ھامىلىدارلىق مەزگىلىدە ئوزۇقلۇق يېتىشمىسە…

سىنا تورى خەۋىرى، نۇر تورى تەرجىمىسى:

روتا پۇت (罗圈腿) شەكلى (تۆۋەندە O شەكىللىك پۇت دەپ ئېلىنىدۇ) ئادەمنىڭ بەدەن شەكلىگە نۇقسان يەتكۈزۈپلا قالماي، يەنە بوغۇمنىڭ ئىچكى تەرىپىدىكى كۆمۈرچەك يۈزىنىڭ ئۇپرىشىنى كەلتۈرۈپ چىقىرىدۇ، ئېغىر بولغاندا ھەتتا تىز بوغۇمى ئاغرىشنى پەيدا قىلىپ نورمال يول يۈرۈشكە تەسىر كۆرسىتىدۇ. شۇڭا بالىلارنىڭ پۇتى O شەكلىدە تەرەققىي قىلىۋاتقىنىنى بايقىغان ھامان، ۋاقتىدا تەدبىر قوللىنىش كېرەك. ئەگەر شەكىلگە كىرىپ قالسا كېيىن تۈزىتىش بىر قەدەر قىيىن بولىدۇ.

ئۇنداقتا زادى قايسى سەۋەبلەر پۇتنىڭ O شەكىللىك بولۇپ قېلىشىنى كەلتۈرۈپ چىقىرىدۇ؟

1. ھامىلىدارلىق مەزگىلىدە ھامىلىگە ئوزۇقلۇق يېتىشمەسلىك.

ئەگەر ھامىلىدارلىق مەزگىلىدە كالتسىي ۋە ۋىتامىن قوبۇل قىلىش مىقدارى يېتەرلىك بولمىسا، ھامىلىنىڭ ئۆسۈپ يېتىلىش ئېھتىياجىنى قاندۇرالمايدۇ ۋە بالا تۇغۇلغاندىن كېيىن سۆڭەكنىڭ نورمال تەرەققىي قىلىشى تەسىرگە ئۇچرايدۇ. شۇڭا ھامىلىدار ئاياللار ھامىلىدارلىق مەزگىلىدە مۇۋاپىق مىقداردا كالتسىي ۋە ۋىتامىن تولۇقلاپ، ھامىلىنىڭ ئوزۇقلۇق بىلەن تەمىنلىنىشىگە كاپالەتلىك قىلىشى كېرەك.

2. ئۆسۈپ يېتىلىش مەزگىلىدىكى ئوزۇقلۇق يېتىشمەسلىك

بالىلار ئۆسۈپ يېتىلىش مەزگىلىدە ھەر خىل ئوزۇقلۇق ماددىلارغا بولغان ئېھتىياجى بىر قەدەر كۈچلۈك بولىدۇ. بۇ مەزگىلدە كالتسىي كەمچىل بولسا، سۆڭەكنىڭ شەكلى ئۆزگىرىپ كېتىدۇ ۋە بوغۇم كۆمۈرچىكىنىڭ يېتىلىشى ياخشى بولمايدۇ.

3. مېڭىشنى بالدۇر ئۆگىتىش

بىر قىسىم ئاتا-ئانىلار بالىغا بالدۇرراق مېڭىشنى ئۆگىتىش ئۈچۈن، بالا ئالتە-يەتتە ئايلىق بولغاندىن باشلاپ مېڭىشنى مەشىق قىلدۇرىدۇ. ئەمما بىر ياشتىن بۇرۇن بوۋاقنىڭ سۆڭىكى بىر قەدەر يۇمشاق بولۇپ، ئۇزۇن ۋاقىت ماڭسا ياكى ئۆرە تۇرسا سۆڭەككە بولغان بېسىم ئېشىپ، سۆڭەك شەكلىنىڭ ئۆزگىرىشىنى كەلتۈرۈپ چىقىرىدۇ؛ يەنە بوۋاقنى ئۇزاق مەزگىل غالتەكلىك ھارۋىدا ئولتۇرغۇزۇشمۇ ناھايىتى ئاسانلا O شەكىللىك پۇت پەيدا بولۇشنى كەلتۈرۈپ چىقىرىدۇ. شۇڭا ئاتا-ئانىلار بالىنىڭ ئۆسۈپ يېتىلىش قانۇنىيىتىنى چىقىش قىلىپ، ئۇلارنىڭ ساغلام ئۆسۈپ يېتىلىشىگە توغرا يېتەكچىلىك قىلىشى كېرەك.

4. ھامىلىدارلىق مەزگىلىدە ھامىلە ئورنى توغرا بولماسلىق

ئەگەر ھامىلە بالىياتقۇدا ئۇزۇن ۋاقىت ساغرا قىسمى ياكى تىزى ئېگىلگەن ھالەتتە تۇرسا، ھامىلە ئورنىنىڭ توغرا بولماسلىقىنى كەلتۈرۈپ چىقىرىش بىلەن بىرگە، يەنە بوۋاق پۇتىنىڭ تۇغۇلۇپلا O شەكىللىك بولۇشىنى كەلتۈرۈپ چىقىرىشى مۇمكىن. ياخشى يېرى بۇ خىل ئەھۋالنى مۇۋاپىق تەدبىر قوللىنىش ئارقىلىق كېيىنكى مەزگىلدە نورمال ھالەتكە كەلتۈرۈشكە بولىدۇ. شۇڭا ئاياللار ھامىلىدارلىق مەزگىلىدە پات-پات تەكشۈرتۈپ تۇرۇشى، ئەگەر ھامىلىنىڭ ئورنى توغرا بولمىسا، ۋاقتىدا تەدبىر قوللىنىشى كېرەك.

گەرچە پۇتنىڭ O شەكىلدە تەرەققىي قىلىشى ھاياتلىققا نىسبەتەن زور خەۋپ ئېلىپ كەلمىسىمۇ، ئەمما بۇ بالىنىڭ كېيىنكى ئۆگىنىش ۋە تۇرمۇشىغا ناھايىتى زور تەسىر كۆرسىتىدۇ. شۇڭا بالا تۇغۇلغاندىن كېيىن، ياكى ئۆسۈپ يېتىلىش جەريانىدا پۇتى O شەكىللىك بولۇپ قالغاندا، قارىغۇلارچە نامۇۋاپىق ئۇسۇللارنى (مەسىلەن كۈچلۈك تېڭىش ياكى كۈچلۈك باغلاش قاتارلىقلار) قوللىنىشتىن ساقلىنىپ، ئىلمىي ئۇسۇلدا بالىنىڭ مۇۋاپىق ھەرىكەت قىلىشىغا ياردەم بېرىپ، ئورگانىزمنىڭ ئىممۇنىتېت كۈچى ۋە سۆڭەكنىڭ قاتتىقلىقىنى ئاشۇرۇشىغا يېتەكچىلىك قىلىش ۋە دوختۇرنىڭ كۆرسەتمىسىگە ئاساسەن باشقا مۇۋاپىق تەدبىرلەرنى قوللىنىش كېرەك.

مەنبە:
https://m.nur.cn/news/2023/12/17793889.shtml