راك خاراكتېرلىك يارا ( Malignant Ulcer ) يەنە راك يارىسى دەپمۇ قىسقارتىلىپ ئاتىلىدۇ. بۇ يامان سۈپەتلىك ئۆسمە كەلتۈرۈپ چىقارغان سوزۇلما يارا خاراكتېرلىك زەخىملىنىش بولۇپ، تېرە، ئېغىز بوشلۇقى، ئاشقازان – ئۈچەي يولى ۋە سۈت بېزى قاتارلىق ئورۇنلاردا كۆپ كۆرۈلىدۇ. ئۇنىڭ ئالاھىدىلىكى يارىنىڭ گىرۋىكى تەرتىپسىز، توقۇلمىلىرى قاتتىق، ئۆزلۈكىدىن ساقىيىشى تەس، ئادەتتە ئاغرىش، قاناش ۋە ئاجرالمىلار كۆپىيىش بىلەن بىللە كۆرۈلىدۇ. راك يارىسى بىمارنىڭ تۇرمۇش سۈپىتىگە ئېغىر تەسىر يەتكۈزۈپلا قالماي، يەنە راك كېسىلىنىڭ تەرەققىي قىلىشى ياكى قايتا قوزغىلىشىدىن بېشارەت بېرىشى مۇمكىن، شۇڭا بۇنىڭغا ئالاھىدە دىققەت قىلىشقا ئەرزىيدۇ.
ئۇيغۇرچە / Uyghurche : راك خاراكتېرلىك يارا
ئىنگىلىزچە / English : Malignant Ulcer
تۈركچە / Türkçe : Malign ülser
خەنزۇچە / 汉语 : 癌性溃疡
راك خاراكتېرلىك يارا پەيدا بولۇش سەۋەپلىرى ۋە كېسەللىك ئالامەتلىرى
راك خاراكتېرلىك يارىنىڭ شەكىللىنىشى ئۆسمىنىڭ ھۇجۇم خاراكتېرلىك ئۆسۈشى بىلەن زىچ مۇناسىۋەتلىك بولۇپ، ئۆسمە توقۇلمىلىرى نورمال ھۈجەيرىلەرنى بۇزۇش ئارقىلىق، يەرلىك ئورۇننىڭ نېكروزلىنىشى (قانسىزلىنىشى) ۋە توقۇلمىلارنىڭ يېرىلىشىنى كەلتۈرۈپ چىقىرىپ، يارا پەيدا قىلىدۇ. تىپىك كېسەللىك ئالامەتلىرى جاھىل خاراكتېرلىك ئاغرىش، يارا ئەتراپى قىزىرىپ ئىششىش، ئاجرالمىلار سېسىق پۇراش قاتارلىقلارنى ئۆز ئىچىگە ئالىدۇ، شۇنىڭ بىلەن بىر ۋاقىتتا يۇقۇملىنىش ۋە داۋاملىق قاناش ئەگىشىپ كېلىپ، پەرۋىش قىلىشنىڭ قىيىنلىق دەرىجىسىنى ئاشۇرۇۋېتىشى مۇمكىن.
داۋالاش ۋە پەرۋىش قىلىش
راك خاراكتېرلىك يارىنى داۋالاشتا ئادەتتە پۈتۈن بەدەندىكى ئۆسمىگە قارشى داۋالاش ۋە قىسمەن جاراھەت يۈزىنى باشقۇرۇش، جۈملىدىن ئۆسمىگە قارشى دورىلار، رادىئاتسىيىلىك داۋالاش، ئوپېراتسىيە قاتارلىقلارنى ئۇنىۋېرسال داۋالاشقا توغرا كېلىدۇ. يەرلىك ئورۇننى پەرۋىش قىلىشتا ئاساسلىقى يۇقۇملىنىشنى كونترول قىلىش، ئاغرىقنى يېنىكلىتىش، جاراھەت يۈزىنىڭ ساقىيىشىنى ئىلگىرى سۈرۈش، دائىم ئىشلىتىلىدىغان دېزىنفېكسىيە دورىسى ۋە باكتېرىيەگە قارشى تېڭىق ماتېرىياللىرى بىلەن يارا رايونىنى پەرۋىش قىلىپ، يەنىمۇ يامانلىشىپ كېتىشنىڭ ئالدىنى ئېلىش كېرەك. كېسەللىك ئەھۋالىغا ئاساسەن مۇۋاپىق بىر تەرەپ قىلىش ئۇسۇلىنى قوللانغاندا يارا ئالامەتلىرىنى پەسەيتىپ، بىمارنىڭ تۇرمۇش سۈپىتىنى يۇقىرى كۆتۈرگىلى بولىدۇ.
راك خاراكتېرلىك يارىنى بالدۇر بايقاش ۋە ئاكتىپ داۋالاش كېسەلنىڭ ئاقىۋىتىنى ياخشىلاشتا ئىنتايىن مۇھىم، مۇۋاپىق پەرۋىش قىلىش ۋە باشقۇرۇش بىمارنىڭ ئازابىنى يېنىكلىتىشكە پايدىلىق بولۇپلا قالماي، يەنە ئومۇمىي داۋالاش ئۈنۈمىنى يۇقىرى كۆتۈرىدۇ.
