جەنۇبىي ئاۋسترالىيە ئۇنىۋېرسىتىتى خەۋىرى، دوختۇرلار تورى تەرجىمىسى:
تەتقىقاتلاردىن مەلۇم بولۇشىچە، ئانىنىڭ تۇغۇتتىن ئىلگىرى تاماكا چېكىشى بالىنىڭ ئۆگىنىش نەتىجىسىگە تەسىر كۆرسىتىدىكەن
ئەگەر بىر ئانا ھامىلىدارلىق مەزگىلىدە تاماكا چەكسە، تاماكا تەركىبىدىكى زەھەرلىك خىمىيەلىك ماددىلار تۇغۇلمىغان بوۋاققا زىيان يەتكۈزىدۇ. بىر تۈرلۈك يېڭى تەتقىقاتتا كۆرسىتىلىشىچە، تۇغۇتتىن ئىلگىرى تاماكا چېكىش پەرزەنتلەرنىڭ كەلگۈسىدىكى ئۆگىنىش نەتىجىسىنىڭ تۆۋەنلەپ كېتىشىنى كەلتۈرۈپ چىقىرىدىكەن. مەزكۇر تەتقىقات نەتىجىسى «خۇمار قىلمىشى» ژۇرنىلىنىڭ يېڭى سانىدا ئېلان قىلىندى.
جەنۇبىي ئاۋسترالىيە ئۇنىۋېرسىتىتى بىلەن كوتىن ئۇنىۋېرسىتىتى ، جەنۇبىي ئاۋسترالىيە سەھىيە تەتقىقات يۇرتى، ئامېرىكا خارۋارد ئۇنىۋېرسىتىتى قاتارلىق ئورگانلارنىڭ بىرلەشمە تەتقىقات كوللېكتىپى 19 تۈرلۈك تەتقىقات ۋە 1 مىليون 250 مىڭ قاتناشقۇچىنى سىستېمىلىق خاتىرىلاپ سىتاتىسكىلىغان. تەتقىقاتنىڭ 79 % دوكلاتتا بايقىلىشىچە، ئانىلارنىڭ تۇغۇتتىن بۇرۇن تاماكا چېكىشى كەلگۈسىدە بالىلارنىڭ ئۆگىنىش نەتىجىسىنىڭ تۆۋەنلەپ كېتىشىنى كەلتۈرۈپ چىقىرىدىكەن.
مەزكۇر تەتقىقاتچىلار كوللېكتىپ يەنە 723877 نەپەر قاتناشقۇچىغا چېتىلىدىغان سەككىز تۈرلۈك ئاساسلىق تەتقىقاتنى تەھلىل قىلدى. تەتقىقاتلاردىن مەلۇم بولۇشىچە، ئانىسى تاماكا چېكىدىغان مۇھىتتا قالمىغان بالىلارغا سېلىشتۇرغاندا، تاماكا چېكىدىغان ھامىلىدار ئانىلاردىن تۇغۇلغان بالىلارنىڭ ئۆگىنىش نەتىجىسىنىڭ ياخشى بولماسلىق ئېھتىماللىقى %49 يۇقىرى بولىدىكەن.
تەتقىقاتچىلارنىڭ كۆرسىتىشىچە، تۇغۇتتىن ئىلگىرى تاماكا چېكىش كۆپ خىل ھامىلىدارلىق ئەگەشمە كېسەللىكلىرىنى كەلتۈرۈپ چىقىرىدىكەن، بۇ بويىدىن ئاجراش، ئۆلۈك تۇغۇش، ئۆسۈپ يېتىلىش چەكلىمىگە ئۇچراش ۋە كەمتۈك تۇغۇلۇش خەۋپىنى ئاشۇرۇۋېتىشنى ئۆز ئىچىگە ئالىدىكەن. ئۇ يەنە ناچار پىسخىك ساغلاملىق نەتىجىسى ۋە ھەرىكەت مەسىلىسى بىلەن مۇناسىۋەتلىك.
مەنبە:
جەنۇبىي ئاۋسترالىيە ئۇنىۋېرسىتىتى خەۋىرى
