كېسەلدىن خالىي بولۇشتىكى ئون ئۇسۇل

ئامېرىكا تېببىي ئالىملىرىنىڭ كۆرسىتىشىچە، تۆۋەندىكى ئون نۇقتىغا دىققەت قىلغاندا، ئادەم ئىممۇنىتېت كۈچىنى ئاشۇرۇپ، كېسەلدىن خالىي بولالايدىكەن:

كېسەلدىن خالىي بولۇشتىكى ئون ئۇسۇل

1. ئېغىز بوشلۇقى تازىلىقىغا ئەھمىيەت بېرىش. ئېغىز بوشلۇقى تازىلىقى ياخشى بولمىسا، چىش ئەتراپى يەللىكى پەيدا بولۇپ، قەنت كېسىلى ياكى يۈرەك كېسىلىنى كەلتۈرۈپ چىقىرىدىكەن. شۇڭا ئېغىز بوشلۇقى تازىلىقىغا ئەھمىيەت بېرىش سالامەتلىككە كاپالەتلىك قىلىشنىڭ بىرىنچى قەدىمى ھېسابلىنىدىكەن.

2. قول پاكىز بولۇش. زۇكام تارقىلىۋاتقان پەسىللەردە ھەر كۈنى قولنى سوپۇن بىلەن يۇيۇپ تۇرۇش لازىم ئىكەن، قولنى يۇيۇپ بەرگەندە باشقا يۇقۇملۇق كېسەللەرنىڭ ئالدىنى ئالغىلى بولىدىكەن.

3. قىزىل ئالمىنى كۆپ ئىستېمال قىلىش. قىزىل ئالما، قاتكۆك، يېشىل چاي تەركىبىدە كىۋېرتسترىن دەيدىغان بىر خىل تەبىئىي ئوكسىدلىنىشقا قارشى ماددا بولۇپ، ئۇ كىشىلەرنى بېسىم ئاستىدا ئىممۇنىتېت كۈچىنى ئاشۇرۇش ئىمكانىيىتىگە ئىگە قىلالايدىكەن. تەتقىقاتتىن مەلۇم بولۇشىچە، ئۇدا بەش ھەپتە قىزىل ئالما ئارقىلىق كىۋېرتسترىننى قوبۇل قىلغان كىشىلەرنىڭ نەپەس يولى كېسىلىگە گىرىپتار بولۇش خەۋپى 40% تۆۋەن بولغان.

4. ئىجتىمائىي ئالاقە كەڭ بولۇش. ئىجتىمائىي ئالاقىسى كۆپ كىشىلەرنىڭ يۈرەك كېسىلىگە گىرىپتار بولۇش نىسبىتى ئاز، ئۆمرىمۇ ئۇزاق بولىدىكەن.

5. ھەر كۈنى ھەرىكەت قىلىپ بېرىش. چېنىققاندا قان ئايلىنىشنى ياخشىلىغىلى، قارشىلىق كۈچىنى ئاشۇرغىلى بولىدۇ، كېسەل باكتېرىيىسى بەدەنگە كىرگەن تەقدىردىمۇ بەدەن ئۇلارنى تەلتۆكۈس يوقىتالايدۇ.

6. يېتەرلىك ئۇخلاش. ئۇيقۇ ياخشى بولسا، ماددا ئالماشتۇرۇش ياخشىلىنىپ، ئادەمنىڭ ئىممۇنىتېت كۈچى تېز ئەسلىگە كېلىدۇ.

7. ئۈمىدۋار بولۇش. تەتقىقاتتىن مەلۇم بولۇشىچە، خۇشال – خۇرام، قىزغىن، سالماق، ئېغىر – بېسىق كىشىلەرنىڭ تارقىلىشچان كېسەللەرگە گىرىپتار بولۇش نىسبىتى ئاز بولىدىكەن.

8. ۋىتامىن. ۋىتامىن D بېلىق گۆشى، تۇخۇم، سۈت تەركىبىدە كۆپ بولىدۇ، بۇ يېمەكلىكلەرنى كۆپرەك ئىستېمال قىلىش سالامەتلىككە پايدىلىق. ۋىتامىن C كەمچىل بولسىمۇ ئادەمنىڭ ئىممۇنىتېت كۈچى تۆۋەنلەپ كېتىدۇ، شۇڭا كىشىلەر ئاپېلسىن تۈرىدىكى مېۋە – چېۋىلەرنى كۆپرەك ئىستېمال قىلىشى كېرەك.

9. ياخشى روھىي ھالەت. ئاكتىپ پوزىتسىيە بەدەندىكى ئازوت چالا ئوكسىدىنىڭ گورىزونتالىنى ئۆستۈرۈپ، نېرۋىنىڭ ۋاسىتىچى ماددىسىنى تەڭپۇڭلاشتۇرۇپ، ئادەمنىڭ ئىممۇنىتېت كۈچىنى ياخشىلايدۇ.

10. نەپەسنى تەڭشەش، چوڭقۇر خىيال قىلىش. چوڭقۇر خىيال قىلىشنى مەشىق قىلىش كىشىلەرنىڭ نېرۋا سىستېمىسىنى تېخىمۇ خاتىرجەم قىلىپ، بېسىمنى تۆۋەنلىتىشىگە ياردەم بېرىدىكەن، ئۇيقۇنى تەڭشەپ، قارشىلىق كۈچىنى ئاشۇرىدىكەن.