راك دىگەننى ئاڭلىغانلار ئادەتتە بۇنى بىر خىل ساقايماس كېسەل، ئۆلۈپ كېتىشكە ئاز قاپتۇ دەپ ئويلاپ قالىدۇ. ئەمما ھەممە راك كېسىلى بىمارلىرىنىڭ ئۆلۈپ كېتىشى ناتايىن. گەرچە راك كېسىلى ئۆلۈمنى كەلتۈرۈپ چىقىرىدىغان ئېغىر كېسەللىكلەرنىڭ بىرى بولسىمۇ، لېكىن نۇرغۇن بىمارلار بالدۇر دىئاگنوز قويۇش ۋە مۇۋاپىق داۋالاش ئارقىلىق ئۇزاق مۇددەت ياشىيالايدۇ، ھەتتا پۈتۈنلەي ئەسلىگە كېلەلەيدۇ. ئوخشاش بولمىغان تۈردىكى راك كېسىلىنىڭ ئاقىۋىتى ۋە ھايات قېلىش نىسبىتى ئوخشاش بولمايدۇ، بىمارنىڭ ھايات قېلىش پۇرسىتى راك كېسىلىنىڭ تىپى، دەۋرگە بۆلۈنۈشى، سالامەتلىك ئەھۋالى ۋە داۋالاش ئۇسۇلى بىلەن زىچ مۇناسىۋەتلىك.
1. راك كېسىلىگە بالدۇر دىئاگنوز قويۇش ۋە داۋالاش.
راك كېسىلىنى بالدۇر بايقاش ياشاش نىسبىتىنى يۇقىرى كۆتۈرۈشنىڭ ئالتۇن ئاچقۇچى ھىساپلىنىدۇ. نۇرغۇن راك كېسىلىنىڭ دەسلەپكى مەزگىلىدە روشەن كېسەللىك ئالامىتى بولمايدۇ، شۇڭا، قەرەللىك سالامەتلىك تەكشۈرتۈش ۋە بەدەن ئۆزگىرىشىگە دىققەت قىلىش ئىنتايىن مۇھىم. بالدۇر دىئاگنوز قويۇش راك كېسىلىنى باشقا ئەزالارغا تارقالماي تۇرۇپلا كونترول قىلغىلى ۋە داۋالىغىلى بولىدۇ. بۇ ساقىيىش مۇمكىنچىلىكىنى زور دەرىجىدە يۇقىرى كۆتۈرىدۇ. ھازىرقى زامان مېدىتسىناسىنىڭ تەرەققىياتى تېز، ئوپېراتسىيە، خىمىيەلىك داۋالاش، رادىئاتسىيەلىك داۋالاش ھەمدە نىشانلىق دورا ۋە ئىممۇنىتېتلىق داۋالاش قاتارلىق كۆپ خىل داۋالاش ئۇسۇللىرى ئارقىلىق ئوخشاش بولمىغان تۈر ۋە باسقۇچتىكى راك كېسىلىنى داۋالاشقا ئىشلىتىشكە بولىدۇ، ۋە بىمارلارنىڭ ياشاش ۋاقتىنى ئۈنۈملۈك ئۇزارماقتا.
2. راك كېسىلى تىپلىرى ۋە ھايات قېلىش نىسبىتىدىكى پەرقلەر.
بارلىق راك كېسىلىنىڭ ھەممىسى ئوخشاش ئەجەللىك بولۇشى ناتايىن. مەسىلەن، قالقانسىمان بەز راكى ۋە تېرە نېگىز ھۈجەيرە راكىنىڭ ساقىيىش نىسبىتى نىسبەتەن يۇقىرى بولۇپ، بالدۇر بايقىغاندىن كېيىن داۋالاش ئۈنۈمى ياخشى بولىدۇ. ئاشقازان ئاستى بېزى راكى ۋە ئۆپكە راكى قاتارلىق بىر قەدەر ھۇجۇم خاراكتېرلىك راك كېسەللىكلىرىنىڭ ھايات قېلىش نىسبىتى بىر قەدەر تۆۋەن بولىدۇ. شۇڭا، راك كېسىلىنىڭ تۈرى بىمارنىڭ ھاياتىغا تەسىر كۆرسىتىدىغان مۇھىم ئامىل. ئامېرىكا راك كېسەللىكلىرى جەمئىيىتىنىڭ سانلىق مەلۇماتىغا ئاساسلانغاندا، نۇرغۇن راك كېسەللىكلىرىنىڭ بەش يىل ياشاش نىسبىتى ئۈزلۈكسىز يۇقىرى كۆتۈرۈلگەن، مەسىلەن، سۈت بېزى راكى، مەزى بېزى راكى ۋە تۈز ئۈچەي راكى، بولۇپمۇ بالدۇر دىئاگنوز قويۇلغان بىمارلارنىڭ ياشاش نىسبىتى كۆرۈنەرلىك يۇقىرى كۆتۈرۈلگەن.
3. ساغلام تۇرمۇش ئۇسۇلىنىڭ مۇھىملىقى.
راك كېسىلى بىمارلىرىغا نىسبەتەن ئېيتقاندا، ساغلام تۇرمۇش ئۇسۇلى ئىممۇنىتېت سىستېمىسىنى كۈچەيتىش، داۋالاش ئۈنۈمىنى ياخشىلاش ھەمدە تۇرمۇش سۈپىتىنى ئۆستۈرۈشكە پايدىلىق. مۇۋاپىق ئوزۇقلىنىش، يېتەرلىك ئارام ئېلىش، مۇۋاپىق ھەرىكەت قىلىش ۋە ئاكتىپ روھىي ھالەتنى ساقلاش راك كېسىلىگە قارشى تۇرۇشنى قوللايدۇ. ئۇنىڭدىن باشقا، تاماكا ھاراق تاشلاش ۋە زىيادە ئۇلترا بىنەپشە نۇرى ئاستىدا قېلىشتىن ساقلىنىشمۇ بەزى راك كېسەللىكلىرىنىڭ قايتا قوزغىلىش خەۋپىنى تۆۋەنلىتىدۇ.
4. راك كېسىلى ساقايماس كېسەل ئەمەس.
داۋالاش تېخنىكىسىنىڭ تەرەققىي قىلىشىغا ئەگىشىپ، راك كېسىلى تەدرىجىي ھالدا «ساقايماس كېسەل» دىن بىر خىل «سوزۇلما خاراكتېرلىك كېسەل» گە ئايلاندى. نۇرغۇن بىمارلار داۋالانغاندىن كېيىن ئۇزاق مۇددەت ياشىيالايدۇ ھەمدە ياخشى تۇرمۇش سۈپىتىدىن بەھرىمەن بولالايدۇ. يېقىنقى يىللاردىن بۇيانقى ئىممۇنىتېتلىق داۋالاش ۋە گېن ئارقىلىق داۋالاش قاتارلىق يېڭىدىن گۈللەنگەن داۋالاش ئۇسۇللىرى راك كېسىلىنىڭ ئاخىرقى باسقۇچىغا بېرىپ قالغان بەزى بىمارلارنىڭ ئاقىۋىتىنى كۆرۈنەرلىك ياخشىلىدى. ئالىملار ۋە مېدىتسىنا مۇتەخەسسىسلىرى يەنىلا ئۈزلۈكسىز تەتقىق قىلىپ، تېخىمۇ يۇقىرى ئۈنۈملۈك داۋالاش ئۇسۇلىنى تېپىپ چىقىشقا كۈچ چىقىرىپ، راك كېسىلى بىمارلىرىغا تېخىمۇ كۆپ ئۈمىد ئاتا قىلماقتا.
ئومۇمەن ئېيتقاندا، راك ئۆلۈمدىن دېرەك بەرمەيدۇ. بالدۇر بايقاش، توغرا داۋالاش، ساغلام تۇرمۇش ئۇسۇلى ۋە ئەڭ يېڭى تېببىي تەتقىقات راك كېسىلى بىمارلىرىنى تېخىمۇ كۆپ ياشاش پۇرسىتى ۋە تاللاش بىلەن تەمىنلەنمەكتە. راك كېسىلىگە قارىتا ئاكتىپ روھىي ھالەت ۋە داۋالاشقا ماسلىشىش ھايات قېلىش نىسبىتىنى يۇقىرى كۆتۈرۈشتىكى مۇھىم ئامىلىدۇر.
