يۈرەككە كۆۋرۈك سېلىش ئوپېراتسىيەسى تاجىسىمان ئارتېرىيە كېسىلىنى داۋالاشتا كۆپ ئۇچرايدىغان بىر خىل ئۇسۇل بولۇپ، بىمارنىڭ ئۆزىدىكى قان تومۇرلارنى ئىشلىتىش ياكى سۈنىي قان تومۇرلارغا كۆۋرۈك سېلىش ئارقىلىق توسۇلغان ئارتېرىيەدىن ئايلىنىپ ئۆتۈپ، يۈرەكنىڭ قان بىلەن تەمىنلىنىشىنى ئەسلىگە كەلتۈرىدۇ. ھالبۇكى، ئەنئەنىۋى سۈنئىي قان تومۇر ماتېرىياللىرىدا بىئولوگىيەلىك سىغىشىشچانلىقى ناچار بولۇش، ئاسان توسۇلۇپ قېلىش قاتارلىق مەسىلىلەر مەۋجۇت بولۇپ، ئوپېراتسىيەنىڭ ئۇزاق مۇددەتلىك ئۈنۈمىگە تەسىر يەتكۈزىدۇ.
يېقىندا تەتقىقاتچىلار بىر خىل يېڭى تىپتىكى سۈنئىي قان تومۇر ماتېرىيالىنى كەشىپ قىلىپ، يۈرەككە كۆۋرۈك سېلىش ئوپېراتسىيەسىنىڭ ئۈنۈمىنى كۆرۈنەرلىك ياخشىلىدى. بۇ خىل يېڭى ماتېرىيال بىر خىل ئالاھىدە پولىمېردىن ياسالغان بولۇپ، تېخىمۇ ياخشى بىئولوگىيىلىك ماسلىشىشچانلىققا ۋە چىدامچانلىققا ئىگە. تەتقىقاتلاردىن مەلۇم بولۇشىچە، بۇ خىل ماتېرىيال ئوپېراتسىيەدىن كېيىن قان تومۇرلارنىڭ توسۇلۇپ قېلىش خەۋپىنى ئازايتىپ، قاننىڭ ئېقىشچانلىقىنى ۋە ئۇزاق مۇددەتلىك مۇقىملىقىنى يۇقىرى كۆتۈرىدىكەن. ھايۋانات تەجرىبىسىدە، بۇ خىل يېڭى ماتېرىيالدىن ياسالغان سۈنئىي قان تومۇرنىڭ ئۇزۇن مۇددەت ئىشلىتىش جەريانىدا ئىپادىسى ئالاھىدە ياخشى بولۇپ، تىببىي داۋالىنىش نۇقتىسىدىن قارىغاندا ناھايىتى يۇقىرى يوشۇرۇن كۈچىنى نامايان قىلغان.
بۇ خىل يېڭى تىپتىكى سۈنئىي قان تومۇر ماتېرىيالىغا ئۆزگىچە پىششىقلاپ ئىشلەش ئۇسۇلى قوللىنىلغان بولۇپ، ئۇنىڭ سىرتقى يۈزى تېخىمۇ سىلىق ئىكەن، ۋە بۇ ئارقىلىق قان ئاققاندىكى سۈركىلىش ۋە قارشىلىق كۈچىنى ئازايتالايدىكەن. بۇنىڭدىن باشقا، تەتقىقاتچىلار يەنە ماتېرىيالغا قان ئۇيۇشقا قارشى تەركىبلەرنى قوشۇپ، ئوپېراتسىيەدىن كېيىن قان تومۇر ئىچىدە قان نۆكچىسى شەكىللىنىشنىڭ ئالدىنى ئالغان. تەجرىبە نەتىجىسىدىن مەلۇم بولۇشىچە، ئەنئەنىۋى ماتېرىياللارغا سېلىشتۇرغاندا، بۇ خىل يېڭى ماتېرىيالدىن ياسالغان سۈنئىي قان تومۇرلارنىڭ كۆچۈرۈلگەندىن كېيىنكى بىر يىل ئىچىدىكى راۋانلىق نىسبىتى كۆرۈنەرلىك يۇقىرى كۆتۈرۈلگەن، شۇنىڭ بىلەن بىر ۋاقىتتا ئوپېراتسىيەدىن كېيىنكى ئەگەشمە كېسەللىكلەرنىڭ يۈز بېرىشىمۇ ئازايغان.
بۇ ئىلگىرىلەش يۈرەك كېسىلى بىمارلىرىغا يېڭى داۋالاش تاللىشى ئېلىپ كەلمەكتە. يەنىمۇ ئىلگىرىلىگەن ھالدا تەتقىق قىلىش ۋە كىلىنىكىلىق تەجرىبىنىڭ ئىلگىرى سۈرۈلۈشىگە ئەگىشىپ، بۇ خىل يېڭى تىپتىكى سۈنئىي قان تومۇرنىڭ كەلگۈسىدىكى يۈرەككە كۆۋرۈك سېلىش ئوپېراتسىيەسىدە كەڭ كۆلەمدە ئىشلىتىلىپ، تېخىمۇ بىخەتەر ۋە ئۈنۈملۈك داۋالاش لايىھەسى بىلەن تەمىنلەپ، بىمارنىڭ ئاقىۋىتىنى ياخشىلىشىدىن ئۈمىد بار. تەتقىقاتچىلار يەنە بۇ خىل ماتېرىيالنىڭ باشقا قان تومۇر ئوپېراتسىيەسىدىكى يوشۇرۇن كۈچى ئۈستىدە ئىزدىنىشنى پىلانلىدى، مەسىلەن، ئەتراپ ئارتېرىيە كېسىلىنى ئوپىراتسىيىلىك داۋالاشلاردا قوللىنىشچانلىقى قاتارلىقلار ئۈستىدە ئىزدىنىش باشلىنىش ئالدىدا تۇرماقتا ئىكەن.
مەنبە:
ScienceDaily – Artificial Blood Vessels
