يېڭى تۇغۇلغان بوۋاقلاردىكى سېرىقلىق بىر خىل دائىم كۆرۈلىدىغان ھادىسە بولۇپ، ئادەتتە يېڭى تۇغۇلغان بوۋاقلارنىڭ جىگەر ئىقتىدارىنىڭ تولۇق يېتىلمىگەنلىكىدىن كېلىپ چىققان بىلىرۇبىن مېتابولىزمىنىڭ تولۇق بولماسلىقىدىن كېلىپ چىقىدۇ. يېڭى تۇغۇلغان بوۋاقلارغا سېرىقلىق چۈشۈشنى ئۈنۈملۈك داۋالاش ئۈچۈن ، ئىلگىرى بوۋاقنى كۆپ ئەمدۈرۈش تەۋسىيە قىلىناتتى، ئېغىر ئەھۋاللاردا قان ئالماشتۇرۇشقا توغرا كېلەتتى. ھازىر، ئوتتۇرا ئۇسۇل بولغان، 360 گىرادۇسلۇق تۇغۇلغان بوۋاقلاردىكى سېرىقلىق چۈشۈشنى داۋالاش ساندۇقى بارلىققا كەلدى.
1. يېڭى تۇغۇلغان بوۋاقلاردىكى سېرىقلىق دېگەن نېمە؟
يېڭى تۇغۇلغان بوۋاقلاردىكى سېرىقلىق يېڭى تۇغۇلغان بوۋاقلارنىڭ تېرىسى ۋە كۆز ئېقىنىڭ سېرىق رەڭدە بولۇشىنى كۆرسىتىدۇ، بۇ قاندىكى بىلىرۇبىن قويۇقلۇقىنىڭ زىيادە يۇقىرى بولۇشىدىن كېلىپ چىقىدۇ. يېڭى تۇغۇلغان بوۋاقلارنىڭ جىگىرى تېخى تولۇق يېتىلمىگەچكە، پەيدا بولغان ئارتۇق بىلىرۇبىن (bilirubin) نى ۋاقتىدا بەدەن سىرتىغا چىقىرىۋېتەلمەيدۇ، شۇنىڭ بىلەن سېرىقلىق پەيدا بولىدۇ. ئەگەر سېرىقلىق دەرىجىسى زىيادە يۇقىرى بولۇپ كەتكەندە، مېڭىگە ۋە باشقا ئورگانلارغا تەسىر قىلىشى مۇمكىن. بولۇپمۇ مېڭىگە تەسىر قىلغاندا بوۋاق بالىلارنىڭ كەلگۈسىدىكى ھاياتىغا ئىنتايىن چوڭ سەلبىي تەسىر كۆرسىتىش ئىھتىماللىقى بولىدۇ. شۇڭا يېڭى تۇغۇلغان بوۋاقلاردا سېرىقلىق كۆرۈلۈپ، قان تەكشۈرۈشتە چەكتىن ئېشىپ كەتكەندە، سېرىقلىقنى ۋاقتىدا چۈشۈرۈش بوۋاقلارنىڭ ساغلاملىقى ئۈچۈن ئىنتايىن مۇھىم بىر مەسىلە ھېساپلىنىدۇ.
بوۋاقلاردىكى سېرىقلىقنى چۈشۈرۈش ئۈچۈن، كۆپ ئەمدۈرۈش، كۆك نۇر بىلەن داۋالاش، قان ئالماشتۇرۇش ئۇسۇللىرى بار بولۇپ، ئالدىنقى ئىككىسى بىر قەدەر بىخەتەر، ئەكس تەسىرى ئاز بولغان ئۇسۇل ھىساپلىنىدۇ. ئەلۋەتتە ئەگەر سۈت بىلەن بەدەندىكى سېرىقلىق يوقىسا ئەڭ ياخشى بولىدۇ. ئەگەر تۇغۇلۇپ نەچچە كۈن ئىچىدە سېرىقلىق پەيدا بولغان بوۋاقلار بولسا، قەرەللىك قان تەكشۈرۈش ئارقىلىق بىلىرۇبىن قىممىتى ئۆلچۈلىدۇ. ئەگەر چەكتىن ئاشقان بولسا، يېڭى تۇغۇلغان بوۋاقلارنى يېقىندىن كۈزىتىش بۆلۈمىدە، نۇر بىلەن داۋالاش ۋەيا قان ئالماشتۇرۇش داۋالىشى ئېلىپ بېرىشقا توغرا كېلىدۇ.
2. 360 گىرادۇسلۇق تۇغۇلغان بوۋاقلاردىكى سېرىقلىق داۋالاش ساندۇقىنىڭ ئاساسىي پىرىنسىپى
بۇ خىل داۋالاش ساندۇقى نۇر بىلەن داۋالاش ( phototherapy, light therapy ) ئارقىلىق يېڭى تۇغۇلغان بوۋاقلارنىڭ قېنىدىكى بىلىرۇبىننىڭ سەۋىيىسىنى تۆۋەنلىتىدۇ. ئالاھىدە دولقۇن ئۇزۇنلۇقىدىكى كۆك نۇرنىڭ يورۇتۇشى ئارقىلىق قاندىكى بىلىرۇبىننى سۇدا ئېرىشچان ھاسىلاتقا پارچىلىنىپ، سۈيدۈك ۋە چوڭ تەرەت ئارقىلىق بەدەن سىرتىغا تېخىمۇ ئاسان چىقىرىۋېتىلىدۇ. « 360 گرادۇسلۇق يېڭى تۇغۇلغان بوۋاقلار سېرىقلىق داۋالاش ساندۇقى » ئۈسكۈنىنى بەزىدە «سېرىقلىق داۋالاش تۇنىلى» دەپمۇ ئاتاپ قويىدۇ.
3. 360 گىرادۇسلۇق داۋالاش ساندۇقىنىڭ لايىھىلىنىش ئالاھىدىلىكى
ھەر تەرەپلىمە يورۇتۇش: 360 گىرادۇسلۇق لايىھەدە يېڭى تۇغۇلغان بوۋاقنىڭ پۈتۈن بەدىنىنىڭ يورۇقلۇقنى تەكشى قوبۇل قىلىشىغا كاپالەتلىك قىلىپ، بەدەن شەكلى قىياپەتنىڭ ئۆزگىرىشى سەۋەبىدىن كېلىپ چىققان داۋالاش ئۈنۈمىنىڭ تەكشى بولماسلىقىدىن ساقلانغىلى بولىدۇ.
بىخەتەر، راھەت بولۇش:داۋالاش ساندۇقىنىڭ ئىچكى قىسمى يۇمشاق لايىھەلىنىپ، يېڭى تۇغۇلغان بوۋاقلارنىڭ داۋالاش جەريانىدا راھەت بولۇشىغا كاپالەتلىك قىلىنىدۇ.
تېمپېراتۇرىنى كونترول قىلىش: ئىچىگە تېمپېراتۇرىنى كونترول قىلىش سىستېمىسى ئورنىتىلغان بولۇپ، تۇراقلىق تېمپېراتۇرىنى ساقلاپ، يېڭى تۇغۇلغان بوۋاقلارنى داۋالاش جەريانىدا سوغۇق ئۆتۈپ قېلىش ياكى زىيادە قىزىپ كېتىشنىڭ ئالدىنى ئالىدۇ.
كۆزىتىش سىستېمىسى: يېڭى تۇغۇلغان بوۋاقلارنىڭ بەدەن تېمپېراتۇرىسى ۋە كۈن نۇرىنىڭ كۈچلۈكلۈك دەرىجىسىنى ھەر ۋاقىت كۆزىتىپ، داۋالاش جەريانىدىكى بىخەتەرلىككە كاپالەتلىك قىلىدۇ.
4. 360 گىرادۇسلۇق تۇغۇلغان بوۋاقلاردىكى سېرىقلىقنى داۋالاش ساندۇقىنىڭ ئەۋزەللىكى
يۇقىرى ئۈنۈملۈك داۋالاش: ھەر تەرەپلىمە نۇر چۈشۈرۈش داۋالاش ئۈنۈمىنى زور دەرىجىدە يۇقىرى كۆتۈرىدۇ، ئادەتتە قىسقا ۋاقىت ئىچىدە بىلىرۇبىن سەۋىيەسىنى كۆرۈنەرلىك تۆۋەنلەتكىلى بولىدۇ.
ئىشلىتىش قولايلىق: مەشغۇلات قىلىش ئاسان، ئاتا – ئانىلار ياكى تېببىي خادىملار ئاددىي تەربىيەلەنگەندىن كېيىن ئىشلەتسە بولىدۇ.
يۆتكىلىشى ئەپلىك: لايىھەلىنىشى يېنىك بولۇپ، ئۆي ياكى دوختۇرخانا قاتارلىق كۆپ خىل مۇھىتتا ئىشلىتىشكە بولىدۇ، ھەر ۋاقىت، ھەر جايدا داۋالاشقا قولايلىق.
بىخەتەرلىكى يۇقىرى: ئىچىگە ئورنىتىلغان كۆپ خىل بىخەتەرلىك كاپالەت سىستېمىسى يېڭى تۇغۇلغان بوۋاقلارنىڭ داۋالاش جەريانىدىكى بىخەتەرلىكى ۋە ئازادىلىكىگە كاپالەتلىك قىلىدۇ.
5. 360 گىرادۇسلۇق تۇغۇلغان بوۋاقلاردىكى سېرىقلىقنى داۋالاش ساندۇقىنى قانداق ئىشلىتىش كېرەك؟
تەييارلىق خىزمىتى: داۋالاش ساندۇقىنى مۇقىم يۈزگە قويۇپ، توك مەنبەسىگە ئۇلايمىز ھەمدە ئۈسكۈنىنى قوزغىتىمىز.
يېڭى تۇغۇلغان بوۋاقلارنى قويۇش: يېڭى تۇغۇلغان بوۋاقلارنى داۋالاش ساندۇقىغا ئاستا سېلىپ، يېڭى تۇغۇلغان بوۋاقلارنىڭ راھەت ۋە بىخەتەر ھالەتتە تۇرۇشىغا كاپالەتلىك قىلىش كېرەك.
پارامېتىرنى بەلگىلەش: دوختۇرنىڭ تەكلىپىگە ئاساسەن، يورۇتۇش ۋاقتى ۋە يورۇقلۇق كۈچىنىشىنى بەلگىلەش كېرەك.
ئەمەلىي ۋاقىتتا كۆزىتىش: داۋالاش جەريانىدا، يېڭى تۇغۇلغان بوۋاقنىڭ ھالىتىنى ھەر ۋاقىت كۆزىتىپ، بەدەن تېمپېراتۇرىسى ۋە يورۇقلۇق كۈچىنىشىنىڭ بىخەتەر دائىرىدە بولۇشىغا كاپالەتلىك قىلىش كېرەك.
داۋالاش ئاخىرلىشىش: داۋالاش ئاخىرلاشقاندىن كېيىن، ئۈسكۈنىلەرنى ئېتىۋېتىپ، يېڭى تۇغۇلغان بوۋاقنى داۋالاش ساندۇقىدىن ئاستا ئېلىپ چىقىش كېرەك.
6. دىققەت قىلىدىغان ئىشلار
ئۈسكۈنىلەرنى قەرەللىك تەكشۈرۈپ تۇرۇش: ھەر قېتىم ئىشلىتىشتىن بۇرۇن، ئۈسكۈنىلەرنىڭ نورمال ئىشلىگەن ئىشلىمىگەنلىكىنى تەكشۈرۈپ، يورۇقلۇقنىڭ كۈچلۈكلۈكى ۋە تېمپېراتۇرىنى كونترول قىلىش سىستېمىسىنىڭ نورمال ئىشلىشىگە كاپالەتلىك قىلىش كېرەك.
پاكىزلىقنى ساقلاش: داۋالاش ساندۇقىنىڭ پاكىزلىقىنى ساقلاپ، باكتېرىيەدىن يۇقۇملىنىشتىن ساقلىنىش كېرەك.
دوختۇرنىڭ تەكلىپىگە ئەمەل قىلىش: دوختۇرنىڭ كۆرسەتمىسى بويىچە، داۋالاش ۋاقتى ۋە چاستوتىسىنى مۇۋاپىق ئورۇنلاشتۇرۇپ، زىيادە ياكى يېتەرلىك بولمىغان نۇر بىلەن داۋالاشتىن ساقلىنىش كېرەك.
7.كۆپ سورۇلىدىغان سوئاللار ۋە جاۋاپلار
نۇر بىلەن داۋالاشنىڭ يېڭى تۇغۇلغان بوۋاققا ئەكس تەسىرى بارمۇ؟
نۇر بىلەن داۋالاش يېڭى تۇغۇلغان بوۋاقلاردىكى سېرىقلىق چۈشۈشنى داۋالاشتا دائىم كۆرۈلىدىغان ئۇسۇل بولۇپ، ئادەتتە ئېغىر ئەكس تەسىرى بولمايدۇ. لېكىن، ئۇزاق ۋاقىت يورۇقلۇق چۈشۈرگەندە تېرە قۇرغاقلىشىش ۋە يېنىك دەرىجىدىكى ئەسۋە پەيدا بولۇشى مۇمكىن، شۇڭا يېڭى تۇغۇلغان بوۋاقلارنىڭ تېرىسىنى ئاسراشقا دىققەت قىلىش كېرەك.
360 گىرادۇسلۇق داۋالاش ساندۇقىنى ئىشلىتىش ئۈچۈن دوختۇرخانىدا يېتىش كېرەكمۇ؟
نورمالدا 360 گىرادۇسلۇق داۋالاش ساندۇقىدا سېرىقلىقنى چۈشۈرۈش ئۈچۈن دوختۇرخانىدا يېتىپ تۇرۇپ داۋالىنىشى ۋە كۈزىتىلىشى كېرەك.
داۋالاش مەزگىلىدە نېمىلەرگە دىققەت قىلىش كېرەك؟
يېڭى تۇغۇلغان بوۋاقلارنىڭ يېتەرلىك سۇ قوبۇل قىلىشىغا كاپالەتلىك قىلىپ، سۇسىزلىنىپ كېتىشتىن ساقلىنىش كېرەك. شۇنىڭ بىلەن بىر ۋاقىتتا، يېڭى تۇغۇلغان بوۋاقنىڭ ھالىتىنى ھەر ۋاقىت كۆزىتىپ، بىنورمال ئەھۋال كۆرۈلسە دوختۇردىن ۋاقتىدا مەسلىھەت سوراش كېرەك.
داۋالاش ئۈنۈمى كۆرۈنەرلىك بولمىسا قانداق قىلىش كېرەك؟
ئەگەر داۋالاش ئۈنۈمى كۆرۈنەرلىك بولمىسا، ۋاقتىدا دوختۇردىن مەسلىھەت سوراش كېرەك، داۋالاش لايىھەسىنى تەڭشەش ياكى يەنىمۇ ئىلگىرىلىگەن ھالدا تەكشۈرۈشكە توغرا كېلىشى مۇمكىن.
نۇر بىلەن داۋالاش، 360 گىرادۇسلۇق ساندۇقتا داۋالاش ئۈچۈن قانچىلىك ۋاقىت كېتىدۇ؟
داۋالاش ۋاقتى يېڭى تۇغۇلغان بوۋاقلاردىكى سېرىقلىق چۈشۈش دەرىجىسىگە قاراپ ئوخشاش بولمايدۇ، ئادەتتە بىر نەچچە كۈندىن بىر ھەپتىگىچە بولىدۇ، كونكرېت ۋاقتىنى دوختۇرنىڭ كۆرسەتمىسى بويىچە قىلىش كېرەك. بىر قېتىملىق نۇر بىلەن داۋالىنىش باشلانغاندىن كېيىن، ئەھۋالغا قاراپ 2. سائىتىدە كونترول بىلىرۇبىن تەكشۈرۈشى قىلىنىپ، داۋالىنىشنىڭ تەسىرى بولغان بولمىغانلىقى كونترول قىلىنىدۇ.
360 گىرادۇسلۇق تۇغۇلغان بوۋاقلاردىكى سېرىقلىق داۋالاش ساندۇقى يېڭى تۇغۇلغان بوۋاقلارنى بىخەتەر، راھەت، يۇقىرى ئۈنۈملۈك داۋالاش ئۇسۇلى بىلەن تەمىنلەيدۇ. ھەر تەرەپلىمە نۇر چۈشۈرۈش لايىھەسى ئارقىلىق، بىلىرۇبىننىڭ سەۋىيەسىنى ئۈنۈملۈك تۆۋەنلىتىپ، يېڭى تۇغۇلغان بوۋاقلارنىڭ سالامەتلىكىنىڭ تېزرەك ئەسلىگە كېلىشىگە ياردەم بەرگىلى بولىدۇ.
