سۆڭەك سۇنغاندا كۆپ ساندىكى ياشانغانلاردا كالتسىي ئاز بولغاچقا، سۆڭىكى شالاڭلىشىپ ئاسانلا سۇنۇپ كېتىدۇ بۇنداق چاغدا ئالدىراپ ئورنىدىن تۇرماي، ئۈگىلىرىنى ھەرىكەتلەندۈرۈپ بېقىش، سوزۇلمىسا ياكى قايرىلمىسا قۇتقۇزۇشقا ئادەم چاقىرىش كېرەك
سۇنۇق ئىككى تۈرگە بۆلۈنىدۇ. بىرى، ئوچۇق سۇنۇق: بۇنداق سۇنۇقتا تېرە يۇمشاق تۇقۇلمىلىرى زەخىملەنگەن بولغاچقا، توختىماي قان چىقىپ تۇرىدۇ ياكى ئۈزۈلگەن سۆڭەك كۆرۈنۈپ قالىدۇ. بۇنداق يارىدارنى يۈدۈشكە، دورا بېرىشكە ياكى شۇ زامات سۇنۇقنى جايىغا چۈشۈرۈشكە بولمايدۇ. (1) سۇنغان يەرنى ئوبدان مۇھاپىزەت قىلىپ، ئىمكانقەدەر پاكىز لاتا ياكى مىكروبسىزلاندۇرۇلغان تېڭىق ماتېرىيالى بىلەن تېڭىش كېرەك. (2) سۇنغان سۆڭەك ئورنىدىكى مۈچىلەرنى مۇقىملاشتۇرسا ھەم بالدۇرراق دوختۇرخانىغا ئاپىرىپ، يۇقۇملىنىش ۋە قان چىرىشنىڭ ئالدىنى ئېلىش كېرەك.
يەنەبىرى، يېپىق سۇنۇق: بۇنداق سۇنۇقتا سۆڭەك سۇنغان بىلەن يۇمشاق تۇقۇلمىلار ساق بولىدۇ. بۇنداق سۇنۇقتا ئادەتتە ئۈچ خىل ئەھۋال كۆرۈلىدۇ: (1) ئاغرىيدۇ، بولۇپمۇ تۇتسا ياكى مىدىرلاتسا قاتتىق ئاغرىيدۇ. (2) ئىششىيدۇ، تېرە ئاستى قاناپ كۆكۈش سۆسۈن رەڭ پەيدا بولىدۇ. (3) شەكىل ئۆزگىرىشى كۆرۈلىدۇ، بولۇپمۇ ئۈگە يېنىنىڭ ئىششىغانلىقى ۋە شەكىل ئۆزگىرىشى ئېنىق بىلىنىپ تۇرىدۇ.
سۆڭەك سۇنغان جاينىڭ ئەھۋالى ئوخشىمىغاچقا، قۇتقۇزغاندا شۇجاينىڭ ئەھۋالىغا قاراپ، سۇنۇقنى مۇقىملاشتۇرۇش كېرەك. سۇنغان جاينىڭ ئۈستى – ئاستى ئۇچىنى ئىگىلمەيدىغان تاختايغا تېڭىپ ياكى سۇنغان پۇت – قولنى بەدەنگە مەھكەم باغلاپ مىدىرلىمايدىغان قىلىش لازىم. ئەمما تاڭغاندا چىڭ تېڭىۋەتمەسلىك، قول ياكى پۇت بارماقلىرىنىڭ رەڭگىنى ۋە قان تومۇرلارنىڭ سوقۇش ئەھۋالىنى بەش – ئون مىنۇت كۆزىتىش لازىم.
