۆپ ئۇچرايدىغان يۈرەك شاۋقۇنى سەۋەبلىرىنىڭ بىرى. تۇغما يۈرەك كېسىلى تۇغۇلغاندا مەۋجۇت بولىدىغان يۈرەك قۇرۇلمىسىنىڭ نورمالسىزلىقىنى كۆرسىتىدۇ، قان ئايلىنىشىنىڭ نورمالسىزلىقىنى كەلتۈرۈپ چىقىرىپ، شاۋقۇن پەيدا قىلىشى مۇمكىن.
2. رېماتىزملىق يۈرەك كېسىلى:رېماتىزملىق يۈرەك كېسىلى زەنجىرسىمان شارچە باكتېرىيەسى بىلەن يۇقۇملىنىشتىن كېلىپ چىقىدىغان يۈرەك كىلاپانىنىڭ زەخىملىنىشى بولۇپ، كىلاپاننىڭ تولۇق يېپىلماسلىقى ياكى تارىيىشىنى كەلتۈرۈپ چىقىرىپ، شاۋقۇن پەيدا قىلىشى مۇمكىن.
3. يۈرەك مۇسكۇل كېسىلى:يۈرەك مۇسكۇل كېسىلى يۈرەك مۇسكۇلىنىڭ قۇرۇلمىسى ياكى ئىقتىدارىنىڭ نورمالسىزلىقىدىن كېلىپ چىقىدىغان كېسەللىك بولۇپ، يۈرەكنىڭ قىسقىرىش كۈچىنىڭ تۆۋەنلىشى ياكى يۈرەكنىڭ كېڭىيىشىنى كەلتۈرۈپ چىقىرىپ، شاۋقۇن پەيدا قىلىشى مۇمكىن.
4. يۈرەك قېپى ياللۇغى:يۈرەك قېپى ياللۇغى يۈرەك قېپى پەردىسى ياللۇغلىنىشتىن كېلىپ چىقىدىغان كېسەللىك بولۇپ، يۈرەك قېپىغا سۇ يىغىلىش ياكى يۈرەك قېپى قېلىنلاشنى كەلتۈرۈپ چىقىرىپ، يۈرەكنىڭ نورمال قىسقىرىشى ۋە كېڭىيىشىگە تەسىر كۆرسىتىپ، شاۋقۇن پەيدا قىلىشى مۇمكىن.
5. باشقا سەۋەبلەر:باشقا سەۋەبلەر، مەسىلەن، يۇقىرى قان بېسىم، تاجىسىمان يۈرەك كېسىلى، يۈرەك مۇسكۇل تىقىلمىسى قاتارلىقلارمۇ يۈرەك شاۋقۇنىنى كەلتۈرۈپ چىقىرىشى مۇمكىن.
يۈرەك شاۋقۇنىنى تەكشۈرۈش ۋە داۋالاشتا، ئالدى بىلەن كېسەللىك تارىخىنى تەپسىلىي سوراش ۋە بەدەن تەكشۈرۈش ئېلىپ بېرىپ، مۇمكىن بولغان كېسەللىك سەۋەبىنى بېكىتىش كېرەك. كېسەللىك ئەھۋالىنىڭ ئوخشىماسلىقىغا ئاساسەن، تۆۋەندىكى تەكشۈرۈشلەرنى ئېلىپ بېرىشقا توغرا كېلىدۇ:
1. ئېلېكترو كاردىئوگرامما ( شىنديەنتۇ ECG ):يۈرەكنىڭ توك چىقىرىش ئەھۋالىنى باھالاشقا ئىشلىتىلىدۇ.
2. ئۇلتىرا ئاۋاز دولقۇنلۇق كاردىئوگرامما:ئۇلتىرا ئاۋاز دولقۇنى ئارقىلىق يۈرەكنىڭ قۇرۇلمىسى ۋە ئىقتىدارىنى تەكشۈرگەندە، يۈرەك كىلاپانىنىڭ ئەھۋالىنى مۆلچەرلىگىلى بولىدۇ.
3. قان تەكشۈرۈش:قاننى قائىدىلىك تەكشۈرۈش، يۈرەك مۇسكۇل ئېنزىمى سپېكترى قاتارلىق كۆرسەتكۈچلەرنى ئۆز ئىچىگە ئالىدۇ، ياللۇغ ۋە يۈرەك مۇسكۇلىنىڭ زەخىملىنىش دەرىجىسىنى باھالاشقا ئىشلىتىلىدۇ.
4. X نۇرى ياكى CT تەسۋىر كۆچۈرۈش:يۈرەك ۋە كۆكرەك قىسمىنىڭ قۇرۇلما ئەھۋالىنى باھالاشقا ئىشلىتىلىدۇ.
داۋالاش لايىھىسى كونكرېت كېسەللىك سەۋەبىگە ئاساسەن بېكىتىلىدۇ. تۇغما يۈرەك كېسىلى قاتارلىق ئېغىر كېسەللىكلەرگە ئوپېراتسىيە قىلىش ياكى باشقا داۋالاش ئۇسۇللىرىنى قوللىنىشقا توغرا كېلىدۇ. يېنىك دەرىجىدىكى يۈرەك شاۋقۇنىغا قارىتا، دورا بىلەن داۋالاش ئارقىلىق كېسەللىك ئالامىتىنى پەسەيتكىلى بولىدۇ. ئۇنىڭدىن باشقا، ساغلام تۇرمۇش ئۇسۇلىنى ساقلاش، مەسىلەن، تاماكا تاشلاش، قان بېسىمىنى كونترول قىلىش، قەرەللىك چېنىقىش قاتارلىقلارمۇ يۈرەك شاۋقۇنىنىڭ ئالدىنى ئېلىش ۋە باشقۇرۇشقا پايدىلىق.
