يېڭى تۇغۇلغان بوۋاقلار ھۆل تەمرەتكىسى : بوۋاقنىڭ يۇمران تېرىسىنى قانداق ئاسراش كېرەك؟
يېڭى تۇغۇلغان بوۋاقلاردىكى ھۆل تەمرەتكە دائىم كۆرۈلىدىغان تېرە مەسىلىسى بولۇپ، ئادەتتە بوۋاق تۇغۇلۇپ بىر نەچچە ئاي ئىچىدە كۆرۈلىدۇ. ھۆل تەمرەتكىنىڭ ئاساسلىق ئىپادىسى تېرە قىزىرىش، قۇرغاقلىشىش، كېپەكلىشىش، ھەتتا كىچىك ئەسۋە ياكى سۇلۇق قاپارتما پەيدا بولۇش، قىچىشىش سېزىمى بولۇش. يېڭى تۇغۇلغان بوۋاقلارنىڭ تېرىسى ناھايىتى يۇمران بولغاچقا، ھۆل تەمرەتكە بوۋاقلاردا بىئاراملىق ۋە ئاتا – ئانىلارنىڭ ئەندىشىسىنى كەلتۈرۈپ چىقىرىشى مۇمكىن. ھۆل تەمرەتكە چىققان بوۋاقنىڭ تېرىسىنى قانداق پەرۋىش قىلىشنى ئىگىلىگەندە، كېسەللىك ئالامەتلىرىنى ئۈنۈملۈك پەسەيتىپ، بوۋاقنىڭ راھەت تۇرۇشىغا ياردەم بەرگىلى بولىدۇ.
بوۋاقلاردىكى ھۆل تەمرەتكىنىڭ سەۋەبى نېمە؟
يېڭى تۇغۇلغان بوۋاقلاردىكى ھۆل تەمرەتكىنىڭ غەرىپ مېدىتسىنادا كونكرېت سەۋەبى تېخى ئېنىق ئەمەس، لېكىن كۆپىنچە ئىرسىيەت، مۇھىت ۋە ئىممۇنىتېت سىستېمىسى بىلەن مۇناسىۋەتلىك دەپ قارىلىدۇ. بەزى بوۋاقلارنىڭ تېرىسىنىڭ مۇداپىئە ئىقتىدارى بىر قەدەر ئاجىز بولۇپ، ئاسانلا سىرتقى مۇھىتنىڭ غىدىقلىشىغا ئۇچرايدۇ، مەسىلەن، كىلىمات ئۆزگىرىشى، تېرىنىڭ زىيادە قۇرغاقلىشىشى، ئانافىلاكتوگېن ( مەسىلەن، چاڭ – توزان كانىسى، ئەرمەك ھايۋانلارنىڭ تۈكى ) ياكى كىيىم – كېچەك ماتېرىياللىرىنىڭ تەسىرىگە ئۇچرايدۇ. ئۇنىڭدىن باشقا، ئائىلىدە ھۆل تەمرەتكە، زىققا كېسىلى ياكى زىيادە سەزگۈرلۈك تارىخى بار بوۋاقلارنىڭ ھۆل تەمرەتكىگە گىرىپتار بولۇش خەۋپى تېخىمۇ يۇقىرى بولىدۇ.
بوۋاقلاردىكى ھۆل تەمرەتكە پەرۋىش قىلىش مۇھىم نۇقتىسى
1. تېرىنىڭ نەملىكىنى ساقلاش : يېڭى تۇغۇلغان بوۋاقلاردىكى ھۆل تەمرەتكىنى ئاسراشتىكى ئاساسلىق تەدبىرلەرنىڭ بىرى بوۋاقنىڭ تېرىسىدىكى سۇ مىقتارىنىڭ نورمال سەۋىيىدە بولۇشىغا كاپالەتلىك قىلىش كېرەك. بوۋاقلارغا ماس كېلىدىغان خۇشپۇراق ماتېرىياللار بولمىغان، غىدىقلاشچانلىقى تۆۋەن نەملىك ساقلاش مەلھىمىنى ھەر كۈنى كۆپ قېتىم سۈركەش، بولۇپمۇ بوۋاق يۇيۇنغاندىن كېيىن، تېرىنىڭ سۇ تەركىبىنى قۇلۇپلاپ قويۇشىغا ياردەم بېرىش كېرەك.
2. غىدىقلىغۇچى ماددىلاردىن ساقلىنىش : يۇمشاق، ھاۋا ئۆتكۈزىدىغان ساپ پاختا كىيىملەرنى تاللاش، تېرىگە رېئاكسىيە قىلىش ئېھتىمالى بولغان تازىلاش سۇيۇقلۇقى ياكى سوپۇن پاراشوكىنى ئىشلىتىشتىن ساقلىنىش كېرەك. ئۇنىڭدىن باشقا، ئۆينىڭ تېمپېراتۇرىسى ۋە نەملىكىمۇ مۇۋاپىق بولۇشى، زىيادە سوغۇق ياكى زىيادە ئىسسىق مۇھىتنىڭ بوۋاقنىڭ يۇمران تېرىسىنى غىدىقلىشىدىن ساقلىنىش كېرەك.
بوۋاقلارنى يۇيغاندا دىققەت قىلىدىغان ئىشلار
يېڭى تۇغۇلغان بوۋاقلارنى يۇيۇندۇرغاندا سۇنىڭ تېمپېراتۇرىسى 35-37° C ئەتراپىدا بولۇشى كېرەك ،يۇيۇنۇش ۋاقتى بەك ئۇزۇن بولۇپ كەتمەسلىكى كېرەك ، 5 – 10 مىنۇت بولسا مۇۋاپىق بولىدۇ. بوۋاقلارغا خاس بولغان ئىشەنچلىك بەدەن يۇيۇش سۇيۇقلۇقىنى ئىشلىتىش تەۋسىيە قىلىنىدۇ. يۇيۇپ بولغاندىن كېيىن دەرھال نەملىك ساقلاش مەلھىمى سۈركەپ، تېرىدىكى سۇ تەركىبىنى قۇلۇپلاپ، قۇرغاقلىشىش ۋە قىچىشىشنى يېنىكلىتىش كېرەك.
بوۋاقلاردىكى ھۆل تەمرەتكە قىچىشىشنى قانداق بىر تەرەپ قىلىش كېرەك؟
ھۆل تەمرەتكە كەلتۈرۈپ چىقارغان قىچىشىش بوۋاقنى بىئارام قىلىشى، ھەتتا تاتىلاش ئارقىلىق تېرىنىڭ زەخىملىنىشى، يۇقۇملىنىشىنى كەلتۈرۈپ چىقىرىشى مۇمكىن. قىچىشىشنى پەسەيتىش ئۈچۈن، دوختۇرنىڭ كۆرسەتمىسى بويىچە بوۋاقلارغا مەخسۇس ئىشلىتىلىدىغان مەلھەم دورا ئىشلەتسە بولىدۇ. ئاتا-ئانىلار يەنە بوۋاقنىڭ تىرنىقىنى ۋاقتىدا ياساپ، تېرىنى زەخىملەندۈرۈپ قويۇشتىن ساقلىنىشى كېرەك. شۇنىڭ بىلەن بىر ۋاقىتتا، بوۋاقنىڭ قولىنىڭ پاكىزلىقىنى ساقلاپ، تاتىلاپ يۇقۇملىنىشنىڭ ئالدىنى ئېلىش كېرەك. تەبىئىي ئۇسۇللاردىن، زەيتۇن يېغى سۈرۈشمۇ بىر ياخشى تاللاش ھىساپلىنىدۇ.
بوۋاقلاردىكى ھۆل تەمرەتكە قاچان داۋالاش ئېلىپ بېرىش كېرەك؟
گەرچە كۆپ ساندىكى يېڭى تۇغۇلغان بوۋاقلاردىكى ھۆل تەمرەتكىنى كۈندىلىك پەرۋىش قىلىش ئارقىلىق ساقايتقىلى بولسىمۇ، لېكىن ئەگەر ھۆل تەمرەتكىنىڭ كۆلىمى كېڭىيىپ، داۋاملىق ياخشىلانمىسا ياكى تەمرەتكە بولغان يەردە سۇيۇقلۇق سىرغىپ چىقىش، يۇقۇملىنىش ئالامەتلىرى كۆرۈلسە، ۋاقتىدا دوختۇرغا كۆرۈنۈش كېرەك. دوختۇر بەلكىم ئەھۋالغا ئاساسەن ئانتىبىئوتىك مەلھەم ياكى باشقا دورىلارنى كېسىپ بېرىپ، يۇقۇملىنىشنىڭ ئالدىنى ئېلىشى ھەمدە كېسەللىك ئالامىتىنى يېنىكلىتىشى مۇمكىن.
ئومۇمەن، يېڭى تۇغۇلغان بوۋاقلاردىكى ھۆل تەمرەتكە ئائىلىنى ئاسانلا ئەندىشىگە سالىدىغان بىر ئەھۋال بولسىمۇ ، لېكىن ئىنچىكىلىك بىلەن پەرۋىش قىلىش ۋە مۇۋاپىق قوغدىنىش تەدبىرلىرى ئارقىلىق، كۆپ ساندىكى بوۋاقلارنىڭ كېسەللىك ئالامەتلىرىنى كونترول قىلغىلى ۋە ساقايتقىلى بولىدۇ.
