ئەيدىز ۋىرۇسى بىلەن يۇقۇملانغانلارنى بايقاش ئەيدىزنىڭ يەنىمۇ يامراپ كېتىشىنىڭ ئالدىنى ئېلىشنىڭ ئاساسلىق يولى لېكىن جەمئىيەتتە كىشىلەرنىڭ ئەيدىزگە گىرىپتار بولغانلارنى كەمسىتىشى ۋە ئۇنىڭدىن ۋەھىمە ھېس قىلىشى بۇ خىزمەتنى ئاقسىتىپ قويماقتا
شۇڭا ئەيدىز ۋىرۇسى بىلەن يۇقۇملانغانلارنى كەمسىتمەيدىغان ئىجتىمائىي مۇھىت يارىتىپ، ئەيدىز ۋىرۇسى بىلەن يۇقۇملانغانلار دادىل تەكشۈرتەلەيدىغان، كېسەل ئەھۋالىنى ئېتىراپ قىلىدىغان، ئاكتىپ داۋالىنىدىغان مۇھىت يارىتىشىمىز كېرەك. بۇ، ئەيدىزنى ئومۇميۈزلۈك تىزگىنلەشكە پايدىلىق.
ئەيدىزگە گىرىپتار بولغانلارغا غەمخورلۇق قىلىش پۈتكۈل جەمئىيەتنىڭ ئورتاق تىرىشىشىدىن ئايرىلمايدۇ.
بۇنىڭ ئۈچۈن، بىرىنچىدىن، تەشۋىقات سالمىقىنى زورايتىپ، كىشىلەرنى ئەيدىزگە ئائىت بىلىملەردىن خەۋەردار قىلىپ، ئۇلارنىڭ ۋەھىمىسى ۋە ئەندىشىسىنى تۈگىتىپ، يۇقۇملانغانلارنىڭ ھوقۇق – مەنپەئىتىگە كاپالەتلىك قىلىش كېرەك، شۇنداقلا مەسئۇلىيەت ۋە مەجبۇرىيەتنى تەكىتلەپ، ئەيدىزگە گىرىپتار بولغانلار ئۈچۈن ئازادە ياشاش مۇھىتى يارىتىپ، ئۇلارنىڭ جەمئىيەتكە قەلب سىرلىرىنى ئاشكارىلىشىغا تۈرتكە بولۇش كېرەك.
ئىككىنچىدىن، ئەيدىزگە گىرىپتار بولغانلارنى داۋالايدىغان ۋە ئۇلارغا غەمخورلۇق قىلىدىغان مەخسۇس ئورگان قۇرۇپ، ئۇلارنى داۋالاپ، ئۇلارغا تەسەللى بېرىپ، غەمخورلۇق قىلىپ، ئۇلارنى تۇرمۇشقا ئاكتىپ يۈزلىنىشكە ئىلھاملاندۇرۇش كېرەك.
بۇنىڭدىن سىرت، ئەيدىز ۋىرۇسى بىلەن يۇقۇملانغان ياشلار، ئۆسمۈرلەر ۋە ئەيدىزگە گىرىپتار بولغانلار بارغانسېرى كۆپىيىۋاتقان بۈگۈنكى كۈندە، ياشلار، ئۆسمۈرلەرگە ئەيدىزگە ئائىت بىلىملەرنى بىلدۈرۈپ، ئۇلارنىڭ كېسەلدىن ساقلىنىش، داۋالىنىش ئېڭىنى ئۆستۈرۈپ، ئۇلارنىڭ كىچىكىدىنلا ئەتراپىدىكى ئەيدىزگە گىرىپتار بولغانلارغا غەمخورلۇق قىلىشىغا تۈرتكە بولۇش كېرەك.
