تېڭشۈن تورى خەۋىرى، نۇر تورى تەرجىمىسى:
ئۇخلاشتىن بۇرۇنقى ئىككى سائەت ئۇيقۇ سۈپىتىگە كاپالەتلىك قىلىشنىڭ ئاچقۇچى. ياشانغانلاردا دائىم تەستە ئۇخلاش، كۆپ چۈش كۆرۈش، بالدۇر ئويغىنىپ كېتىش قاتارلىق ئۇيقۇ توسالغۇغا ئۇچراش مەسىلىلىرى كۆرۈلىدۇ. ئۇيقۇ سۈپىتى تۆۋەنلىسە، سالامەتلىككە تەسىر كۆرسىتىپ، بەدىنىنىڭ قېرىشىنى تېزلىتىدۇ. شۇڭا ياخشى بولغان ئۇخلاش ئادىتىنى يېتىلدۈرۈپ، ئۇيقۇ سۈپىتىنى يۇقىرى كۆتۈرگەندىلا، ئاندىن ساغلام بولغىلى، ئۇزۇن ئۆمۈر كۆرگىلى بولىدۇ.
ياشانغانلار ئۇخلاشتىن بۇرۇن يەتتە ياخشى ئادەتنى يېتىلدۈرۈش لازىم.
تۆتنى يېمەسلىك
1. تەستە ھەزىم بولىدىغان يېمەكلىكلەرنى يېمەسلىك.
گۆش، پېچىنە تۈرىدىكى يېمەكلىكلەر، مايدا پىشۇرۇلغان، تاتلىق يېمەكلىكلەر، قاتتىق پوستلۇق يېمەكلىكلەر قاتارلىق يۇقىرى ئېنېرگىيەلىك يېمەكلىكلەرنى يېمەسلىك كېرەك. بۇلار ئاشقازانغا كىرگەندىن كېيىن ناھايىتى تەستە ھەزىم بولىدۇ، ئۇخلاش ئالدىدا تاماق يېيىشمۇ ئۇيقۇ سۈپىتىگە تەسىر يەتكۈزىدۇ.
2. ھاراق ئىچمەسلىك
بىر قىسىم ياشانغانلاردا ئۇخلاشتىن بۇرۇن ھاراق ئىچىش ئادىتى بار بولۇپ، بۇنداق قىلغاندا تېخىمۇ تېز ئۇخلىغىلى بولىدۇ دەپ قارايدۇ. ئەمەلىيەتتە بۇنداق ئۇخلاش ئادىتى ناھايىتى ئاسانلا بالدۇر ئويغىنىشنى كەلتۈرۈپ چىقىرىدۇ.
3. چاي، قەھۋە ئىچمەسلىك، شاكىلات يېمەسلىك.
ئادەتتە ياشانغانلارغا تاماقتىن كېيىن ئۇخلىغىچە بولغان ئارىلىقتا چاي ئىچىش تەۋسىيە قىلىنمايدۇ. بولۇپمۇ قېنىق چاي، قەھۋە، شاكىلات قاتارلىقلارنىڭ تەركىبىدە ئادەمنىڭ نېرۋىسىنى غىدىقلايدىغان ماددىلار بار، كەچلىك تاماقتىن كېيىن بۇلارنى ئىستېمال قىلغاندا ئاسانلا ئۇخلىيالماسلىق كېلىپ چىقىدۇ، كۈندۈزى بولسىمۇ بەك كۆپ يېمەسلىك، چاينى بەك قېنىق ئىچمەسلىك كېرەك.
4. ئاچچىق يېمەكلىكلەرنى يېمەسلىك.
كۆپىنچە كېچىلىك تاماقلار ئاچچىق-چۈچۈك، غىدىقلاش خۇسۇسىيىتىگە ئىگە بولۇپ، بۇ خىل يېمەكلىكلەر بەدىنىمىزنى غىدىقلاپ، روھلاندۇرۇپ، ئۇزۇنغىچە ئۇخلىيالماسلىقنى كەلتۈرۈپ چىقىرىدۇ.
ئۈچنى قىلماسلىق
1. جىددىي ھەرىكەت قىلماسلىق.
ئادەتتە كەچلىك تاماقنى يەپ بولۇپ، 30 مىنۇتتىن كېيىن مۇۋاپىق ھەرىكەت قىلىشقا بولىدۇ. بۇ خىل ھەرىكەتلەر ئاشقازان-ئۈچەينىڭ لۆمۈلدىشىگە ياردەم بېرىپ، ئاشقازاننى تازىلاپ، ئۇيقۇنى ياخشىلايدۇ.
2. غىدىقلايدىغان ۋىدىيولارنى كۆرمەسلىك ياكى غىدىقلايدىغان ئويۇنلارنى ئوينىماسلىق.
تېلېۋىزىيە تىياتىرى، ئادەمنى ئويغا سالىدىغان كىنو قاتارلىقلار ئادەمنى ئوڭايلا ۋەقەلىككە غەرق قىلىدۇ، ئۇيقۇغىمۇ تەسىر يەتكۈزىدۇ. بەزى ئويۇنلارنى ئويناش ياكى كىچىك ۋېدىيولارنى كۆرۈشمۇ ئادەمنى ئۆزىگە رام قىلىۋالىدۇ. بەزىدە ئۆزىنى كونترول قىلالماي، ئەڭ ياخشى ئۇخلاش ۋاقتىنى قولدىن بېرىپ قويسا، ئاسانلا ئۇيقۇسىزلىق ئەھۋالى كېلىپ چىقىدۇ.
3. ئاچچىقلانماسلىق.
ئۇخلاشتىن ئىككى سائەت بۇرۇن روھىي ھالەتنى ياخشى ساقلاشقا دىققەت قىلىش، ئاچچىقلانماسلىق كېرەك.
زىيادە ھاياجانلىنىش (زىيادە ھاياجانلىنىش ياكى چۈشكۈنلىشىش) بىزنىڭ ئۇيقۇ سۈپىتىمىزگە ئېغىر تەسىر يەتكۈزىدۇ، شۇڭا ئۇخلاشتىن بۇرۇن ئامال بار باشقىلار بىلەن تاكاللاشماسلىق كېرەك. بەك ئېغىر غەم-ئەندىشىدە بولماسلىق، جورىسى ياكى پەرزەنتلىرى بىلەن پاراڭلىشىپ، ئۈمىدۋار، تىنچ روھىي ھالەتنى ساقلاش، ئۇيقۇغا تېخىمۇ پايدىلىق.
مەنبە:
https://m.nur.cn/news/2023/12/17944508.shtml
