سۇ ئۈزگەندە پاقالچاقتىكى پەيلەر تارتىشىپ قېلىشنىڭ ئىككى خىل سەۋەبى بار. بىرى تەييارلىق خىزمىتى ياخشى ئىشلەنمەي، ئەمدىلا سۇغا چۈشكەن ۋاقتىدا، سوغۇق سۇنىڭ غىدىقلىشىدىن مۇسكۇللاردا رېفلېكىس خاراكتېرلىك جىددىيلىك پەيدا بولۇپ، پاقالچاقمۇسكۇللىرىنىڭ تارتىشىپ قېلىشىنى كەلتۈرۈپ چىقىرىدۇ. يەنە بىرى ئۈزۈش جەريانىدا قاتتىق ھەرىكەت قىلغانلىقتىن مۇسكۇل مىقدارىدىكى گىلىكوگېنىنى سەرپ قىلىدۇ. بۇنىڭدىن پەيدا بولغان سۈت كىسلاتاسى قاتارلىق ماددا ئالمىشىشتىن كېلىپ چىققان نەرسىلەر قاندىن بىراقلا چىقىپ كېتەلمەي قالىدۇ. شۇنىڭ بىلەن پاقالچاقتىكى مۇسكۇللارنىڭ تۇتقاقلىق خاراكتېرلىك قىسقىرىشىنى، پاقالچاقتىكى پەيلەرنىڭ تارتىشىپ قېلىشىنى كەلتۈرۈپ چىقىرىدۇ.
پەي تارتىشىپ قېلىش ئەگەر بىرىنچى خىل ئەھۋالدىن كېلىپ چىققان بولسا، پەي تارتىشقان ۋاقتىدا پاقالچاقنى كۈچ بىلەن ئۇۋۇلاپ ياكى پۇتىنى باشقا كىشىگە كۈچ بىلەن بىر نەچچە قېتىم تارتقۇزۇپ، ئاندىن پاقالچاقنى بىر نەچچە قېتىم ئۇۋۇلاتسىلا ياخشى بولۇپ قالىدۇ.
ئىككىنچى ئەھۋالغا يولۇقۇپ سۇئۈزۈش جەريانىدا پەي تارتىشىپ قالغاندا، جىددىيلىشىپ كەتمەي، ئالدى بىلەن چوڭقۇر بىر نەپەس ئېلىۋىلىش كېرەك. سۇنىڭ ئۈستىگە لەيلىگەندە بىر مىنۇتتىن كېيىنلا تارتىشىپ قالغان پەيلەر ئۆزلىكىدىن قويۇپ بېرىدۇ.
ئۇنىڭدىن باشقا، ئىككى قول بىلەن پۇتنى تۇتۇپ تۇرۇپ پۇتنى ئۈستىگە قارىتىپ قاتتىق قايرىغاندا، ياكى باش بارماق بىلەن پاقالچاقنى كۈچلۈك باسقاندىمۇ تارتىشىپ قالغان پەيلەر بوشۇشىدۇ.
ئەگەر سۇ ئۈزۈش تېخنىكىسى ياخشى بولمىسا، ئىمكانىيەتنىڭ بارىچە تېزراق قىرغاققا چىقىۋېلىش ياكى باشقىلارنى ياردەمگە چاقىرىش كېرەك.
