بۇ فىلىمدە بىز تۇغۇلۇپ 2 ئايلىق بولغان بوۋاقلارغا مۇناسىۋەتلىك ئۇچۇرلارنى سىزلەر بىلەن ھەمبەھىرلىنىمىز.
2 ئايلىق بولغان ساغلام بوۋاقلارنىڭ بەدەن سانلىق ئۇچۇرلىرى
- 2 ئايلىق ساغلام بوۋاقلارنىڭ باش ئايلانمىسى: 37 – 41.3 سانتىمېتىر بولىدۇ.
- بوي ئۇزۇنلۇقى: 54.7 – 62.2 سانتىمېتىر بولىدۇ.
- بەدەن ئېغىرلىقى: 4400 – 7000 گىرام بولىدۇ.
2 ئايلىق بوۋاقلارنىڭ بەدەندىكى ئۆزگىرىشلىرى
2 ئايلىق بوۋاق كۈندە 12-15 سائەت ئەتراپىدا ئۇخلىشى مۇمكىن، ئېغىرلىقى ھەر ھەپتىدە 150-200 گرام ئېشىپ ماڭىدۇ، كۈندۈزى 3-3.5 سائەتتە بىر قوسقى ئاچىدۇ، كېچىسى 4-5 سائەتتە بىر قوسقى ئاچىدۇ. بوۋاق كۈندە 3-4 قىتىم چوڭ تەرەت قىلىشى مۇمكىن. بۇ ئايدىكى بوۋاق دۈمچىلەپ ياتقاندا، بېشىنى كۆتۈرەلەيدۇ. بېشىنى تىك تۇتۇشقا ئامراق بولىدۇ. مىدىرلاۋاتقان جىسىملەرنى 180 گىرادۇس بېشىنى ئوڭ سولغا بۇراش ئارقىلىق قارىيالايدۇ. جىسىملەرنىڭ كۆرۈش دائىرىسىدە يوق بولغان نۇقتىغا تىكىلىپ قارايدۇ. ( مەسىلەن بىر كىشى ئىشىكتىن چىقىپ كەتكەندە ئىشىككە تىكىلىپ قارايدۇ. ) ئاپىسىنى تونۇشقا باشلايدۇ. كۆزىڭىزگە تىكىلىپ قاراشقا باشلايدۇ. كۈلۈمسىرەش ئارقىلىق مەمنۇن بولغىنى ئىپادىلىيەلەيدۇ. ئۆزىگە خاس بولغان ئاۋازلارنى چىقىرالايدۇ.
2 ئايلىق بوۋاققا ۋە ئاتا ئانىغا تەۋسىيەلىرىمىز:
- بۇ ئايدىكى بوۋاقنى 24 سائەت ئىچىدە جەمئىي 6-10 قېتىمغىچە ئەمزىرسىڭىز بولىدۇ.
- بوۋاقلار ئىتتىك ئۆسىدىغان بولغاچلا، تۆمۈر ۋە ۋىتامىن د تولۇقلاپ بېرىڭ. ساقلىقنى ساقلاش مەركىزىدىكى دوختۇر ياكى دورىگەر بوۋىقىڭىزغا ئۇيغۇن بولغان ۋىتامىن دورىسىنى دەپ بېرىدۇ.
- ساقلىقنى ساقلاش مەركىزىدە 2.ئايلىق ۋاكسىنىلىرىنى ئەملەشكە چاقىرىدۇ. ئەگەر چاقىرماي قالسا، چوقۇم بېرىپ سوراپ بېقىڭ. بۇ ئايدا مۇھىم بولغان تۇبىركۇليۇز ۋاكسىنىسى، بەش بىرلەشتۈرۈلگەن ۋاكسىنا، ۋە ئۆپكە ياللۇغى ۋاكسىنىسى ئەملىنىشى مۇمكىن.
- ئەگەر بۇ ئايغا كىرگۈچە، بوۋاقتا ھىچ كۈلۈمسىرەش بولمىسا، بەدەندە قايتىدىن سېرىقلىق پەيدا بولسا، بەدەننىڭ بىر تەرىپىنى يەنە بىر تەرىپىگە نىسبەتەن ئاز ھەرىكەت قىلسا، بارماقلىرىنى مۇشتۇم شەكىلگە تۈگۈۋېلىپ ھىچ ئاچمىسا، شۇنچە پەپىلىسىمۇ ھىچ جىم بولماي يىغلاۋەرسە ياكى ئىشتىھاسى زىيادە تۆۋەنلەپ كەتسە، بوۋاق كىچىك تەرىتى ۋە چوڭ تەرىتىدە بىنورمال قان ياكى بىنورمال پۇراق بولسا دوختۇر بىلەن كۆرۈشۈپ بېقىڭ.
قانىلىمىزدا 12 ئاي ۋە ئۇنىڭدىن چوڭ بولغان بوۋاق بالىلارنىڭ ھەرقايسى ياش دەۋرىدە بەدەندە كۆرۈلىدىغان ئۆزگىرىشلەرنى ۋە تەۋسىيەلەرنى قىسقا، ئىخچام، مېغىزلىق قىلىپ رەتلەپ چىقتۇق. ئەگەر يۇقىرىدا دېيىلگەن ئۆزگىرىشلەرنىڭ يېرىمىغا يېقىنى كۆرۈلمىسە ياكى بىنورماللىق كۆرۈلسە، ئائىلە دوختۇرىڭىز ۋەيا بالىلار دوختۇرى بىلەن ۋاقتىدا كۆرۈشۈپ بېقىشىڭىزنى تەۋسىيە قىلىمەن. بۇنىڭدىن سىرت دوختۇرلار تور بېكىتىمىزدىنمۇ ئانا يېزىقىمىز ئۇيغۇر تىلىدا تەييارلانغان بوۋاق بالىلارنىڭ بەدەن يېتىلىشى جەدۋىلى ۋە باشقا ياخشى پايدىلىق مەزمۇنلارنى تاپالايسىز. جىددىيلەشمەڭ، سىز چوقۇم ياخشى ئاتا ئانا بولالايسىز. بوۋىقىڭىزنىڭ سالامەت چوڭ بولۇشىغا تىلەكداشمەن. بۇ فىلىمنى پايدىلىق ھېس قىلسىڭىز، قانىلىمىزغا مۇشتەرى بولۇڭ ھەم قانىلىمىزنى ئەتراپىڭىزدىكى دوستلارغا تارقىتىپ قويۇڭ.
