ئۈندىدار سالونى خەۋىرى، نۇر تورى تەرجىمىسى:
قەھۋە دۇنيادىكى بازىرى ئىتتىك ئىچىملىك، لېكىن قەھۋە «يۈرەككە زىيانلىق»، «ئاشقازان، ئۈچەيگە زىيانلىق»، «سالامەتلىككە زىيانلىق» دېگەندەك قاراشلار ئىزچىل مەۋجۇت بولۇپ كەلمەكتە. ئىلگىرى «مەلۇم داڭلىق ماركىلىق قەھۋە راك پەيدا قىلغان» دېگەن خەۋەر چىققان، گەرچە ئەڭ ئاخىرىدا رەددىيە بېرىلگەن بولسىمۇ، لېكىن بۇ خەۋەر كۆپچىلىكنىڭ قەلبىدە يەنىلا مۇنداق بىر گۇماننى قالدۇردى: قەھۋە سالامەتلىككە تەسىر كۆرسىتەمدۇ؟
تەتقىقاتلاردىن بىز قەھۋەنىڭ تەن ساغلاملىقىغا ھەقىقەتەن تەسىر كۆرسىتىدىغانلىقىنى، گەرچە سەلبىي تەرىپى بولسىمۇ، لېكىن پايدىسى تېخىمۇ كۆپ بولىدىغانلىقىنى، بۇنىڭ ئىچىدە يۈرەكنى قوغداش رولىنىمۇ ئۆز ئىچىگە ئالىدىغانلىقىنى بايقىدۇق.
تەتقىقاتلاردىن ئىسپاتلىنىشىچە، قەھۋە يۈرەك، مېڭە قان تومۇر كېسەللىكلىرى سەۋەبىدىن ئۆلۈپ كېتىش خەۋپىنى تۆۋەنلىتەلەيدىكەن. قەھۋە تەركىبىدە كوفېئىن بار بولۇپ، قان تومۇرلارنى كېڭەيتىپ، ياللۇغلىنىش رېئاكسىيەسىنى تورمۇزلاپ، ئارتېرىيە ئىقتىدارىنى ياخشىلايدۇ. ھەر كۈنى مۇۋاپىق مىقداردا قەھۋە ئىچسە، يۈرەك قان تومۇرىنى ئۈنۈملۈك قوغدىغىلى بولىدىكەن.
سانلىق مەلۇماتلاردا كۆرسىتىلىشىچە، ھەر كۈنى تۆت ئىستاكان قەھۋە ئىچىپ بەرسە ئۆلۈش نىسبىتىنى كۆرۈنەرلىك تۆۋەنلەتكىلى بولىدىكەن. شۇنىڭ بىلەن بىر ۋاقىتتا، تۆت ئىستاكان قەھۋە تەركىبىدىكى كوفېئىن يۈرەك ئىقتىدارىنى كۈچەيتىپ، يۈرەك مۇسكۇل ھۈجەيرىلىرىنى زەخىملىنىشتىن ساقلايدۇ. ئەمما، قەھۋە گەرچە ياخشى بولسىمۇ بەك كۆپ ئىچىشكە بولمايدۇ. ئەلۋەتتە، قەھۋەنىڭ پايدىسىز تەرىپىمۇ بار، ئەگەر كوفېئىن زىيادە كۆپ قوبۇل قىلىنسا، تەشۋىشلىنىش، ئۇيقۇسىزلىق، باش ئاغرىش، قول تىترەش ۋە يۈرەك سېلىش قاتارلىق ئالامەتلەرنى كەلتۈرۈپ چىقىرىدۇ، ھەتتا كوفېئىندىن زەھەرلىنىشنى كەلتۈرۈپ چىقىرىدۇ.
1. قەھۋەنى ئەڭ ياخشىسى ئاچ قورساق ئىچمەسلىك كېرەك. ئاچ قورساققا قەھۋە ئىچسە، ئاشقازان سۇيۇقلۇقى ھەددىدىن ئارتۇق ئاجرىلىپ چىقىپ، ئاشقازان ياللۇغى ۋە ئاشقازان يارىسى پەيدا بولۇش خەۋپىنى ئاشۇرۇۋېتىدۇ؛
2. قەھۋەنى بەك قىزىق ئىچمەسلىك. بۇ ئادەمنىڭ تەم سەزگۈسى ۋە قەھۋەنىڭ تەمىگە تەسىر يەتكۈزىدۇ، شۇنداقلا قىزىلئۆڭگەچ ۋە ئاشقازان دىۋارىغا زىيان يەتكۈزىدۇ؛
3. قوبۇل قىلىش مىقدارىنى كونترول قىلىش كېرەك. كوفېئىننى مېتابولىزمى ئاستا بولغان كىشىلەر قوبۇل قىلىش مىقدارىنى ئېھتىيات بىلەن كونترول قىلىشى كېرەك؛
قەھۋەنىڭ ئىسسىقلىق مىقدارى ئانچە يۇقىرى ئەمەس، لېكىن تەمىنى ئاشۇرۇش ئۈچۈن نۇرغۇن شېكەر ۋە سۈت قوشۇلسا، بىر ئىستاكان قەھۋەنىڭ ئىسسىقلىق مىقدارىنى نەچچە ئون ھەسسە ئاشۇرۇۋېتىشى مۇمكىن. ئۇزاق مۇددەت بۇنداق يۇقىرى ئېنېرگىيەلىك قەھۋەنى ئىچسە، يۈرەك قان تومۇر كېسەللىكلىرىگە گىرىپتار بولۇش خەۋپىنى ئاشۇرۇۋېتىدۇ. قەھۋە سېتىۋالغاندا، ئەڭ ياخشىسى تەركىبىدە كاربون سۇ بىرىكمىلىرى ۋە ياغ ئاز بولغان تۈرلەرنى ياكى قارا قەھۋەنى تاللاش كېرەك.
مەنبە:
https://m.nur.cn/news/2023/12/17908703.shtml
