ھازىرقى زامان تۇرمۇشىمىزدا، كومپيۇتېر ۋە يانفون خىزمەت ۋە كۆڭۈل ئېچىشتىكى مۇھىم قورالغا ئايلاندى. مەيلى كېچىچە ئىسمېنا ئىشلەش ، تورغا چىقىش ياكى ئويۇن ئويناش ۋە فىلىم كۆرۈش بولسۇن، كۆپىنچە ئەھۋاللاردا، ئۇخلاشتىن بۇرۇن بۇ ئېلېكترونلۇق ئۈسكۈنىلەرنى ئىشلىتىشنى ئاخىرلاشتۇرىمىز. ئۇخلاشتىن بۇرۇن كومپيۇتېرنى ئىشلىتىپ بولغاندىن كېيىن، ئەڭ ياخشىسى يۈز يۇيۇش ئادىتىنى يېتىلدۈرۈش كېرەك.
تۆۋەندە بۇنىڭ سەۋەپلىرىنى چۈشەندۈرۈپ ئۆتەيلى :
1. ئېكران رادىئاتسىيىسىنىڭ تېرىگە بولغان زىيىنىنى ئازايتقىلى بولىدۇ.
كومپيۇتېر ۋە يانفون ئېكرانى كۆك نۇر قويۇپ بېرىدۇ، بۇ خىل نۇرنى كۆرگىلى بولمىسىمۇ، تېرىگە بەلگىلىك تەسىر كۆرسىتىدۇ. تەتقىقاتلاردىن مەلۇم بولۇشىچە، كۆك نۇر بىلەن ئۇزاق مۇددەت ئۇچراشقاندا تېرىنىڭ ئوكسىدلىنىش سېزىمچانلىقىنى كەلتۈرۈپ چىقىرىپ، تېرىنىڭ قېرىشىنى تېزلىتىۋېتىدىكەن. بۇ نۇرغۇن كىشىلەرنىڭ كومپيۇتېر ئىشلەتكەندىن كېيىن تېرىسىنىڭ قۇرغاقلىشىپ ھارغىنلىق ھېس قىلىشىنىڭ سەۋەبىنىڭ بىرسى ئىكەن. ئۇخلاشتىن بۇرۇن يۈزنى يۇيغاندا كۆك نۇرنىڭ تېرىنىڭ سىرتقى قەۋىتىگە بولغان تەسىرىنى ئۈنۈملۈك تازىلاپ، رادىياتسىيە قالدۇقىدىن كېلىپ چىقىدىغان تېرە مەسىلىسىدىن ساقلانغىلى بولىدۇ.
2. تېرە يۈزىدە يىغىلىپ قالغان چاڭ – توزان ۋە ماي تازىلىغىلى بولىدۇ.
كومپيۇتېرنى ئۇزۇن ۋاقىت ئىشلەتكەندە، تېرىمىزنىڭ ماي ئاجرىتىپ چىقىرىشى بىر قەدەر كۆپ بولىدۇ. شۇنىڭ بىلەن بىر ۋاقىتتا ھاۋادىكى چاڭ – توزان ۋە بۇلغىمىلار يۈزىمىزگە تېخىمۇ ئاسان يېپىشىۋالىدۇ. ئەگەر ۋاقتىدا تازىلانمىسا، بۇ ماي ۋە چاڭ – توزانلار تەر تۆشۈكچىلىرىنى توسۇۋېلىپ، قارا باش، دانىخورەك، دانىخورەك قاتارلىق مەسىلىلەرنى كەلتۈرۈپ چىقىرىدۇ. ئۇخلاشتىن بۇرۇن يۈز يۇيۇش بۇ كىرلەرنى چىقىرىپ تاشلاشقا ياردەم بېرىدۇ، تەر تۆشۈكچىلىرىنىڭ راۋانلىقىنى ساقلايدۇ، دانىخورەك ۋە تېرىنىڭ تۇتۇق بولۇپ قېلىشىنىڭ ئالدىنى ئالىدۇ.
3. كۆز چارچاش ئازايتىپ ئۇيقۇنى ياخشىلايدۇ.
ئېكرانغا ئۇزاق ۋاقىت تىكىلىپ تۇرغاندا كۆز چارچايدۇ، كۆز قۇرغاقلىشىش، قان تولۇشنى كەلتۈرۈپ چىقىرىدۇ، ھەتتا كۆرۈش قۇۋۋىتى غۇۋالىشىش ئەھۋاللىرى كۆرۈلىدۇ. ئىلمان سۇ بىلەن يۈزنى يۇيغاندا كۆز ئەتراپىدىكى تېرە ۋە مۇسكۇللارنى تىنچلاندۇرۇپ، كۆزنى راھەتلىگىلى بولىدۇ. بۇنىڭدىن باشقا، ئىلمان سۇ يۈز قىسمىدىكى نېرۋا ۋە مۇسكۇللارنى غىدىقلاپ، ئادەمنى تېخىمۇ ئازادە ھېس قىلدۇرىدۇ، شۇنىڭ بىلەن ئۇيقۇ ھالىتىگە تېخىمۇ تېز كىرىپ، ئۇيقۇ سۈپىتىنى يۇقىرى كۆتۈرىدۇ.
4. روھىي جەھەتتىن راھەتلىكنى ئاشۇرغىلى بولىدۇ.
يۈز يۇيۇش «ئېكران دۇنياسى» دىن «رېئال تۇرمۇش» قا ئۆتۈشتىكى بىر خىل ئاددىي مۇراسىم دەپ چۈشەنسىڭىز بولىدۇ. ھەر كۈنى ئۇخلاشتىن بۇرۇن كومپيۇتېرنى ئىشلىتىپ بولغاندىن كېيىن يۈزنى يۇيغاندا، چوڭ مېڭىمىز بۇنىڭ بىر كۈننىڭ ئاخىرلاشقانلىقىنى ھېس قىلىشىغا ياردەم بېرىپ، جىسمانىي ۋە روھىي جەھەتتىن ئازادە بولۇپ، كۈندۈزدىكى ئالدىراش ھالەتتىن تەدرىجىي يىراقلىشىشىغا ياردەم بېرىدۇ. نۇرغۇن پىسخولوگلارنىڭ كۆرسىتىشىچە، ئۇخلاشتىن بۇرۇنقى بۇ «مۇراسىم» مېڭىنىڭ راھەتلىنىشىگە پايدىلىق بولۇپ، ئېلېكتىرونلۇق ئۈسكۈنىلەرنى ئۇدا ئىشلىتىش سەۋەبىدىن كېلىپ چىقىدىغان زىيادە ھاياجانلىنىشتىن ساقلانغىلى بولىدىكەن ۋە بۇ تېخىمۇ تېز چوڭقۇر ئۇيقۇغا كىرىشكە پايدىلىق ئىكەن.
5. تېرىنىڭ ياشلىق كۈچىنى ساقلاپ قېلىشقا پايدىلىق.
كېچە تېرىنىڭ ئۆزىنى ئەسلىگە كەلتۈرۈش ۋە ماددا ئالماشتۇرۇشنىڭ ھالقىلىق مەزگىلى. يۈزنى پاكىزلىغاندا تېرىگە پاكىز مۇھىت يارىتىپ، تەر تۆشۈكچىلىرىنى تېخىمۇ ئاسان سۈمۈرۈپ، ھۈجەيرىلەرنىڭ قايتا ئۆسۈشىنى ئىلگىرى سۈرگىلى بولىدۇ. شۇنىڭ بىلەن بىر ۋاقىتتا، يۈزنى يۇيۇپ بولغاندىن كېيىن مۇۋاپىق مىقداردا نەملىك ساقلاش ياكى ئەسلىگە كەلتۈرۈش تىپىدىكى تېرە ئاسراش بۇيۇملىرىنى سۈركەپ بەرسە، تېرىنىڭ كېچىدە ئەسلىگە كېلىش ئىقتىدارىنى يەنىمۇ كۈچەيتكىلى بولىدۇ. بۇ باسقۇچ تېرىنىڭ ئېلاستىكىلىقى ۋە پارقىراقلىقىنى ساقلاشقا ياردەم بېرىپلا قالماي، يەنە قېرىشنى كېچىكتۈرىدۇ.
ئەمىسە، يۈزىمىزنى قانداق قىلغاندا ئۈنۈملۈك يۇيغىلى بولىدۇ؟
يۈز يۇيۇش پەقەت ئاددىيلا سۇ بىلەن يۇيۇش ئەمەس، بەلكى توغرا بولغان يۈز يۇيۇش ئۇسۇلىنى ئىشلىتىش ئىنتايىن مۇھىم.
ئىلمان سۇ ئىشلىتىش : زىيادە ئىسسىق ياكى زىيادە سوغۇق سۇ تېرىنى تازىلاشقا ئانچە ئۇيغۇن كەلمەيدۇ. ئىلمان سۇ تەر تۆشۈكچىلىرىنى نورمال كېڭەيتىپ، چوڭقۇر قاتلاملارنىڭ پاكىزلىقىغا پايدىلىق.
تېرىگە ماس كېلىدىغان مەھسۇلاتلىرىنى تاللاش : ئوخشاش بولمىغان تېرە مەھسۇلاتلىرىغا بولغان ئېھتىياجى ئوخشاش بولمايدۇ، شۇڭا تېرىڭىزگە ئۇيغۇن مۇۋاپىق بولغان يۈز تازىلاش مەلھىمى ياكى يۈز تازىلاش ماغزىپىنى تاللاش كېرەك. ئىشقارلىقى زىيادە يۇقىرى بولغان سوپۇن تۈرىدىكى مەھسۇلاتلارنى ئىشلىتىشتىن ساقلىنىش كېرەك.
يۈز يېنىك ئۇۋۇلاپ يۇيۇش : يۈزنى يېنىك ئۇۋۇلاپ بەرسە، قان ئايلىنىشقا پايدىلىق، شۇنداقلا ھارغىنلىقنى پەسەيتىشكە ياردەم بېرىدۇ.
تېرىنىڭ نەملىكىنى ساقلاشقا ئەھمىيەت بېرىش : يۈزنى يۇيۇپ بولغاندىن كېيىن، ئىمكانقەدەر تېرىنى ئۇزۇن ۋاقىت قۇرغاق ھاۋاغا ئۇچراشتۇرماسلىق، ئەڭ ياخشىسى دەرھال مۇۋاپىق مىقداردا نەملىك ساقلاش مەھسۇلاتلىرىنى سۈركەپ، تېرىنىڭ سۇ تەركىبىنى ساقلاش كېرەك.
كومپيۇتېر ياكى يانفون ئىشلەتكەندىن كېيىن يۈزنى يۇيۇشقا ئادەتلىنىش ئىنتايىن مۇھىم بىر تۇرمۇش ئادىتى. بۇ ئارقىلىق تېرىنى ئېكران رادىياتسىيەسى ۋە چاڭ – توزاننىڭ زىيىنىدىن قوغداپلا قالماي، يەنە كۆز چارچاشنى پەسەيتىپ، ئۇيقۇنى ئىلگىرى سۈرۈپ، تۇرمۇش سۈپىتىنى يۇقىرى كۆتۈرىدۇ. ئۇخلاشتىن بۇرۇن يۈزنى يۇيۇشتەك ياخشى ئادەتنى يېتىلدۈرۈپ، تېرە ۋە كەيپىياتنى تېخىمۇ ياخشى ئاسراپ، يېڭى بىر سەھەرنى جۇشقۇن روھ بىلەن كۈتۈۋېلىش كېرەك.
