تېڭشۈن تورى خەۋىرى، نۇر تورى تەرجىمىسى:
كانادادا شۇنداق بىر ئاشخانا بار، بۇ ئاشخانىدىكى ئاشپەز ۋە مۇلازىملارنىڭ ھەممىسى ئەيدىز ۋىرۇسى بىلەن يۇقۇملانغانلار. ئۇنداقتا بۇ ئاشخانىغا بىرمۇ ئادەم كىرمەيدۇ دەپ ئويلىغان بولسىڭىز ئېغىر خاتالاشقان بولىسىز.
بۇ ئاشخانىدىكى ئەيدىز ۋىرۇسى بىلەن يۇقۇملانغان 14 نەپەر ئاشپەز قىسقىغىنا ئىككى كۈنلۈك پائالىيەت مەزگىلىدە 100دىن ئارتۇق خېرىدار ئۈچۈن مەززىلىك تائاملارنى تەييارلىغان.
بەلكىم ئەيدىز ۋىرۇسى بىلەن يۇقۇملانغانلارنىڭ ئاشخانىدا ئىشلەپ باشقىلار ئۈچۈن مۇلازىمەت قىلالىغانلىقىغا ھەيران قالغان بولۇشىڭىز مۇمكىن، بۇ كانادادىكى مۇناسىۋەتلىك ئورۇنلار ئۇيۇشتۇرغان پائالىيەت بولۇپ، كىشىلەرنىڭ ئەيدىز بىمارلىرىغا بولغان كەمسىتىش، خاتا چۈشىنىشنى ئازايتىش ئۈچۈن ئورۇنلاشتۇرغان.
گەرچە ھازىر ئەيدىز ۋىرۇسىنى ئۈنۈملۈك كونترول قىلغىلى بولىدىغان بولسىمۇ، لېكىن نۇرغۇن كىشىلەردە ئەيدىز ۋىرۇسىغا نىسبەتەن خاتا چۈشىنىش مەۋجۇت، دەل مۇشۇنداق خاتا چۈشىنىشلەر سەۋەبلىك ئەيدىز بىمارلىرى ئۆزى ئويلىغان مەدەت، غەمخورلۇققا ئېرىشەلمەيدۇ.
«ئەيدىز ۋىرۇسى بىلەن يۇقۇملانغان كىشى ئەتكەن تاماقنى يەمسىز؟» دەپ سورالسا كىشىلەر ھەر خىل جاۋابلارنى بېرىشىدۇ:
-مەن يېيىشكە جۈرئەت قىلالمايمەن، ئەگەر يۇقۇملىنىپ قالسام قانداق قىلىمەن.
-يۇقۇملىنىپ قالمايدىغىنىمغا ئىشىنىمەن، ئەيدىز ۋىرۇسى دېگەن ئانىدىن بالىغا، قاندىن، جىنسىي مۇناسىۋەتتىن يۇقىدىغان تۇرسا، تاماق يېگەنگە يۇقۇپ قالمايدۇ.
-ئەگەر ئاشپەز ئېھتىياتسىزلىقتىن بارمىقىنى كېسىۋالسا……
ئەمەلىيەتتە سىز بۇ خىل كېسەلدىن قورققان ۋاقىتتا مەيلى باشقىلار نېمە دېسۇن قۇلىقىڭىزغا كىرمەيدۇ، پەقەتلا بۇ كېسەللىكنى چۈشەنگەندە ئاندىن بۇ خىل قورقۇنچ پەسىيىشى مۇمكىن.
1. كۈندىلىك تۇرمۇشتىكى قول ئېلىشىپ كۆرۈشۈش، قۇچاقلىشىش ۋە ياكى يۇقۇملانغۇچىنىڭ بەدەن سۇيۇقلۇقىغا تېگىپ كېتىش قاتارلىقلار ئەيدىز ۋىرۇسى بىلەن يۇقۇملىنىشنى كەلتۈرۈپ چىقارمايدۇ.
2. ئاشپەزنىڭ ئېھتىياتسىزلىقتىن بارمىقىنى كېسىۋېلىشى ناھايىتى ئاز ئۇچرايدىغان ھادىسە، ئۇنىڭ ئۈستىگە ئاشپەز بارمىقىنى كېسىۋېلىپ قان ئېقىپ كەتكەن تاماقنى ئەلۋەتتە خېرىدارغا بەرمەيدۇ.
3. ئەيدىز ۋىرۇسى ئادەم بەدىنىدىن ئايرىلغاندىن كېيىن ئۇزاق ياشىيالمايدۇ.
4. ئەيدىز ۋىرۇسى ب تىپلىق جىگەر ياللۇغى ۋىرۇسىغا ئوخشاش ھەزىم قىلىش يولىغا كىرگەندىن كېيىن، ھەزىم قىلىش يولىدىكى ئېنزىملار ئۇنى پارچىلاپ تاشلايدۇ.
ئەيدىز ۋىرۇسىغا بولغان خاتا چۈشىنىشلەرنى توغرىلىغاندىلا ئاندىن كېسەللىكنىڭ ئۈنۈملۈك ئالدىنى ئالغىلى بولىدۇ.
مەنبە:
https://m.nur.cn/news/2023/12/17806412.shtml
