1-تىپلىق دىئابېتنىڭ تەرەققىيات جەريانىدا بىر مەزگىللىك ئۆزلىكىدىن ياخشىلىنىش باسقۇچى بولىدۇ. كلىنكىدا بۇ ۋاقىتنى 1-تىپلىق دىئابېتنىڭ «شېرىن ئاي مەزگىلى» دەپ ئاتايمىز. ئۇنداقتا، بۇ شېرىن ئاي مەزگىلى قانداق پەيدا بولغان؟
ئەسلىدە ئادەم بەدىنىدىكى ھەرقايسى توقۇلمىلارنىڭ ئۆزلىكىدىن ياخشىلىنىش ئىقتىدارى بولىدۇ.
1-تىپلىق دىئابېت بىمارلىرىنىڭ ئاشقازان ئاستى بېزى دەسلەپتە بۇزغۇنچىلىققا ئۇچرىغاندا ئۆزىنى تولۇقلاش ئىقتىداىنى يۈرگۈزىدۇ. بىر قىسىم ئاشقازان ئاستى بېزىنىڭ قايتا ئىنسۇلىن ئاجرىتىشىمۇ مەلۇم نىسبەتتە ئەسلىگە كېلىدۇ. نەتىجىدە كېسەللىك ئەھۋالى ياخشىلىنىدۇ، بۇ چاغدا ئىنسۇلىن ئىشلىتىش مىقدارىنى ئازايتقىلى ھەم ھېچقانداق دورا ئىشلەتمەيمۇ قان شېكىرىنى نورمال دائىرە ئىچىدە ساقلىغىلى بولىدۇ. بۇ باسقۇچ دىئابېتنىڭ «شېرىن ئاي مەزگىلى» دۇر. بۇ ۋاقىتتا ئائىلىدىكىلەر ۋە بىمارلار ئىنتايىن خوشاللىنىپ دىئابىت ساقايدى، دەپ قارايدۇ. ئەپسۇس، بۇ ۋاقىت ئۇزاققا بارمايدۇ (بەزىدە ئالتە ئاي ئەتراپىدا بولىدۇ).
بىمارنىڭ ئاشقازان ئاستى بېزى ئىممۇنىتېت خاراكتېرلىك 2-قېتىملىق بۇزغۇنچىلىققا ئۇچراپ ئېغىر زەخىملىنىدۇ. بۇ قېتىمقى زەخىملىنىش ئۆمۈرلۈك زەخىملىنىش بولۇشى مۇمكىن. نەتىجىدە ئاشقازان ئاستى بېزى قايتا ئىنسۇلىن ئاجرىتىپ چىقىرالمايدۇ. بۇنىڭ بىلەن بىمار ئۆمۈر بويى ئىنسۇلىن بىلەن داۋالىنىشقا تايىنىدۇ، شۇڭلاشقا 1-تىپلىق دىئابېتنىڭ پەيدا بولۇشىنىڭ ئالدىنى ئېلىش ئۈچۈن يۇقىرىقى ئىككى ئۆتكەلنى چىڭ تۇتۇش لازىم.
بىرىنچى ئۆتكەل بولسا، بەدەننىڭ قارشىلىق كۈچىنى ئاشۇرۇپ، بىمارنىڭ ئاشقازان ئاستى بېزىنىڭ ۋىرۇس ۋە زەھەرلىك ماددىلار تەرىپىدىن زەخىملىنىپ بۇزغۇنچىلىققا ئۇچرىشىنىڭ ئالدىنى ئېلىش، ئىككىنچى ئۆتكەل بولسا، بەدەننىڭ ئىممۇنىتېت كۈچىنى ئاشۇرۇپ، ئاشقازان ئاستى بېزىنى زەخىملەندۈرگەن زىيانلىق ماددىلارغا قارىتا ئاشقازان ئاستى بېزىنى زەخىملەندۈرۈشنىڭ ئالدىنى ئېلىشتىن ئىبارەت. «شېرىن ئاي مەزگىلى» دەپ ئاز مىقداردا ئىنسۇلىن ئىشلىتىپ، بەدەننىڭ ئىممۇنىتېت كۈچىنى ئاشۇرۇپ تۇرسا، ئاشقازان ئاستى بېزىغا قارىتا پايدىسى ئىنتايىن كۆپ.
